1 Tesalonicya 5 - Seysyo No Tao

Pazimanen o kapeygegcin na ni Yeso

¹ Inyo rana akma koy kakteh do cinai am o ipakaranes no ipeygegcin ni Yeso am ji ko to mancyan jinyo do teygami ko,

² ta to nyo na tenngi. O araraw no ipeygegcin na ni Yeso am abwata o tao a makaziman sya, akman so tao a ji makaziman so manakaw do vahay da.

³ No si maniring o tao am, “Cyaha, ta tanyo apiya,” am jyakman sang, ta jyaziman o alalaw a makaranes a ombalinas sira, akman so meyrehrehmet a mavakes a ji rana makatayo do alalaw na.

⁴ Am manga kakteh, beken a kamo amyan do kasarisaryan a ji makaziman so araraw no yai ni Yeso, akman so tao a ji makaziman so manakaw a tao do mahep.

⁵ Am inyo rana am kamo amyan rana do kazngangan, do nyo kapakaziman rana sya.

⁶ Ori o ji ta to nginarai so karwan no tao a to ngitkeh, ta meytataziman ta.

⁷ Ta o itkeh no tao am mahep. O ikasaki no tao am mahep.

⁸ No ta manoyong amyan do kazngangan am meytataziman ta an. O nakenakem ta ji Ama ta do to a kano pangangarilawan na am akma tey sirong. Akma tey sakop o jyagonay a onowned ta a mapanala sya mahap jyaten do teyngato. So ikabo rana no oyaoyyan na nyaten.

⁹ Ta o na nipamnekan jyaten ni Ama ta do to am beken a mangay na ioya nyaten. Ta ahapen na yaten do kapyapyan. Ori o mina vazay na no Anak na si Yeso Kizisto a Panirsirngen ta.

¹⁰ O nikawakwak na ni Kizisto am ahapen na yaten do kapyapyan. Am ori an, tana do ta ika mavyay pa ya a tana do ikawakwak ta rana am no si mai si Yeso am macikaop ta na jya a mangay do kaidan no karawan.

¹¹ Am ori o ipasipapait nyo a mapamizing so kadwan jinyo, akman so yapiya nyo ahahapan sya sicyaikwaya.

¹² Namen ipacimeseseg jinyo manga kakteh am ikanig nyo pa sira o meyyapwaponged no kyokay a nipamnekan na ni Ama ta do to. Ta sira rana am da vavagan inyo no icicirawat no omraralay ni Yeso Kizisto.

¹³ So karilawan nyo nira ahapen so vazay an. Makapiya kamo so nakenakem do kadwan jinyo an.

¹⁴ Yanamen ipanci pa jinyo manga keypong am pazimanen nyo sira o malelma a tao an, a kapait nyo so mahayo so onowned a tao, kasidong nyo so jyakdeng so nakem ji Ama ta do to. Tana apiya so ahahapan sya, tana marahet so ahahapan sya tao am to nyo peyyangaya o nakenakem nyo sira.

¹⁵ Azimanen nyo an. Ji nyo patonggali o macioya jinyo a tao an. O kapasicyakarilaw nyo. O tey kakza da vazay no icyatatao nyo am peyvazain nyo.

¹⁶ O kasaray nyo.

¹⁷ Ji kamo amtad a meynozi.

¹⁸ Tana apya, tana marahet o masapa nyo am o kasaray nyo ji Ama ta do to. Ta ori rana am nakenakem na jinyo ni Ama ta do to a omanod ji Yeso Kizisto a tao.

¹⁹ Ji nyo nengsengi o vazay no Seyzi.

²⁰ Ji nyo ngolala o ipanci da no meylimwang no ciriciring na ni Ama ta do to.

²¹ Am pakanaknakmen nyo o nimamizing nyo a nanao da jinyo a kownot nyo do manoyong a nanao an.

²² Peymakarwan nyo o peyraratenan nyo do teyrahem.

²³ Ko ipeynozi inyo ji Ama ta do to a yamanta ninyo so apiya nakenakem nyo a kapzat na do onowned nyo a kano pahad nyo a kano kataotao nyo. So ikanoyong na amzat jinyo a kabo no karatan nyo a mangay do ikeypirwa na mai ni Yeso Kizisto a Panirsirngen ta.

²⁴ Si Ama ta do to rana a yanimamnek jinyo a omanoyong jya am yatey manoyong a makasidong jinyo.

²⁵ Inyo akma nameney kakteh do cinai am ipeyneynozi nyo yamen an.

²⁶ Masicyakarilaw kamo a meyminaminasi no kadwan jinyo.

²⁷ Yako pangozayan o ngaran na ni Yeso a manci no kavilang nyo do teygami ya a ipamizing nyo so akma nyoy kakteh do cinai.

²⁸ Inaoy si itoro na ni Yeso Kizisto a Panirsirngen ta o pangangarilawan na jinyo.