2 Pite 1 - Seysyo No Tao

¹ Yaken rana am si Simong Pite ko a nipamnekan na ni Yeso Kizisto a amlivolivon no ciriciring na a lamlamsoy na. Yako ipeyteygami inyo a yana rana nipatazadang ni Yeso Kizisto a Tao do to ta. Ta tamo na meyyangay a yamraralay ni Yeso, do kaji na mapeycyakabanan jyaten ni Ama ta do to.

² Inaoy si itoro na ni Ama ta do to a kani Yeso a Panirsirngen ta o pangangarilawan na kano ikapiya no onowned nyo, do yanyo kanoyong a yarana makateneng ji Ama ta do to a kani Yeso Kizisto.

Vazay no omanoyong ji Yeso a tao

³ Na rana nipazanod yaten ni Ama ta do to no oyowyat na, akma ney anak do karawan. Am ori o ji tamo meylimotengi so onowned do araraw. O tamo ipakahap so sang am yaomagaz do tamo rana kapakateneng ji Ama ta do to a yanimapanop jyaten a yamapazanod jyaten do inawan na kano azwazway na ni Ama ta do to,

⁴ do na kapangononong do mina ciring na jyaten. Ori o ikanoyong nyo a komaro do ikeykakza nyo a monganay jinyo a tao do karawan a macikaop rana ji Ama ta do to a ji meylimoteng so onowned.

⁵ Ori o ikowyowyat nyo pa mapeypahagnat so nakem ji Ama ta do to. Ta ori o ikapya na no icicirawat nyo. Meypahagnat kamo so aktokto. Ta ori o ipakazab nyo so nakenakem na ni Ama ta do to.

⁶ Apzatan nyo o onowned nyo do icyatatao nyo. Meypahagnat kamo so onowned a ji mapeyyan do onowned nyo so makakaday a alalaw. Ta ori o ikakdeng nyo rana so nakem a amraralay ni Ama ta do to.

⁷ Makakdekdeng kamo pa omraralay ni Ama ta do to a marilaw no akma nyoy kakteh do cinai. Inarahen nyo si Ama ta do to so pangarilawan a marilaw no aro a tao.

⁸ Mamimin ori a ahapen nyo. Ta ori o iyan no peypeypangayan no kararalay nyo ni Kizisto, do kapakateneng nyo rana ji Yeso Kizisto a Panirsirngen ta.

⁹ O ji mangononong do akman sang a vazay a tao am akmey mavota, do kato na rana makahamangan do mina kavonas na rana no raraten na no kakwa.

¹⁰ Ori an manga kakteh an, ipakowyowyat nyo pa a mapeyyan sya do onowned nyo so mina kapamnek na jinyo ni Ama ta do to. Ta no si akman kamo sang am jyabo kapeyparai nyo ji Ama ta do to a,

¹¹ a macikaop rana do to meyyonong a italamozong na ni Yeso Kizisto a Panirsirngen ta a mapatazadang jyaten do teyngato.

¹² Tana nyo na katenngan o yamakakaday a vazay eya a yarana mapeyyan so nanao na ni Ama ta do to do onowned nyo am ko ji macimazai o ko kapaziman jinyo.

¹³ Do ko iyan pa do karawan am jyabo kapacimaza ko jinyo a vavagan a peyparakwen so nakenakem a.

¹⁴ Ko na makazazap o kakeykai na rana no kataotao ko a komaro do karawan, do kanimapaziman na rana sya jyaken ni Yeso Kizisto.

¹⁵ Jyabo o kapacimaza ko do yamakakaday a nanao na ni Ama ta do to a ipamizing jinyo a, a kaji nyo rana makahamangan jya, do italikan ko rana do karawan.

Nimacita da o azwazway ni Yeso Kizisto

¹⁶ Beken a namen to mangamaog so kavavatanen a namen ipamizing jinyo a yamanci no keypirwa na mai ni Yeso Kizisto a yatey mowyat a Panirsirngen ta. Ta manoyong o kanimakacita namen sya a tey mazway a Tao do to.

¹⁷ No kapeydedna na so azwazway ni Ama ta do to ji Yeso Kizisto am nimyan namen do dang. Nimapo do teyngato o ciring na ni Ama ta do to. Maniring am, “Iya rana am Anak ko ya a yako ikaglaw.”

¹⁸ Manoyong o kanimakamizing namen so ciring na ni Ama ta do to a apo do teyngato no kapacihza namen ji Yeso no keyyan namen do tokon.

¹⁹ Ori o yanamen ji palasi so ciring a yada ipeylimwang no panoyonoywan na so ciring ni Ama ta do to a tao. So pakamyamizngan nyo pala so ciring ang. Ta ori rana am yakmey zampo ori a yatomiray so kasarisaryan, mangay do idada na rana no araw do madagdag. So icyakman na sang si Yeso a omzezak so onowned nyo a mangay do araraw no yai na rana.

²⁰ O ney makdeng na am ji nyo to ngonongonongi a pehtawen o ciring no panoyonoywan na so ciring ni Ama ta do to do Seysyo.

²¹ Ta o ciring no panoyonoywan na so ciring ni Ama ta do to a tao am beken a monganay jira. Ta o oyowyat no Seyzi o nisomidong sira. So ikanoyong no ciring da apo ji Ama ta do to.