1 Tesalonicya 2 - Seysyo No Tao

Vazay na ni Pawlo do Tesalonicya

¹ Manga kakteh, nyo katenngan an, ta no kangay namen jinyo do dang am apiya o vazay namen, ta aro o niomanoyong ji Yeso Kizisto a tao.

² Nyo katenngan an, ta no kaji namen angayan pa jinyo do dang am amyan rana so alalaw namen do kapeymetdeh da jyamen do Veydipi a ili. Am na mina kapanta nyamen so oyowyat ni Ama ta do to. So namen jyanyahei no meykamadadayan a da izazat jyamen a yameylimwang no Mapasaray a Ciriciring na ni Ama ta do to jinyo.

³ Yabo o yamalas a nanao namen jinyo. Abo o nanao namen a ilita namen jinyo.

⁴ Ta o yana nipamnekan jyamen ni Ama ta do to am na meypakemkemen jyamen o kapeylimwang namen no Mapasaray a Ciriciring na. Am ori o ji namen mapatareki so ipanci namen a komagkaglaw so icyatatao namen. Ta o makateneng do onowned no tao a Tao do to am iya ori o namen pasarain no vazay namen.

⁵ Nyo katenngan yamen a yaji manlita so tao no ciriciring namen. So na ikabo no yamarahet a aktokto namen. Ta si Ama ta do to am yongkad namen a manoyong so ipanci.

⁶ Tana nipamnekan na yamen ni Kizisto a omlivolivon no Mapasaray a Ciriciring na am namen ji ngakdaya o kazwazway da jyamen no tao. So ji namen ngakdai jinyo a kano karwan no tao a zomwazway jyamen.

⁷ Am no kapacikaop namen pa jinyo am apiya namen so nakem jinyo, akman so inyapwan a mavakes a omazwazovo so minapodpod jya.

⁸ Namen hapen do namen karilaw ninyo. Ori o namen sarayan no kapeylimwang namen nya jinyo no yanimapo ji Ama ta do to a Mapasaray a Ciriciring na. Mangay do inawan namen o namen ji beywani jinyo. Ta inyo rana am namen tey kaglaw.

⁹ Manga kakteh, naknakmen nyo o zikna namen do maraw a kano mahep an, do namen kalan so isovo namen a kanen. Ta namen ji myapya inyo a mazikna nyamen no isovo namen a kanen no kapeylimwang namen nya jinyo so Mapasaray a Ciriciring na ni Ama ta do to.

¹⁰ No kapacikaop namen pa jinyo do dang am o ciriciring namen a kano icicirawat namen am apiya macita nyo. Abo o malas a vazay namen. Cyaha, ta inyo a kani Ama ta do to am yongkad no vazay namen ang.

¹¹ Nyo katenngan o nakenakem namen jinyo. Ta yakman so inyapwan a mahakay a amvavaga do minapodpod jya,

¹² a yajimtad a yamnanao jinyo a yamapait so onowned nyo a yamapadnadna so nakem nyo. So ikanoyong nyo a isaray na ni Ama ta do to. Na nipamnekan inyo a macizanod do oyowyat na kano azwazway na.

¹³ Namen masangib a yasomaray nya ji Ama ta do to. Ta o namen nipeylimwang a ciriciring na am nyo na nimamizing. Nyo na nimahap. So nyo ji mancii nya ciring no tao, ta nyo anoyngan ori a ciriciring na ni Ama ta do to. Ta o ciring ori am yaomoyat do onowned nyo a yarana omanoyong ji Yeso Kizisto.

¹⁴ Manga kakteh, o alalaw nyo a kano alalaw da no aro a kyokay do Yotay am alalaw da ori no omanod ji Ama ta do to a tao. Ta o iraherahet da jinyo no keylyan nyo am akman so sang o iraherahet da so aro a kyokay no tao do Yotay.

¹⁵ Sira rana tao do Yotay am niwakwak da si Yeso a Panirsirngen ta kano aro a panoyonoywan na so ciring ni Ama ta do to a da kavozwaw pa jyamehen. So da ikanoyong a yameyraraten do tangain na ni Ama ta do to. So icyakma dey kavosoyan no tao do karawan.

¹⁶ Yada zazaten yamen a yameylimwang no ciriciring na ni Ama ta do to a mapatazadang so beken a tao do Yotay. So da ikanoyong a yameyparo so yapeyraratenan a peydednan no peyoyaoyyan na ni Ama ta do to.

Naknakmen ni Pawlo o kangay na tomita so kyokay do Tesalonicya

¹⁷ Manga kakteh, tana yapa jyownay o namen nikaro jinyo am namen ikapaw inyo. Tana namen ji macikaop jinyo am cyaha, ta yamacikaop jinyo o onowned namen. Inaoy no si mirwa namen pa makacita inyo.

¹⁸ Namen ikakza o namen kangay pa jinyo do dang. Ko masangib a yamnakenakem so yako kangay jinyo do dang am na kazazat jyamen ni Satan.

¹⁹ Ta inyo o hanhan namen a yamapasaray jyamen. Si meygegcin si Yeso Kizisto a Panirsirngen ta am sino o ipakazwazway namen no jya inyo.

²⁰ So ikanoyong nyo a pacikazwazwayan namen a isaray namen.