Ivoso 3 - Seysyo No Tao

Mangnanao si Pawlo do beken a tao do Yotay

¹ O peypeypangayan no ko iyan do pamemtengan am ko ipeylimwang no ciriciring na ni Yeso Kizisto jinyo a beken a tao do Yotay. Tana akman ko sang am yako jimtadan a meynozi ninyo.

² Nyo katenngan yaken a na nipamnekan ni Ama ta do to a yameylimwang nya jinyo so pangangarilawan na.

³ Na nipananao jyaken ni Ama ta do to o vazay na a jyatenngi no kakwa. So yako rana ipakateneng jya. So nipakalavatan ko na sya jinyo.

⁴ No si vilangan nyo o teygami ko eya am katenngan nyo rana ori a omaing ji Yeso Kizisto.

⁵ No kakwa am abo pa tao a nimapatwaw so nanao eya a omaing ji Kizisto. Am sicyaikwaya am na rana patwawen no Seyzi do nipamnekan na ni Yeso a omlivolivon no ciriciring na tao a kado mangononong so ciriciring na ni Ama ta do to.

⁶ O ji da nipatwaw a nanao na am na rana pazanoden o beken a tao do Yotay do meyngongyod a tao do Yotay a makahap so aryarilaw na jyaten ni Ama ta do to, do kanimakamizing nyo rana so Mapasaray a Ciriciring na ni Kizisto. So nyo rana icyakmey yasa so nakem a kano tao do Yotay a meyhanhan ni Yeso Kizisto a makahap so to meyyonong a ikavyay no pahad nyo.

⁷ Na nitenngan yaken ni Ama ta do to a lamlamsoy na a meylimwang no Mapasaray a Ciriciring na. Am pangangarilawan ni Ama ta do to a kano oyowyat na o yasomidong jyaken a yamahap so vazay na.

⁸ Tana mina saod na so kabo no kapsepsekan ko am na manket yaken a pahanhanen a meylimwang nya jinyo a beken a tao do Yotay so aglaglaw na jyaten ni Kizisto.

⁹ Na nipanta yaken so oyowyat ko a somidong so tao do karawan a makateneng do pamnemnekan na ni Ama ta do to a nimangamaog so karawan. Ta no kakwa pa am abo pa makateneng jya tao.

¹⁰ Ta na kakzeben ni Ama ta do to o kapakacita da sya no tinsi jyaten a yamraralay nya tao so apiya vazay na kano teneteneng na ni Ama ta do to.

¹¹ O na akmanan sang ni Ama ta do to am na pangozayan o to meyyonong a pamnemnekan na. Am na rana nipangononongan ni Yeso Kizisto a Panirsirngen ta.

¹² Am ori o ji ta na nyahei a mangay do tangain na ni Ama ta do to, do kapeyhanhan ta ni Kizisto.

¹³ Am ori an o ko pakotokotan pa sya jinyo. Taosya o kahaha nyo so nakem do iyan no alalaw ko. Ta o akman sang am isaray nyo o mina kapeylimwang ko no ciriciring na ni Ama ta do to jinyo.

Pangangarilawan na ni Kizisto

¹⁴ Am ori an, yako ipeylilitod a meynozi do tangain na ni Ama ta do to.

¹⁵ Sira rana o yamyan do teyngato a kano yapa amyan do teyrahem am mamimin sira akma ney anak ni Ama ta do to.

¹⁶ Ko ipeynozi ji Ama ta do to o kowyat na jinyo no Seyzi a meypakdeng so nakem ji Ama ta do to. Ta iya rana am yatey mowyat a yatey mazway a Tao do to.

¹⁷ Ori o ipakateneng nyo ji Kizisto a manoyong rana a yamacikaop jinyo a yatomalamozong ninyo. Ko ipeynozi inyo a mapayamot so pangangarilawan na do onowned nyo.

¹⁸ Ta ori o ipeyyangangay nyo a kano aro a akma nyoy kakteh do cinai a makateneng do mapeyzokab a pangangarilawan na ni Kizisto.

¹⁹ Tana yajyatenngi no tao o na pamanmandan no mapeyzokab a pangangarilawan na ni Kizisto am inaoy si meypahagnat kamo so nakem a makateneng do pangangarilawan na. No si makman kamo sang am manoyong kamo na a yanan no aglaglaw na jinyo ni Ama ta do to.

²⁰ Oyowyat na ni Ama ta do to am ori o yameyvazay do onowned ta a omoyat jyaten a meyhanhan nya. Ori o yata ipakahap so yamapeyzokab a ji tangtoktwan a vazay.

²¹ Inaoy si pangozayan ta a yamraralay ni Yeso Kizisto a tao o kato ta meyyonongan a zomwazway si Ama ta do to sicyaikwaya mangay do kaidan no karawan. Amin.