Cyalatay 1 - Seysyo No Tao

¹ Yaken rana am si Pawlo ko. O yako ipeyngongyod a lamlamsoy na ni Ama ta do to am beken a tao o yaniomrara jyaken a omlivolivon no ciriciring na ni Ama ta do to, ta si Yeso Kizisto a kani Ama ta do to a nimapeyvangon si Yeso Kizisto o yanitomovoy jyaken.

² Yaken rana kano akma tey kakteh do cinai do jya am yanamen ipeyteygami inyo a peycyakyokyokayan na do Cyalatay.

³ Inaoy si itoro na ni Ama ta do to a kani Yeso Kizisto a Panirsirngen ta o pangangarilawan na kano ikapiya na no onowned nyo.

⁴ Si Yeso Kizisto am na pahawahen yaten do raraten do karawan. Am ori o na pangozayan do nakenakem na ni Ama ta do to a mawakwak no raraten ta.

⁵ Inaoy no azwazwain ta si Ama ta do to mangay do kaidan no karawan. Amin.

Abo ikadwa na no Mapasaray a Ciriciring na ni Ama ta do to

⁶ Ko ikeyngen inyo so onowned a yato ngaro do pangangarilawan na ni Ama ta do to a yanimamnek jinyo a nyo kahap so yamalas a nanao.

⁷ Am to ko na mancyan jinyo am abo o ikadwa na no Mapasaray a Ciriciring na ni Ama ta do to. Am da kapeykawaw jinyo no tao a komaro do manoyong a nanao ni Yeso Kizisto.

⁸ Am tana yamen a tana nimapo do teyngato a tinsi na ni Ama ta do to am no si macitarek a kano ninanao namen jinyo no kakwa o inanao da jinyo am manoyong akman sira ori a peydednan no peyoyaoyyan na ni Ama ta do to.

⁹ Nipanci namen rana jinyo no kakwa pa am yako ipanci pa jinyo am no myan so meylimwang nya jinyo so macitarek a nanao a kaji na meyyangayan a kano nimamizing nyo na no kakwa am manoyong o kapeydedna na jira no peyoyaoyyan na ni Ama ta do to.

¹⁰ Manngwa, ko kakzeben o kazwazway da jyaken no tao a kapanci ko no akman sang? Jyabo kakman na sang a. O ko ikakza am azwain na yaken ni Ama ta do to. Manngwa, ko ikakza o kazwazway da jyaken no tao? No ikakza ko o tao a omazway jyaken am beken a lamlamsoy na yaken ni Kizisto.

Si Yeso Kizisto o nimamnek ji Pawlo a amlivolivon no ciriciring na

¹¹ Manga kakteh, to ko na macitangayan jinyo am o ko ipeylimwang jinyo a Mapasaray a Ciriciring na ni Ama ta do to am beken a nimyapo do tao.

¹² Yabo yasa ka tao a ko nipacyamizngan a ko nipacinanawan so Mapasaray a Ciriciring na ni Ama ta do to. Ta si Yeso Kizisto o mina to manci rana nya jyaken.

¹³ Nyo katenngan o iwawalam ko no kapacibedbed ko pa do anodan namen a tao do Yotay. Ta tey makdeng ko a mapakakasi so amraralay ni Yeso Kizisto a tao. Naknakmen ko o kawakwak ko sira.

¹⁴ Makdekdeng ko pa kano kapalangayan ko a tao do Yotay a mahap so iwawalam namen do anodan namen a tao do Yotay. Tana nanao da no ineynapo namen no kakwa am akman sang, ta tey makdeng ko a mangozay jya.

¹⁵ No kaji ko pa nimatazakan a tao am nipamnekan na rana yaken a mahap so vazay na ni Ama ta do to, do karilaw na nyaken.

¹⁶ Nipacita na jyaken o Anak na. Am ori o nipakateneng ko do Mapasaray a Ciriciring na ni Kizisto a ipeylimwang do beken a tao do Yotay. So ikabo no tao a nipacyamizngan ko.

¹⁷ Yako ji nimangay do Yelosaleng a macyamizing do nimanmanma pa ka nyaken a amlivolivon no ciriciring na ni Ama ta do to a tao. Ta nimangay ko do Alapo a kapeysinaoli ko na mangay do Tamaseke.

¹⁸ Ikatlo na kawan am mangay ko ji Pite do Yelosaleng a macivahay jya so makalima so icyarwa (15) so araraw.

¹⁹ So ji ko nimakacitai so karwan da nipamnekan na ni Yeso Kizisto a amlivolivon no ciriciring na. O wari na ni Yeso a Panirsirngen ta a meyngaran so Yake o nimacita ko. So ji ko nimakacitai so karwan da a nipamnekan na ni Yeso Kizisto a amlivolivon no ciriciring na.

²⁰ Yabo o yamalas do teygami ko ya a ciring ko. Pacyanoyngan na yaken ni Ama ta do to.

²¹ Meyratateng am mangay ko na do Sidiya kado Cidicya.

²² No kano nang am ji da pa nimacita yaken no sinjya do Yotay.

²³ Kapakamizing da jyaken a yameylimwang rana no ciriciring na ni Kizisto a nimacioya jya no kakwa pa.

²⁴ Am ori o yada rana sarayan ya ni Ama ta do to, do yako kapamlis rana a meylimwang no ciriciring na ni Yeso Kizisto.