Matay 4 - Seysyo No Tao

Niharag na ni Yeso o nimlita jya a Satan

¹ Makarahan am ipeypalanginan no Seyzi si Yeso a yangay do kabwan no nihakawan no tao a littan ni Satan.

² Makasikapat (40) so araraw si Yeso a jya nikoman am maliliw na o kakcin na.

³ Ori o nyangay ni Satan ji Yeso. Maniring jya am, “No ka manoyong a Anak no Tao do to am pancyan pala o aro a vato a kapeyvaliw na a myanpaw.”

⁴ Tovisan ni Yeso am, “O ciring do Seysyo am, ‘Beken a kanehen o ikavyay no tao, ta makdekdeng pa o Ciriciring na ni Ama ta do to a ikavyay no tao.’ ”

⁵ Makarahan am yangay na pa ni Satan si Yeso do Yelosaleng a kangay na nya do toktok na no rako a panaralayan da.

⁶ Maniring jya am, “No ka manoyong a Anak no Tao do to am okso pala do teyrahem ito. Ta o ciring do Seysyo am, ‘Manovoy o Tao do to so tinsi na a mangay omzat jimo. So tazapyan da jimo no lima da kaji na meyzazan no ai mo do vato.’ ”

⁷ Tovisan ni Yeso am, “O ciring do Seysyo am, ‘Ji nyo ngileylamdama o Panirsirngen nyo a Tao do to nyo.’ ”

⁸ Am ori o nitanggahan na ni Yeso ni Satan do makarang a tokon a kapacita na no peykamahamahatawan na kano aro a masamasaod no karawan.

⁹ Maniring si Satan am, “No si meylilitod ka amraralay nyaken am to ko na mimina o makakaday a itoro jimo.”

¹⁰ Tovisan ni Yeso am, “Angay rana mo Satan! Ta o ciring do Seysyo am, ‘Iraralay nyo o Panirsirngen a Tao do to nyo. So ika iya na no iraralay nyo. Ta abo o ikararwa na a iraralay nyo an.’ ”

¹¹ Makarahan am karwan na rana si Yeso ni Satan a kai no aro a tinsi ni Ama ta do to a somidong sya.

Papwen ni Yeso o vazay na do Cyadidi

¹² Mamizing na ni Yeso si Yowani a nipteng da do pamemtengan am meysinaoli do Cyadidi.

¹³ Am ji rana meyvahay si Yeso do Nasale, ta nimangay rana a meyvahay do Cyapaynong. O ili rana ori am amyan ori do Sipolon a kado Navotadi a macisngen do rako a meybebneng a ranom a meyngaran so Cyadidi.

¹⁴ O icyakman na sang am todey mangononong o ciring no panoyonoywan na so ciring ni Ama ta do to a meyngaran so Isayya. Ta maniring am,

¹⁵ “O tao do Sipolon a kado Navotadi a macisngen do rako a meybebneng a ranom a kado meyngaran so Yotan a ayo a yanan da no beken a tao do Yotay do Cyadidi am

¹⁶ o amyan do yakasarisaryan a manyahey no kawakwak da am macita da rana o na cirain ni Ama ta do to a mapatazadang sira.”

¹⁷ Nimyapo no kanang o kapeylimwang na rana ni Yeso no nanao na. Maniring am, “Karwan nyo o peyraratenan nyo, ta yarana makeykai o yana katalamozong ninyo ni Ama ta do to.”

Rarahen ni Yeso o papat a mangahangahahap a tao

¹⁸ Mangonong si Yeso do pasalan no rako a meybebneng a ranom a ngaranan da Cyadidi am macita na o rarwa ka tao a mangahangahahap a ngaranan da si Pite a si Simong a kano kakteh na a meyngaran so Antele a amzoyo no tawaz da.

¹⁹ Maniring si Yeso jira am, “Macilolo kamo jyaken, ta nanawen ko inyo. So icyakma nyoy mangahahap a tao a mapanop so tao.”

²⁰ Mamizing da am to da rana ngaroi o tawaz da a macilolo ji Yeso.

²¹ Alikey pa o nyalaman na am macita na ni Yeso o anak na ni Sipitay a meyngaran so Yake a kano kakteh na si Yowani a kano ama da a si Sipitay a tomonod so nyayoma da tawaz do tatala da. Macita na sira ni Yeso am tawagan na sira.

²² Nimakeykai sira komaro do tatala da kano ama da a macilolo rana ji Yeso.

Mangiwakwak so ingingnen a kapangnanao na ni Yeso

²³ Nilivolivon ni Yeso o peycyeylilyan na do Cyadidi a kapangnanao na so tao do peyneynozyan da do dang a meylimwang no italamozong na ni Ama ta do to a kapangiwakwak na so meykeyngeyngen a tao do dang.

²⁴ So nipeyyamyamizngan da na do ngaran na ni Yeso do Sidiya. Am ori o nyangayan da no meykeyngeyngen a tao a kano kovotan no kalamsoyan ni Satan a tao a kano mamezamezay a tao a kano ji makapeygonagonay a tao. Nimimin da o akman sang a tao yangay do tangain na. So niteyteyhesan na sira niwakwakan so kataotao.

²⁵ Aro tao a nimapo do Cyadidi a kado Meykasa ngarnan a ili a kado Yelosaleng a kado aro a ili do katovangan no Yotan a ayo a nimacilolo ji Yeso.