Make 7 - Seysyo No Tao

Makdekdeng pa o Ciriciring na ni Ama ta do to a kano icicirawat no ineynapo ta

¹ O tao a macyagom do Vadisay a kano nimapo do Yelosaleng a mangnanao no iwawalam ni Ama ta do to am mangay sira do tangain ni Yeso.

² Macita da o macinanao ji Yeso a todangan a ji nimavanaw a ji nginara so tao a macyagom do Vadisay a mavanaw.

³ Ta sira rana o tao a macyagom do Vadisay a kano tao do Yotay am to da vangovangona o icicirawat da no ineynapo da. O icicirawat no ineynapo da am no ji mavanaw am jyangan.

⁴ O nisazangan a kanekanen am no ji ngoyasi am ji da nganna. So ikaro na pa dang no iwawalam da vangovangonen da do kowyas da do ininoman da kano kama da kano makakaday a kakakanan da.

⁵ Am ori o pacicyan da si Yeso no tao a macyagom do Vadisay a kano mangnanao so iwawalam ni Ama ta do to. Maniring sira am, “Ikongo da ji ngapi no macinanao jimo so icicirawat no ineynapo ta a yatodangan a yajya nimavanaw.”

⁶ Maniring si Yeso am, “O ciring na ni Isayya jinyo a yatanwasiwasi am manoyong saon am. Ta maniring am, ‘O aro a tao am da admadmain yaken no ciring da. Am onowned da am yameyparai jyaken.

⁷ Da ipanci o ciring no tao a ciring ko. So yana ikabo no peypeypangayan no da kararalay nyaken.’ ”

⁸ Maniring si Yeso am, “Nyo ikeykakza pa o icicirawat no ineynapo nyo a kano Ciriciring na ni Ama ta do to.”

⁹ Maniring pa jira am, “Yakamo tey mateneng a yatomaosya so Ciriciring na ni Ama ta do to, do yanyo kahahap so icicirawat no ineynapo nyo.

¹⁰ O ciring na ni Moyse jinyo am, ‘Ikaglaw nyo a ikanig o inyapwan nyo.’ Maniring pa am, ‘Omavay so inyapwan na am to rana wakwaka.’

¹¹ No kamo maniring am, ‘No amyan so tao a manci nya do inyapwan na so, O ipakan jinyo am yako ipeykingking ji Ama ta do to.’

¹² No si myan so akman sang am ji na rana pakana o inyapwan na.

¹³ O akman rana sang a icicirawat nyo am na rasain o Ciriciring na ni Ama ta do to. So yana ikaro pa no yakman sang a vazay nyo.”

Manoyong a raraten do tangain ni Ama ta do to

¹⁴ Lovoten ni Yeso o aro a tao do tangain na am maniring jira am, “Mamimin kamo a omamizing so ciring ko a kapakateneng nyo jya.

¹⁵ O isovo a kanen am ji mapeyraraten so tao. Ta o tomwaw a apo do onowned no tao am ori o mapeyraraten sya.

¹⁶ Amizngen nyo an, peyyanen nyo do onowned nyo ori an.”

¹⁷ Karwan na ni Yeso o aro a tao a somdep do sahad. Ori o nipacicyan da pa sya no macinanao jya do kanadnad no ciring na.

¹⁸ Maniring si Yeso jira am, “Kamo akman sira ori a yaji makateneng jya? Nyo jyatenngi o kaji na mapeyraratenan so tao no isovo a kanen?

¹⁹ Ta o isovo a kanen am jyangay do onowned na. Ta mangay do velek na a kapeywadwad na rana nya.” O peypeypangayan no ciring ni Yeso am ipanci na o kaji na mapeyraratenan so tao no isovo a kanen.

²⁰ Maniring pa am, “O mapeyraraten so tao am apo do onowned no tao a makowbot.

²¹ Ta o meytotwaw a apo do onowned a makakaday a raraten am ingingit na sya mangay mapeyvazay so kapanakaw na, kapanwakwak na,

²² kasagpyan na so aktokto, kapangagom na, kapangalalas na, kaji na apzatan do iwawalam na, kapanginanahet na, kapanamwad na, kapahama na so nakem na, kapamait na a meyraraten.

²³ O yamakakaday a raraten na ori am mamimin ori a apo do onowned no tao a mapeyraraten so tao do tangain ni Ama ta do to.”

Nakenakem no asa ka mavakes si Ama ta do to

²⁴ Karwan na do dang ni Yeso a kapeypangay na do macisngen do Tayar a kado Siton a ili a kasdep na do asa ka vahay, ta ji nakzan o kapakateneng da jya no tao. Am ji na pawaw o tao.

²⁵ Amyan so asa ka mavakes a kanakan a kovotan no kalamsoyan ni Satan. O ina na am mangay a meylilitod do tangain ni Yeso, ta nimamizing na o aro a vazay na.

²⁶ Sira o meyina am ji sira macikeylyan do tao do Yotay, ta meyvahay sira do Vongnise a macinapnap do Sidiya. So nipasyasi no ina na ji Yeso amvozwaw so kalamsoyan ni Satan a komovot do anak na.

²⁷ Maniring si Yeso jya am, “Panmanmahen o kabsoy so anak, ta malas o kawasik no kanen no anak do ino.”

²⁸ Maniring o mavakes am, “Manoyong ori mo Panirsirngen. Am o meycyakakas a kanen no anak am kanen ori no ino.”

²⁹ Maniring si Yeso jya am, “Yatey manoyong o ciring mo. So to mo rana angai, ta yarana nimavozwaw o kalamsoyan ni Satan a nikomovot do anak mo.”

³⁰ Makarahan am mangay rana o mavakes ang do vahay da. Makaranes am macita na rana o anak na miray do ireyrayan na, do mina kakaro na rana jya no kalamsoyan ni Satan.

Niwakwakan na ni Yeso o ji makabnebnek a ji makamizing a tao

³¹ Karwan na ni Yeso o ili a meyngaran so Tayar a kapangonong na do ili a meyngaran so Siton a nimapo do Meykasa ngarnan a ili a meypangay rana do rako a meybebneng a ranom a meyngaran so Cyadidi.

³² Makarahan am yai da no tao o ji makamizing a ji makabnebnek a tao do tangain ni Yeso. Ta ipanci da si Yeso a mapaopta so lima na jya.

³³ Makarahan am rarahen na do aro a tao a kapasyay na sya jira a kapasdep na so tanoro na do talinga na a kapeycicipa na kapalinas na sya do lila no tao ang,

³⁴ katangara na so hanit ni Yeso a omhangsak. Maniring do tao ori am, “Ivata.” O peypeypangayan na am, “Kacyangi rana.”

³⁵ Makarahan am jya nimeyyahahay a makamizing a makabnebnek.

³⁶ Maniring si Yeso do aro a tao am, “Ji nyo meycicicyan do tao.” Am ikeykavevek da no aro a tao a meylimwang nya.

³⁷ Abo ji navasavak a makamizing sya. Maniring sira am, “Yateywara o vazay na a yato makapeypapya so yamateleh a kano yaji makabnebnek.”