Make 13 - Seysyo No Tao

Ipanci ni Yeso o kakavakava no rako a panaralayan

¹ Makowbot si Yeso a apo do rako a panaralayan am maniring jya o asa ka macinanao jya am, “Cita pala o yatey yapya da nyamaog no vato a panaralayan.”

² Maniring si Yeso am, “Nyo ikalak o yatey yapya so kamamaogan a vahay am mangay o kazdazday da so vato a yada nyamaog sya. So ikabo na rana no vato a mavezed do dang.”

Omanam a alalaw

³ Amyan si Yeso do tokon a meyngaran so Kanlan do katovangan na no rako a panaralayan. Omlisna si Pite a kani Yake a kani Yowani a kani Antele am pacicin da si Yeso.

⁴ Maniring sira am, “Si mango am makaranes o akman sang a vazay. Makongo so wanjin ori si makaranes.”

⁵ Maniring si Yeso jira am, “Azimanen nyo o littan da jinyo no tao.

⁶ Ta amyan so tao a amvood so ngaran ko a manci no ka Kizisto da a ilita da do aro a tao.

⁷ No mamizing nyo o meyyarap do livolivon no pongso nyo am ji kamo anyahey. Ta amyan so akman sang a vazay. Am beken a kavosan na ori no karawan.

⁸ Meyyarap sira o meytarek so itetngehan a kapeyyarap da no teyhesa ka mahataw. So iyan na no rako a kanini a kano abcil do karawan. Am ori rana am papwan na rana so kapakaranes na rana no alalaw do teyrahem.

⁹ “Azimanen nyo, ta rakpen da inyo a yangay do pacicicyan a kabakbak da jinyo do peyneynozyan, do kararalay nyo nyaken. So ikanoyong nyo a meylimwang no Mapasaray a Ciriciring na ni Ama ta do to do tangain da no panirsirngen a kano meymatmatngeh no teyhesa ka mahataw.

¹⁰ Am manmanma kapeylimwang na no Mapasaray a Ciriciring na ni Ama ta do to do tao do peycyamahamahatawan a kakavos na rana no karawan.

¹¹ No rakpen da inyo a yangay do pacicicyan am ji nyo a ratan o ciring nyo a ipasapa nyo jira. Ta sidongen na inyo ni Ama ta do to a mapasapa jira. Ta o ipasapa nyo jira am beken a monganay jinyo. Ta omaing do Seyzi na ni Ama ta do to a ciriciring a pasapahen nyo.

¹² No si marateng o araraw no nang am ipanazang da no tao o meysinogat a kakteh da a wakwaken no tao. So icyakman na sang no ama da do ananak da. O ananak da am ioya da sira o inyapwan da manci no kawakwak da sira no tao.

¹³ Pacioyyan da inyo a omraralay nyaken. Am o to ngotokot a jyahayo so nakem a omraralay nyaken am mahap da o to meyyonong a ikavyay no pahad da.

Tey manganyahey a alalaw

¹⁴ “Macita nyo o mapaoya a somazovaz si Ama ta do to a mangay da patneken do ji nyo mamyapyan a tankan na. (No vilangan nyo a ciring eya am to nyo na naknakma o peypeypangayan na.) No si marateng ori am o meyvahay do Yotay am mangay sira tomayo do takey.

¹⁵ So ji da ranandepi no tao do vahay da a mangap so apzapzatan.

¹⁶ O amyan do nihakawan da am ji rana ngoli a mangap so ayob da.

¹⁷ No marateng o araraw ori am to sira makasi o mamlis so kanen a kano mangahanas a mavakes.

¹⁸ Mapasyasi kamo ji Ama ta do to a kaji na makaransan no akman sang a vazay do ahemyan.

¹⁹ Ta o akman rana sang a alalaw do araraw am abo pa o akman sang no kamaog na so karawan ni Ama ta do to. So ikabo na no akman sang no makwa.

²⁰ No ji na pazikenkeni ni Ama ta do to o araraw no akman sang a alalaw do teyrahem am abo tao a mavyay. Am na kapakanakem so na nipamnekan a yamraralay nya a tao. Ori o na pazikenkenan do araraw no alalaw do teyrahem.

²¹ “No amyan so tao a manci nya jinyo so, ‘Oya do jya si Kizisto. Ori do kwang si Kizisto,’ am ji nyo nganoyngi.

²² Ta amyan so tao no makwa a manci no ka si Kizisto da kano malas so ipangnanao a tao. Sira rana am meyvazay sira so mapangyangyalak a vazay a ipeycyakawad da do nipamnekan na ni Ama ta do to a yamraralay nya tao.

²³ Azimanen nyo. Ta ko rana nipanmanma a ipanci jinyo o akman sang a vazay.

No mai o Nipamnekan na ni Ama ta do to a tao

²⁴ “No mavitos rana o aro a alalaw ori do araraw am to rana kedep o araw. Ji rana manikap o vehan.

²⁵ Makas rana o mata no hanit. Mablis rana o masamasaod no hanit.”

²⁶ No si marateng rana ori am meytotwaw ko rana a Nipamnekan na ni Ama ta do to a tao do cinalab a meygegcin no rako a oyowyat ko a kano azwazway ko.

²⁷ Pasonsonen ko o tinsi a mangay do peycyamahamahatawan a kalovot ko sira so nipamnekan na ni Ama ta do to a tao a apo do teyhesa ka mahataw.

Pehngehngain na o nanao na do kayo

²⁸ “To nyo na nita o voovoong no ovako a kayo. No to naod rana do yangayangaw na am to nyo na tenngi o ka teyteyka na.

²⁹ Akman sang an, ta no macita nyo o makakaday a alalaw do teyrahem am makeykai ko rana a mai.

³⁰ Manakem nyo an, ta amyan kamo pa tao sicyakwaya am makaranes rana o akman sang a vazay.

³¹ Mabalinas o hanit a kano teyrahem. Am jyablis o ciring ko a mangay do kaidan no karawan.

Abo tao a makateneng do araraw ang

³² “Am abo tao a makateneng do araraw no yai ko. Tana tinsi am ji da tenngi. Akman sang o Anak na ni Ama ta do to a ji makateneng jya. Ta si Ama ta do to o makateneng jya.

³³ Azimanen nyo. Yokain nyo o onowned nyo. Ta ji nyo a tenngi o ipakaranes no araraw ang.

³⁴ Akman so tao a mangay mangilili a tomoro no makakaday a vazay do lamlamsoy na peyvazain da a kapanci na rana no mangiwangiwang so pazevngen a lamlamsoy na a ji mapaitkeh so kataotao na.

³⁵ Am ori an ipeytataziman nyo. Ta ji nyo a tenngi o yai no mapeyvahay sya tao. Ala mai do maseyrem. Ala mai do avak no ahep. Ala mai do ikaraw na rana. Ala mai do peysibwen no tao.

³⁶ No si ji mapaziman a mai a kapakacita na jimo a mitkeh am jyabo kapya mo a.

³⁷ O yako ipanci jinyo am inyo a aro a tao o ko peycirngan sya. So ipeytataziman nyo!”