2 Kedinto 1 - Seysyo No Tao

¹ Yaken rana am si Pawlo ko a lamlamsoy na ni Ama ta do to a yana nipamnekan ni Yeso Kizisto a amlivolivon no ciriciring na. Yaken rana kano akma tey kakteh do cinai si Timotay am namen ipeyteygami inyo a Kedinto kyokay a kazagoman nyo a sinjya do Sila.

² Inaoy si itoro na ni Ama ta do to a kani Yeso Kizisto a Panirsirngen ta o pangangarilawan na kano ikapiya no onowned nyo.

Isaray na ni Pawlo si Ama ta do to a nisomidong sya

³ Isaray tamo ji Ama na ni Yeso Kizisto a Panirsirngen ta. Ta iya rana am yamanoyong a yamarilaw nyaten a yana yapwan no makakaday a mapasaray so tao.

⁴ Na sidongen yamen do aro a alalaw namen. So ikanoyong namen a mangozay do pangangarilawan na a marilaw no makasazi so makakaday a alalaw da tao.

⁵ Tana arako alalaw a mai jyamen do kahap namen so vazay ni Kizisto am cyaha, ta ikarakorako no sidongan na jyamen ni Kizisto.

⁶ No makasazi namen so alalaw am cyaha, ta ipeypapya nyo. Ta no sidongen na yamen ni Ama ta do to am akman namen sang a somidong jinyo a mapait jinyo, kapeypakdeng nyo rana so nakenakem a akman jyamen a to nazibo no alalaw.

⁷ Am ori o namen peyhanhanan ninyo a jyagogad so onowned. Ta namen katenngan inyo a yamacizanod jyamen so alalaw. So icyakman nyo sang a macizanod do sarasaray a itoro na jyaten ni Ama ta do to.

⁸ Manga kakteh, ko kakzeben inyo a makateneng do alalaw namen no keyyan namen pa do Yasiya pongso. Ta teywara o mina alalaw namen. Ori o ji namen ngatatai do kavyay namen.

⁹ O nakenakem namen rana do onowned namen am to namen anoyngi o kawakwak namen. O peypeypangayan no nang am ipakateneng namen do kaji namen meyhanhanan no kataotao namen. Ta si Ama ta do to o ipeyhanhan namen a mamyay so nimawakwak a tao.

¹⁰ Na nipahawa yamen do yamakakaday a kanginanawan namen. So namen peyhanhanan ni Ama ta do to a somidong jyamen a mangay no makwa.

¹¹ No si ipeynozi nyo yamen am jyabo kaji na nidongan jyamen ni Ama ta do to, do kamizing na so inozi nyo jyamen. So sarayan da no akman sang ji Ama ta do to no aro a tao.

Ablisan ni Pawlo o nipamnekan na vazay a mangay do Kedinto

¹² Namen isaray o na kapeypalanginan no nakenakem namen ni Ama ta do to do karawan. Am beken a teneteneng namen ori, ta namen pangozayan o teneteneng na kano pangangasyan ni Ama ta do to. Akman sang o na katey yapya no nakenakem ta so kadwan jyaten.

¹³ Ta o namen nivatvatkan a ciring jinyo am o yanyo katenngan a vilangan. So namen kakzan ninyo a makateneng do vazay namen,

¹⁴ a kapiya na rana no nakenakem nyo jyamen. No si akman sang do araraw no yai na ni Yeso a Panirsirngen ta am jyabo kaji nyo azwayan jyamen a. So ikakman namen sang a zomwazway jinyo.

¹⁵ Am ori o ko naknakman so keypirwa ko a mangay jinyo do dang. So ikanoyong nyo a ipidwa somaray.

¹⁶ No si meypangay ko do Maciton am ko pinanakman o kapanmanma ko a mangay jinyo do dang. No si meysinaoli ko am mangay ko pa jinyo. Ta sidongen nyo yaken a mangay do Yotay.

¹⁷ Manoyong o kanimamnek ko jya am ji ko nimangay. Manngwa, ipanci rana o akman sang a mabliblis so nakem? No katatay ko do akman sang a vazay ko am manngwa, ko to ngonongonongi o onowned ko a manci no ka noon ko sya, ka beken ko sya?

¹⁸ Am beken a akman so nyo ipanci. Ta o ipanci ko jinyo a ciring am beken a yameyveyvalyat. Ta si Ama ta do to a ko anopen am yabo na kalasan.

¹⁹ Akman sang o Anak na ni Ama ta do to a si Yeso Kizisto a yanamen nipeylimwang jinyo si Sila kani Timotay. Ta jyabliblis o ciring na. Ta o nipatwaw na rana ni Yeso a ciriciring na ni Ama ta do to am pangononongan na a peyvazain.

²⁰ Ta na rana nipangononongan o aryarilaw na jyaten ni Ama ta do to ni Yeso Kizisto. Am ori o icyakma tey asa so onowned a manci no Amin a zomwazway si Ama ta do to.

²¹ O yamapait jyamen a ka ninyo a yakomdeng so nakem ji Yeso am si Ama ta do to. Nipamnekan na yaten a lamlamsoy na.

²² So na nitorwan nya jyaten so Seyzi a omoyat do onowned ta. O Seyzi rana am tovil no kanoyong ta a monganay jya tao. Ta o Seyzi rana am akma ney yongkad no makakaday a omanam a itoro na jyaten ni Ama ta do to.

²³ Ko tawagan si Ama ta do to a macingosongoso nyaken. No si mangalalas ko am cyaha, ta pasingsingkadan na yaken. Ori o to ko na manci no kaji ko nangayan do Kedinto a omwoya ninyo. Ta manakem ko o kapamlis nyo pa.

²⁴ Beken a namen gacigatan inyo a manganoyong, ta yakamo na makdeng so nakem ji Ama ta do to. So namen kagagan ninyo a pacivazayan do namen kapasaray jinyo.