Ipaziman 3 - Seysyo No Tao

Nanao na so kyokay do Satise

¹ “Ipeyteygami mo o yamimong no kyokay do Satise. Si maniring ka am, ‘Yamaniring o na yanan no Seyzi na ni Ama ta do to a kano yapito a ka mata no hanit am: Ko katenngan o nyo kasasaodan. Ko katenngan o da kapanci ninyo no tao a yamahap so nanao ko. Am yaji meyngongyod o onowned nyo jyaken.

² Am ori o ipeytataziman nyo an. Ta komdeng kamo so nakem an, do yanyo ikavyay pa eya an. Ta ko katenngan o vazay nyo do tangain ni Ama ta do to a yapa ji makanet.

³ Am peyyanen nyo do onowned nyo o yanyo nimamizing a nanao ni Ama ta do to a kapangononong nyo jya a komaro do raraten nyo. No si ji kamo yokay am ji ko mapaziman a mai akman so manakaw a tao. Jyabo kapakateneng nyo do araraw no yai ko a.

⁴ Am yapa myan do Satise so yatatasa ka tao a yaji meylimoteng so onowned a yakman so ayob a manownaw. So ikanoyong da pehzahen ko jyaken do da katey yapya so nakenakem do tangain ko.

⁵ So icyakman da sang no jya nimablis so onowned a tao a peyyayoban ko so malavang a ayob. Ji ko ngopasa o ngaran da do vakong ko a yana adketan no ngarangaran da no na yanan no to meyyonong a ikavyay no pahad. Abneken ko sira do tangain ni Ama kano tinsi a monganay jyaken.

⁶ O ciring no Seyzi do peycyakyokyokayan na am amizngen nyo a yameycicilwan a tao an.’

Nanao na so kyokay do Veylatevey

⁷ “Ipeyteygami mo o yamimong no kyokay do Veylatevey. Si maniring ka am, ‘Yamaniring o yaji meylimoteng so onowned a tey manoyong am: Yaken rana am akman ko so panirsirngen a meyngaran so Tawey a yatomalamozong no kagi. So ikabo no tao a makaneb do niwangan ko. O yako nyaneban am abo makeywang jya.

⁸ Ko katenngan o kasasaodan nyo. Ko katenngan nyo kajyowyatan. Am nyo kapangononong do nanao ko a yaji mapasaklang jyaken. Ko na niwangan o yasa ka pazezevngen do tangain nyo. O ko niwangan a pazezevngen am abo rana tao a makaneb jya.

⁹ Citahen nyo sira o kalavongan ni Satan a yamanci no yada ka tao do Yotay a yamangalalas. Ipanci ko sira mai a meylilitod do tangain nyo a kapakateneng da na jyaken a marilaw ninyo.

¹⁰ Ta inyo rana am nyo pangononongan o ciring ko a yaji macizizikna jya. Am ori o apzatan ko jinyo no meydedna do karawan o alalaw a ileylamdam ko so tao do karawan.

¹¹ Ko na makeykai a mai. Am ori o ji nyo amtaji no kapangononong nyo do ciring ko an, a ji mamyapya no tao a mehes so azaw nyo a jyablis so onowned.

¹² O jya nimablis so onowned a tao am akman sira so sominogat a ai no vahay a ralaralayan da ni Ama ta do to a vahay a kaji da na ngarwan do dang. Ta padketen ko do kataotao da o ngaran na ni Ama ta do to a kano ngaran no ili na ni Ama ta do to. Ori rana am apo ji Ama ta do to do teyngato a nipakas na a Vayo a Yelosaleng a kapadket ko so vayo a ngaran ko do kataotao da.

¹³ O ciring no Seyzi do peycyakyokyokayan na am amizngen nyo a yameycicilwan a tao an.’

Nanao na so kyokay do Lawticya

¹⁴ “Ipeyteygami mo o yamimong no kyokay do Lawticya. Si maniring ka am, ‘Yamaniring o meyngaran so Amin a yatey manoyong a ipeyhanhan so ciring a yapwan no makakaday a na nyamamaog ni Ama ta do to am:

¹⁵ Ko katenngan o kasasaodan nyo. Ko katenngan inyo a mapeyhatay so onowned nyo. Am inaoy no si to kamo nangdeng so nakem.

¹⁶ Ta inyo rana am akman kamo so nikwat a ranom a yaji ngazidangdang a yajyarekmeh. So awwan ko ninyo.

¹⁷ Kamo maniring am, “Ko mabsoy a yabo so yakalakalahen.” Am nyo jyatenngi nyo katey makasi a tao a mavak so velek a nyo kavota a yabo so ayob.

¹⁸ Am ori o ko pancyan ninyo a manazang jyaken so ovay a keynakem nyo na, a kapanazang nyo so malavang a ayob nyo a payoben nyo do kataotao nyo kaji nyo a nasnekan, a kapanazang nyo so kosozi a ilinas nyo do mata nyo a kapakacita nyo na.

¹⁹ O ikarilaw ko a tao am miminen ko sira vavagan. Am ori o ipeypakdeng nyo so nakem a komaro do raraten nyo.

²⁰ Amizngen nyo yaken a meytatanek do pazezevngen nyo a mapaktoktow. No amyan so makamizing jyaken a keywang na do pazezevngen am somdep ko a kapacihanghang ko jya koman.

²¹ O jya nimablis so onowned a tao am ipanta ko so oyowyat na a kapacitangked na jyaken do lilisnan ko. So icyakman na jyaken sicyaikwaya a nimakata yamacitangked ji Ama do lilisnan na.

²² O ciring na no Seyzi do peycyakyokyokayan na am amizngen nyo a yameycicilwan a tao an.’ ”