Loma 15 - Seysyo No Tao

Inarahen nyo si Yeso so nakenakem

¹ Yaten rana yamakdeng so onowned ji Ama ta do to am sidongen ta sira o yapa malma so onowned ji Ama ta do to, kabo rana no ikarahet da do vazay ta. Ta beken a kataotao ta o naknakmen ta.

² Manakem ta o kapasaray ta so akma tey kakteh do cinai. Ta ori o ikarapa do onowned da amraralay ni Ama ta do to.

³ Ta si Yeso Kizisto rana am beken a o kataotao na o manakem na. Akman so ciring do Seysyo. Maniring am, “O avavay da jimo no tao am mai jyaken.”

⁴ O ciriciring do Seysyo a yadomket am yamamimin a yana inanao jyaten ni Ama ta do to. O peypeypangayan no nang am ikait jyaten a meyhanhan ni Ama ta do to, kasaray ta amnanala so itoro na jyaten ni Ama ta do to.

⁵ Inaoy no si sidongen na inyo ni Ama ta do to a yapwan no sarasaray ta a yamapait so onowned ta. Inaoy no si inarahen nyo si Yeso Kizisto apiya so icicirawat a icyakma nyoy asa ka tao so onowned.

⁶ So ikalovot nyo a zomwazway si Ama ta do to a Ama na ni Yeso Kizisto a Panirsirngen ta.

Ipeylimwang do beken a tao do Yotay a Ciriciring na ni Ama ta do to

⁷ Makapya kamo so nakenakem do kadwan jinyo. Ta yakman sang si Yeso Kizisto a apya so nakenakem jyaten. Ta ori sarayan da ni Ama ta do to no tao.

⁸ Naknakmen nyo an, ta o na nyai ni Kizisto do teyrahem am sidongen na o tao do Yotay a makateneng do kanoyong na ni Ama ta do to a mangononong do mina ciring na do ineynapo da no kakwa pa.

⁹ O ikadwa na no na peypeypangayan no na nyai ni Kizisto am sidongen na inyo a beken a tao do Yotay a somaray no pangangasyan na ni Ama ta do to. Ta maniring do Seysyo am, “Ori o anoodan ko jimo a azwazwain a isaray do yanan da no beken a tao do Yotay.”

¹⁰ Maniring pa am, “Inyo rana beken a tao do Yotay am macizanod kamo do Isedi a tao a somaray an.”

¹¹ Maniring pa am, “Inyo rana beken a tao do Yotay am isaray nyo o Panirsirngen ta. Inyo rana a tao do teyrahem am azwazwain nyo si Ama ta do to.”

¹² Maniring pa si Isayya am, “Meytotwaw o sivovoong na no meyngaran so Yesi. Iya o meymatmatngeh no beken a tao do Yotay. Am ori o peyhanhanan da nya no beken a tao do Yotay.”

¹³ Inaoy no si itoro na jinyo o sarasaray na ni Ama ta do to. So ikanoyong nyo rana masaray so onowned a meyhanhan nya, do na kasidong jinyo no Seyzi.

Vazay ni Pawlo

¹⁴ Manga kakteh, ko anoyngan inyo a yapiya so yahahapan sya a yamateteneng a yamvavaga do kadwan jinyo.

^15-16 Am o teygami rana ya am ji ko na nayotaywa o ciring ko a inanao ko jinyo do yamakakaday a nyo pa jyataptap a vazay. Ta na nipamnekan yaken ni Ama ta do to a lamlamsoy na ni Yeso Kizisto a yameyvazay do beken a tao do Yotay. So yako ikakmey mapatanatanang so kingking a tao a yameylimwang no Mapasaray a Ciriciring na ni Ama ta do to. Inaoy no si akmey kingking sira o beken a tao do Yotay a isaray na ni Ama ta do to, ta niblis na rana no Seyzi o onowned da. So ikanoyong da rana abo so raraten do tangain na ni Ama ta do to.

¹⁷ Yako na macilovot ji Yeso Kizisto. Am ori o ko ikazway a yamahap so vazay na ni Ama ta do to.

¹⁸ O yamakdeng a yako ipanci am nioyatan na yaken ni Yeso Kizisto a yasomidong so beken a tao do Yotay a yaomanod ji Ama ta do to. Nisidong na yaken do makakaday a vazay a kano nipeylimwangan ko nya.

¹⁹ So nikowyat ko a mapeyvazay so mapeyzokab a vazay do kanimoyat na jyaken no Seyzi. Am ori o nipapwan ko sya do Yelosaleng a kangay na do Ididiko o yako peylimwangan no Mapasaray a Ciriciring na ni Kizisto.

²⁰ O ney kakza ko a angayan a meylimwang no Mapasaray a Ciriciring am do ji da pa nimakamizngi so monganay ji Kizisto a ili. Ta ko jyakzan o kapirwa ko so nyangayan da rana nimangnanao.

²¹ Ta maniring do Seysyo am, “Sira rana o jya nimakamizing pa sya am mamizing da rana. So ipakateneng da rana do manoyong a nanao.”

Naknakmen na ni Pawlo o kangay na do Loma

²² O yako jya nimangai a tomita jinyo do dang am ko ipeylimwang o ciriciring na ni Ama ta do to do yapa ji makasingkad ji Ama ta do to a teyhesa ka ili.

²³ Am ko na nipakavos o vazay ko do jya. So ko na yangay a tomita jinyo. Ta yako na mownay a yamnakenakem so kangay ko jinyo do dang.

²⁴ Am no si mangay ko rana do Sipanya pongso am mangay ko sazin inyo. Jyabo kaji ta narayan a makacita so kadwan jyaten a. Ala sidongen nyo pa yaken a meypangay do angayan ko.

²⁵ Am ko meypangay pa sicyaikwaya do Yelosaleng a somidong so yamraralay ni Ama ta do to a tao.

²⁶ Ta sira meykingking o kyokay do Maciton a kado Akayya so nizpi a yada isidong so abo so nizpi a sinjya do Yelosaleng.

²⁷ Ori rana am nakenakem da o kasidong da sira. Am manoyong o kasidong da so yamakasi a tao do Yotay. Ta o beken a tao do Yotay am macivonong sira do aryarilaw na ni Ama ta do to. Am ori o pantan da nira so isidong da so makcin a tao do Yotay.

²⁸ Si mateyka ko na itoro o kingking do sinjya do Yelosaleng am mangay ko na citahen inyo a kangay ko na do Sipanya.

²⁹ Ko katenngan, ta si mangay ko jinyo do dang am arako o sarasaray ta a itoro na jyaten ni Kizisto.

³⁰ Manga kakteh, ko pangozayan si Yeso Kizisto a Panirsirngen ta kano Seyzi a yamanta nyaten so pangarilawan ta. Inaoy no si ipeynozi nyo yaken.

³¹ Ipeynozi nyo yaken, a kaji da manaptan jyaken no ji manaralay a tao a meyvahay do Yotay, a kasaray da no sinjya do Yelosaleng a mahap so kingking a yako yangay jira.

³² No si apyahen na ni Ama ta do to am ori o ikasaray ko a mangay jinyo do dang a macigaga jinyo.

³³ Inaoy si macikaop jinyo si Ama ta do to a yamanta nyaten so ikapiya no onowned ta. Amin.