Nimlivolivon 14 - Seysyo No Tao

No keyyan ni Pawlo a kani Parnapo do Ikenyan

¹ Makaranes si Pawlo a kani Parnapo do Ikenyan a ili am mangay sira do peyneynozyan da no tao do Yotay a mangnanao. So nikaro no tao do Yotay a kano beken a tao do Yotay a omanoyong rana ji Yeso.

² Am o jyakey a manganoyong a tao do Yotay am pasozisozin da sira o beken a tao do Yotay a macioya do amraralay ni Yeso.

³ Am mownay pa dang si Pawlo a kani Parnapo. Ji sira nimamogaw a meylimwang ni Yeso. Ta nioyatan na sira ni Ama ta do to. Am aro o mapeyzokab a vazay da yongkad no ipeylimwang da pangangarilawan na ni Ama ta do to.

⁴ So nipeypinpin da no tao do dang. O asa lipenpenan am macikagom do tao do Yotay. O asa lipenpenan am macyagom da Pawlo a kani Parnapo a omanoyong do nanao da.

⁵ Am o tao do Yotay a kano panipanirsirngen da kano kararay da beken a tao do Yotay am naknakmen da o kapaciliman da ji Pawlo a kani Parnapo a agsagsahan.

⁶ Mamizing ni Pawlo a kani Parnapo am somazok sira do Disetela kado Tepey a ili a macinapnap do Dikawniya kado macisngen dang a ili,

⁷ kapeylimwang da dang no Mapasaray a Ciriciring na ni Ama ta do to.

No keyyan da do Disetela kado Tepey

⁸ Amyan do Disetela so asa ka mahakay a nimeycicinda a ji makalam no katazak na tao.

⁹ Amizngen na o ipangnanao na ni Pawlo am to na ningkaji ni Pawlo. Milamdam na ni Pawlo a meyhanhan ni Ama ta do to am iwakwakan na.

¹⁰ Maniring jya am, “Peytatanek rana,” a kapeytatanek na rana omalam.

¹¹ Macita da o vazay ni Pawlo no aro a tao am amlololos sira meyzezyak so ciriciring no Dikawniya a ji da tenngi a amizngen da Pawlo. Maniring sira am, “Asyo sira ya yakmey mina to meyhekas a tao do to.”

¹² Karahan am ngaranan da sira no ngaran no tao do to da. O ningaran da ji Parnapo am si Sose. Si Pawlo am si Hemeyse, ta iya o meyzezyak.

¹³ Amyan do siri no ili da so raralayan da ni Sose. No kanang amyan so asa ka tao a mapatanatanang so pazos da mangalak so baka meytaktakzes so savong no kayo a mangay do samorangan no ili da a amzakat so baka a omraralay ni Pawlo a kani Parnapo.

¹⁴ Milamdam na ni Parnapo a kani Pawlo o nakenakem da no aro a tao am marahet o onowned da. Am ori o nizamitan da so talili da kangay da do tangain da no aro a tao. Maniring sira am,

¹⁵ “Ikongo nyo icyakman so sang so vazay jyamen. Namen akman jinyo saon a tao am. O namen nyai jya am namen ipeylimwang jinyo o Mapasaray a Ciriciring ni Yeso. Namen ikakza inyo a komaro do ji meyngongyod a iraralay nyo. Apyapya pa o kararalay nyo no manoyong a Tao do to. Iya rana am nimangamamaog so karawan a kano meycyamadadayan.

¹⁶ No kakwa pa am nipya na inyo a beken a tao do Yotay a to ngonongonong do nakenakem nyo.

¹⁷ Am yaro makakaday a yapya vazay na yongkad na jinyo a yamarilaw ninyo. Na ipanta inyo so cimoy. Na nipasaod o mowamowa nyo. Na absoin inyo. Na pasarain o onowned nyo.”

¹⁸ Tana ipeypanci da Pawlo o ka beken a tao do to da am ji sira aza o taotao a omraralay nira.

¹⁹ Am o tao do Yotay a nimapo do Ikenyan a kado Antia a macinapnap do Pisitiya am paksozen da o aro a tao a kagsegseh da ji Pawlo. Ipanci da nimazakat rana. Am ori o nilolwan da sya yangay do siri no ili da.

²⁰ Limoten da no amraralay ni Yeso a tao am to meytatanek a meyvangon a kangay na rana do ili da. Ikadwa na araw am mangay rana sira kani Parnapo do Tepey.

Meysinaoli si Pawlo a kani Parnapo do Antia ili a macinapnap do Sidiya

²¹ Makaranes sira do Tepey am ipeylimwang da o Mapasaray a Ciriciring na ni Ama ta do to. Am ori o nipeyparo da no tao a omanoyong rana ji Yeso. Meyratateng am meysinaoli rana sira mangay do Disetela kado Ikenyan a kado Antia ili a macinapnap do Pisitiya.

²² So nikakadayan da so amraralay ni Yeso a tao a paiten so nakem a to ngotokot a amraralay ni Ama ta do to. Maniring sira jira am, “Yaten rana a yamraralay ni Yeso am aro masapa ta alalaw no macikaop ta do italamozong na ni Ama ta do to.”

²³ Meyratateng am mamnek sira so panipanirsirngen da do peycyakyokyokayan na a madaday do teyhesa ka ili. Ji sira mangakaday a meynozi nira ji Ama ta do to.

²⁴ Mangay rana sira am meyhatay sira do Pisitiya. Mownay am makaranes sira do Pangveydiya.

²⁵ So nipangnanao da do Peyke. Meyratateng am meypangay sira do Atadiya.

²⁶ Komavos rana o vazay da do dang am somakay sira do avang a meysinaoli do Antia. Ta do dang nipamnekan na jira ni Ama ta do to a mahap so vazay na. So nikavos na rana no vazay da.

²⁷ Makaranes rana sira do Antia am lovoten da sira o sinjya a kapanci da nya jira so nisidongan na sira ni Ama ta do to do vazay da. Ta o ipeylimwang da do tao a ciriciring na ni Ama ta do to am nyanoyngan da no beken a tao do Yotay.

²⁸ So nikownay da dang da Pawlo a kani Parnapo a macikaop do akma dey kakteh do cinai do Antia.