Make 3 - Seysyo No Tao

Niwakwakan na ni Yeso o meykazakazain so lima tao

¹ Somdep do peyneynozyan si Yeso am amyan dang so asa ka tao a meykazakazain so lima.

² Tatasa ka tao o amnakenakem so kapeykala da so karatan ni Yeso a iraherahet da sya. Am ori o niyan da do katangked na tomita so vazay na do kaskad da ji Yeso a mangiwakwak so tao do ipeywalam no tao.

³ Maniring si Yeso do meykazakazain so lima tao am, “Sijya do tangain ko.”

⁴ Makarahan am pacicin na sira o tomangay sya tao. Maniring am, “Ikongo o yata ahahapan sya do ipeywalam no tao. Manngwa, apyapya o kapanidong so tao an? No apyapya o kaji mamyayan so tao. Avyain sira an? No wakwaken sira.” Mamizing da no aro a tao am abo meyzezyak.

⁵ Marahet o matamata na ni Yeso a tomita so aro a tao. Am ikeyngen na sira no onowned. Ta akman sira so veysen so onowned so kacigcigzang. Maniring rana si Yeso do meykazakazain so lima tao am, “Zanet pala o lima mo.” Zaneten na am todapya rana.

⁶ Makowbot sira o tao a macyagom do Vadisay do peyneynozyan am meysirisiring rana sira kano Helotyan a tao do civtan da ji Yeso.

Aro a tao a komala si Yeso

⁷ Karwan na rana do dang ni Yeso a kano macinanao jya a mangay do rako a meybebneng a ranom a meyngaran so Cyadidi. Macita da sira no aro a tao am macihza sira. Sira rana am apo sira do Cyadidi a kado Yotay,

⁸ a kado Yelosaleng a kado Itomiya kado katovangan no ayo a meyngaran so Yotan a kano meyvahay do Tayar a kado Siton a ili. O yai da no aro a tao a omrapong si Yeso am mamizing da abo so jya peyvazay.

⁹ Ikongo do tey yaro sira o tao, am ori o nipancyan na no macinanao jya meykala so vazangay, ta ihawa na o aro a tao somlin sya.

¹⁰ Ikongo do tey yaro o tao a niwakwakan na, am ori o ikatey yaro no meyngen a tao a mai do tangain na a mangay minan jya.

¹¹ Macita da si Yeso no kovotan no kalamsoyan ni Satan a tao am meylilitod sira do tangain na kalololos da manci no, “Imo rana am Anak na imo no Tao do to.”

¹² Am ioya na sira ni Yeso a mapatwaw so kanoyong na Anak ni Ama ta do to.

Mamnek si Yeso so rarwa so ikakarwan (12) a amlivolivon no ciriciring na

¹³ Mangay do asa ka tokon si Yeso am lovoten na sira o nipamnekan na tao do tangain na. So nikamimin da amrapong sya.

¹⁴ Pamnekan na sira o rarwa so ikakarwan na (12) am abneken na sira amlivolivon no ciriciring na. Maniring jira si Yeso am, “Ko inyo nipamnekan a macikaop jyaken. So ko tovoyan jinyo a meylimwang no ciriciring ko.

¹⁵ So iyan na rana no oyowyat nyo a mamozwaw so kalamsoyan na ni Satan.”

¹⁶ Sira rana nipamnekan ni Yeso am si Simong. O nitoro na ni Yeso a ngaran na am si Pite,

¹⁷ a kano anak ni Sipitay a meyngaran so Yake a kani wari na meyngaran si Yowani. O ingaran na jira ni Yeso am Panici. O peypeypangayan na am akman so adey,

¹⁸ a kani Antele a kani Veydipo a kani Patolomaw a kani Matay a kani Tomase a kani Yake a anak ni Alevey a kani Tatay a kani Simong a macikagom do macioya do Loma a tao,

¹⁹ a kano tao do Isecyadi a meyngaran so Yota a nimanazang ni Yeso.

Yeso a kani Peysepo

²⁰ Makaranes do vahay da si Yeso am mangay pa malovot o aro a tao do tangain na. Am ori o ji da rana makakakani ni Yeso a kano macinanao jya do kasanga da nira.

²¹ Mamizing da o akman sang a vazay no inyapwan na kada wari na am naknakmen da o kangay da nya do vahay da. Ta mamizing da o ciring no tao a manci nya zomyak.

²² Maniring sira o apo do Yelosaleng a mangnanao no iwawalam ni Ama ta do to a tao am, “Beken a yana kovotan ya ni Satan a meyngaran so Peysepo? Am ori o yana to makavozwawi so kalamsoyan na ni Satan?”

²³ Makarahan am lovoten na sira ni Yeso o aro a tao do tangain na kapanci na nya jira so asa ka pehngehngayan na so ciring na a inanao na sira. Maniring jira am, “Jyabo kapamozwaw ni Satan so kalamsoyan na.

²⁴ No maciraherahet sira so panyokodan o asa ka mahataw am jyabo kapya da.

²⁵ No maciraherahet sira o asa ka vahay so nakem am mangay kapeyvwak da asa ka vahay.

²⁶ No si manoyong si Satan a masiraherahet so panyokodan am mangay kasakeb da.

²⁷ Abo tao a tondep a mangay tomakaw so apzapzatan na no makapya meykalokal a tao. No si myan saon so makavaod so meykalokal a tao am ori saon o ipakatakaw na so apzapzatan na am.

²⁸ “To ko na macitangayan jinyo am o makakaday a raraten a kano marahet a ciriciring no tao am todamimin pa ori a mavonas.

²⁹ Am o omraherahet so Seyzi na ni Ama ta do to am to rana meyyonong a akman sang a jyavonas. Ta o akman rana sang a raraten no tao am to rana meyyonong o akman sang.”

³⁰ O pancyan na no akman sang a ciring ni Yeso am amyan so tao a manci no kakovot da jya no kalamsoyan ni Satan.

Ina na ni Yeso a kada wari na

³¹ Makarahan am mai sira o ina na kada wari na a meytatanek do pantaw. Am ori o nipanara da so tao a manci nya ji Yeso so kanimai da a komala sya.

³² Maniring sira ji Yeso o macitangked jya tao am, “Sira amyan do pantaw sira ina mo a kada wari mo a yakomala jimo.”

³³ Maniring si Yeso am, “Sino o ina ko a kada wari ko.”

³⁴ Maniring a tomita so amlisna do siri na tao am, “Citahey kamo, ta sira rana ito am ina ko a kano kakakteh ko.

³⁵ Ta o mahap so vazay ni Ama ta do to a tao am abneken ko a kakteh ko a ina ko.”