2 Kedinto 4 - Seysyo No Tao

¹ Yamanoyong si Ama ta do to a yamarilaw nyamen do na kapahanhan jyamen do vazay na. Ori o namen rana jyaraci nya so onowned.

² Namen ji ngapa o macimanig a vazay. Namen ji mangalalas. Namen ji palasa o ciriciring na ni Ama ta do to, ji powziba o nanao ni Ama ta do to. Ta ipacita namen do tao o icicirawat namen, do kanoyong namen a lamlamsoy na ni Ama ta do to.

³ No myan so ji makateneng do Mapasaray a Ciriciring a ipeylimwang namen am o ji manaralay a tao saon o ji makateneng jya.

⁴ Da ji nganoyngi no tao, ta yana bengbengen ni Satan o onowned da no yaji manganoyong a tao. Am ori o da ji makatenngi do peypeypangayan no Mapasaray a Ciriciring na ni Ama ta do to a yaomagaz do azwazway na ni Yeso Kizisto. Ta si Yeso Kizisto rana am ta nipakacita rana si Ama ta do to.

⁵ Beken a kataotao namen o namen ipeylimwang, ta namen ipeylimwang si Yeso Kizisto a manoyong a Panirsirngen ta. O namen sidongan jinyo am lamlamsoy na yamen ni Yeso Kizisto.

⁶ O nimangamaog no ciring na so zezak a Tao do to am ori o amzezak so masyonowned ta. Ori o ta ipakateneng do azwazway na ni Ama ta do to amyan ji Yeso Kizisto.

⁷ Am yamen rana am katonodan namen o nyamaog no tana vanga a maspispi. Am o maoran do onowned namen a ciriciring na ni Ama ta do to am tey makdeng. So ikabeken a yamonganay jyamen no oyowyat a meylimwang nya, ta monganay ji Ama ta do to.

⁸ Namen masangib a makasazi so alalaw am namen ji pehmai. Tomakatakaw am namen kaji makatenngan do namen ahahapan sya am ji namen a mahayo.

⁹ Yaro tao a macioya jyamen am yamyan so tao a marilaw nyamen. No to namen jyangangay so inawan a pakakasyan da am ji namen a wakwak.

¹⁰ Namen masangib a yatoda jyangangay so inawan akman si Yeso Kizisto a nipamnekan da a limanen, do yanamen kapeylimwang ni Yeso Kizisto a yapa mavyay a Tao do to.

¹¹ O ikakman na sang am yamonganay ji Yeso Kizisto o yapwan no inawan namen.

¹² Tana masangib namen a toda jyangangay so inawan am cyaha, ta ipakasidong namen jinyo a makahap so to meyyonong a ikavyay no pahad nyo.

¹³ Ta maniring do Seysyo am, “Ko anoyngan si Ama ta do to an. Am ori o ko peylimwangan nya.” Namen akman so sang a meyhanhan nya. Am ori o namen peylimwangan nya.

¹⁴ Namen katenngan o yanimapeyvangon si Yeso a Tao do to a mapeyvangon jyamen akman si Yeso a kamimin ta na macikaop jya do teyngato.

¹⁵ Monganay jinyo o alalaw namen a ipakasidong namen jinyo a peypahagnaten so nakenakem ji Ama ta do to. So na ikanoyong no pangangarilawan na ni Ama ta do to a itoro na do aro a tao. Am ori o ikarwaro rana no tao a zomwazway si Ama ta do to a isaray da.

¹⁶ Am ori an, namen jyaraci nya so onowned. Tana ji namen a ngahay a yameypararakeh am yamangday do araraw o onowned namen a yameypahagnat.

¹⁷ O yaji meyyonownay a alalaw namen eya am ipakahap namen so maharahara pa, a to meyyonong a azwazway namen ji Ama ta do to.

¹⁸ Namen jyakzan o macimalag do mata namen a monganay do karawan. Ta namen ikeykakza o yajyacita no mata. Ta ori rana am ji meyyonownay ori. Am o yajyacita no mata am to meyyonong ori.