Nimlivolivon 17 - Seysyo No Tao

No keyyan ni Pawlo a kani Sila do Tesalonicya

¹ Meyhatay si Pawlo a kani Sila do peycyeylilyan na do Anveypodi a kado Apoloniya am makaranes rana sira do Tesalonicya. Amyan dang so peyneynozyan da no tao do Yotay.

² So to na mangozai ni Pawlo do mina iwawalam na no kakwa pa mangay do peyneynozyan. Ipitlo do ipeywalam no tao a macinekanekad do tao a mangnanao no nivatvatkan a Ciriciring na ni Ama ta do to,

³ a kaononong na ji Kizisto a nipakakasi da a wakwaken a kavyay na rana sya ni Ama ta do to. Maniring pa am, “Si Yeso rana ko ipeylimwang jinyo am manoyong a Misayya a nitovoy ni Ama ta do to do teyrahem.”

⁴ Mamizing da no tatasa ka tao do Yotay am to da na anoyngi kapacihza da ji Pawlo a kani Sila. So nikaro no omraralay ni Ama ta do to a tao do Sila kano meynakem a mavakes do dang a omanoyong rana ji Yeso.

⁵ Am o meyili dang a tao do Yotay a ji nganoyong ji Yeso am ikeynanahet da sira. Am ori o nilovotan da so abwata so vazavazay a tao a kano marahet so nakenakem a kapeyzavozavoz da sira so aro a tao a kasdep da do vahay ni Yeson a komala si Pawlo a kani Sila. Ta naknakmen da o kangay da nira do tangain no aro a tao.

⁶ Am ji da kala sira. Am to da rana rakpa si Yeson a kano karwan da sinjya a lolwen a yangay do panipanirsirngen da. Maniring sira am, “O tao rana yamapeyzavozavoz so tao do peycyamahamahatawan na am sira rana nimakaranes do jya.

⁷ Si Yeson am nipeysan na sira do vahay na. So nikamimin da ji nimahap so ciring na ni Kaysa. Ta maniring sira am yamyan so yasa ka panirsirngen a meyngaran si Yeso.”

⁸ Mamizing da no tao a kano panipanirsirngen am ikarahet da.

⁹ Meyratateng am patorwan da no panipanirsirngen si Yeson a kano kararay na so nizpi. Ori o nipasawayan da rana sira.

No keyyan da Pawlo do Peyloya

¹⁰ Mahep rana am yangay da si Pawlo a kani Sila no akma dey kakteh do cinai do Peyloya. Makaranes rana sira do dang am somdep sira do peyneynozyan no tao do Yotay.

¹¹ O tao rana dang am apyapya sira kano sinjya do Tesalonicya. Ta makdeng sira omamizing so ipangnanao da Pawlo. Masangib sira do araraw a tomita so Seysyo. Kakzeben da katenngan o kanoyong na kalas na no ipanci na ni Pawlo.

¹² Am ori o nikaro no nimanganoyong a tao do Yotay a kano meynakem a mavakes do Sila kano tao do Sila mahakay.

¹³ Am mamizing da no tao do Yotay a meyili do Tesalonicya si Pawlo a meylimwang no ciriciring na ni Ama ta do to do Peyloya am mangay sira o tao do Yotay a mapeyvonag so aro a mangamizing a tao.

¹⁴ Am ori o nyangayan da ni Pawlo no sinjya do minato. Si Sila kani Timotay am nimavezed sira do Peyloya.

¹⁵ Makaranes sira do Yatyan o nimacihza ji Pawlo am meysinaoli rana sira do Peyloya a manci no nipakoyokoy na jira ni Pawlo, ta kakzeben na si Sila kani Timotay a makeykai a mangay jya.

No keyyan ni Pawlo do Yatyan

¹⁶ Nanalahen na ni Pawlo si Sila kani Timotay do Yatyan am macita na o ili da kakakadayan no ji meyngongyod a tao do to da. So nikaratan na nya no onowned.

¹⁷ Am ori o nipacinekanekad na do tao do Yotay a kano omraralay ni Ama ta do to a beken a tao do Yotay do peyneynozyan. So nikasangib na do araraw a macinekanekad do masazi na tao do rarahan.

