Nimlivolivon 1 - Seysyo No Tao

¹ Kokay mo Tiawveylo. O ko nivatvatkan rana nimanma vakong am ko na nimimin o vazay na kano nipangnanao na ni Yeso,

^2-3 a mangay no kapeycyakavat na rana mangay do teyngato. Ikapat na ngarnan (40) no araraw no nipeyvangon na am ipiro na o kataotao na ipacita do nipamnekan na omlivolivon no ciriciring na. So ipakateneng da do kanoyong na rana nimavyay a kapanci na nya jira so italamozong na ni Ama ta do to. No kaji na pa meycyakavatan a mangay do teyngato am nioyatan no Seyzi si Yeso a omyokod no nipamnekan na omlivolivon no ciriciring na a vazay na jira.

^4-5 Ipisa no kalovot da pa am nipanci ni Yeso jira o, “Si Yowani rana am nitaktakan na inyo no ranom. Am do kadadayan no araraw am meyhekas jinyo o Seyzi. Am ori o ji nyo ngaroi do Yelosaleng, ta nanalahen nyo o Seyzi a itoro na jinyo ni Ama ta do to akman so nipanci na jyaken no kakwa kano nipanci ko pa jinyo asyo.”

No kapeycyakavat na rana do teyngato ni Yeso

⁶ No keypisa na ni Yeso a macilovot do nipamnekan na omlivolivon no ciriciring na am pacicin da. Maniring sira am, “Mo Panirsirngen, sicyaikwaya o mo torwan no oyowyat namen a sivosivovoong ni Isedi a tomalamozong no pongso namen?”

⁷ Maniring jira si Yeso am, “O akman rana sang a vazay a kano araraw na am si Ama ta do to o makateneng jya.

⁸ Am meyhekas jinyo o Seyzi. So iyan no rako a oyowyat nyo a meylimwang nyaken do Yelosaleng a kado peycyeylilyan na do Yotay a kado Samadiya a mangay do peycyamahamahatawan na.”

⁹ Teyka na rana ori a ciring am meycyakavat rana si Yeso do teyngato. Tangarahen da am amyan so asa ka cinalab ambengbeng so citahen da.

¹⁰ Karwan na rana sira am to da cita o rarwa a malavang so ayob a tao a tomanek do katangked da a manci no,

¹¹ “Inyo rana a tao do Cyadidi am ikongo nyo ipeytatanek do jya a yatomangara so hanit. Ta si Yeso eya yakomaro rana jinyo a yamangay rana do teyngato am akman sang, ta mirwa pa meysinaoli do teyrahem a maciralay do cinalab.”

Palitan da si Yota

¹² Meyratateng am karwan da rana o meyngaran so Kanlan a tokon no nipamnekan ni Yeso a omlivolivon no ciriciring na a meysinaoli rana do Yelosaleng. O karairai na am kakteb no toki do alaman sya.

¹³ Makaranes sira do Yelosaleng am somdep rana sira do kavava no vahay a peyvahayan da. Sira rana am si Pite a kani Yowani a kani Yake a kani Antele a kani Veydipo a kani Tomase a kani Patolomaw a kani Matay a kano anak na ni Alevey a si Yake a kano ipanci da macikagom do macioya do Loma a meyngaran so Simong a kano anak na ni Yake a si Yota.

¹⁴ Mangday sira meylovolovot a meynozi a kano mavavakes. Amyan pa jira si Madiya ina na ni Yeso a kada wari na ni Yeso a mahakay.

¹⁵ Kadadayan na so araraw am meylovolovot sira omanoyong ji Yeso. Adwa ngarnan sira so ikakarwan a poo (120) o karwaro da. Meytatanek si Pite a kapanci na no,

¹⁶ “Manga kakteh, nimangononong o nivatvatkan ni Tawey a nipaziman na jya no Seyzi no kakwa pa a omagaz ji Yota a nimapalolo so tao a amrakep si Yeso.

¹⁷ Ta si Yota rana am mina kararay ta nipamnekan ni Yeso a omlivolivon no ciriciring na a somidong jyaten do vazay ta.”

¹⁸ Amyan so asa ka hakawan a nipalit da no nizpi a ngina no inawan na ni Yeso. Do dang o nikazakatan ni Yota. Ta nilalavicin na o kataotao na a kakas na kavotdak no velek na kapeytotwaw no cinai na.

¹⁹ Mamizing da no meyvahay do Yelosaleng am ngaranan da o hakawan ang so Haketama. O peypeypangayan na am, “Nivoyogan no rala no tao.”

²⁰ Maniring pa si Pite am, “O nivatvatkan rana ni Tawey do Anwanood a omagaz ji Yota am oya o nipanci na, ‘Inaoy no si abo o tao a meyvahay do dang.’ Maniring pa am, ‘Inaoy no si macipalit o tao a omahap so vazay na.’ ”

^21-22 Maniring pa si Pite am, “Mamnek ta so asa ka tao a kapalit na ni Yota a kararay ta meylimwang ni Yeso a Panirsirngen ta a nimirwa a mavyay. O ahapen ta am nimacilovot jyaten no kapapo na ni Yowani a manaktak a mangay do araraw no kapeycyakavat na ni Yeso do teyngato.”

²³ So nipamnek da so rarwa ka tao a meyngaran si Yoseyvo a kani Matiya. O kasaing no ngaran ni Yoseyvo am si Pasapa kani Yoseto.

²⁴ Meyratateng am meynozi sira a manci no, “Mo Panirsirngen, mo katenngan o nakenakem no tao do teyrahem. So pancyan mo nya jyamen so nipamnekan mo do yararwa eya,

²⁵ a macipalit do vazay ni Yota. Ta nikarwan na rana o vazay na mangay do angayan na.”

²⁶ Mateyka da ori a ciring am masipangoyongoyot sira a kapakahap da so meyngaran so Matiya a kapacirapa na rana do asa so ikakarwan (11) a nipamnekan na ni Yeso a omlivolivon no ciriciring na.