¹⁸ Amyan dang so mangnanao no nanao ni Ipikolo a kani Sitoke. Sira rana am nimai sira macinekanekad ji Pawlo. Maniring o kadwan jira am, “Ikongo na ipanci no nya a yajyapsepsek ang.” Amyan so manci no, “Yana ipanci o da iraralay no tarek a pongso.” Ta o ipeylimwang na ni Pawlo am si Yeso a kano keypirwa na nimavyay.

¹⁹ Am ori o nihapan da si Pawlo no aro a panipanirsirngen da do peykeykaygyan da a ngaranan da so Adipako. Maniring sira jya am, “Namen kakzeben o namen kapakateneng do yavayo a mo ipangnanao.

²⁰ Ta namen jyatenngi pa o akman sang a nanao. So pancyan mo nya jyamen so agagazan na.”

²¹ O pancyan da no akman sang am o tao do Yatyan a kano apo do tarek a ili a misan dang a tao am ji da mapakdengi o kapeyvazay da. Ta o ikakza da am kapakamizing da so yeyyak da no cicilwan a ciring.

²² So nipeytatanek ni Pawlo do Adipako a peykeykaygyan da. Maniring jira am, “Inyo rana tao do Yatyan am ko katenngan inyo a yatey makdeng a yamanaralay no tao do to nyo.

²³ Ko na nilivon o ili nyo a yatomita so nyo iraralay. So ko nipakacita so nyo nipariparing a papazosan nyo. O yadomket a vatvatek am, ‘Jyasingkaji a tao do to.’ Sicyaikwa rana ya am ko ipanci jinyo o nyo pa jyatenngi so ngaran a meyngongyod a Tao do to.

²⁴ Iya rana am nimangamamaog so hanit a kano teyrahem a kano meycyamadadayan. So ikanoyong na Panirsirngen do sinokob no hanit. Iya rana am yaji meyvahay do niparing no tao a panaralayan.

²⁵ Iya rana am na ji ngakzeba o tao a somidong sya. Iya o na kapwan no ikavyay no kataotao ta kano meycyamadadayan a kalahen ta tao.

²⁶ Iya o nimangamamaog so asa ka tao a cinapodpodan da no yamavonong do peycyamahamahatawan na tao do teyrahem, a na kapamnek do awawan da no iyan da do karawan a kano yanan da pongso.

²⁷ O na ikakman sang am na kakzeben ni Ama ta do to o kapakateneng da jya no tao. So ta jyahawangi ji Ama ta do to.

²⁸ Ta maniring o asa ka tao am, ‘Iya o yapwan no inawan ta do karawan a yaomzat jyaten.’ Maniring pa sira o mateneng a tao a macikeylyan jinyo am, ‘Yaten rana am akma ney anak yaten.’

²⁹ “No manoyong ta akma ney anak am ji ta naknakma o kapehngay ta si Ama ta do to do nipariparing no tao no apya so kolit a kano kayo a kano veysen a pehngehngain da ji Ama ta do to.

³⁰ No kaji da pa makatenngan ji Ama ta do to no tao am ji na naknakma o raraten da. Am sicyaikwaya am na ikakza o tao a yamamlis a komaro rana do peyraratenan da.

³¹ Ta na nipamnekan o araraw na ni Ama ta do to a tomovoy so nipamnekan na a mapacici so tao do teyrahem. Ta iya rana am ji mapeycyakaban so tao. So na jyalasi no kanimawakwak na a kapirwa na sya avyain ni Ama ta do to.”

³² Mamizing da si Pawlo a manci no keyyan no nimawakwak a tao a nimirwa mavyay am ipeykeykaming da. Maniring o tatasa jira am, “Namen tey kakza pa yamizngen o mo ipangnanao.”

³³ Meyratateng am karwan na rana ni Pawlo o peykeykaygyan da.

³⁴ So niyan no tao a omanoyong ji Yeso a kapacihza da rana ji Pawlo. O asa am asa ka panirsirngen da do Adipako a meyngaran si Tinisyo a kano asa ka mavakes a meyngaran si Tamadi a kano karwan da tao.