1 Pite 1 - Seysyo No Tao

¹ Yaken rana am si Pite ko a lamlamsoy na ni Yeso Kizisto a nipamnekan na a omlivolivon no ciriciring na. Yako ipeyteygami inyo a yana yaponged ni Ama ta do to a nikomaro do ili nyo a yameyvahay do Pento a kado Cyalatay a kado Kapatocya kado Yasiya kado Potiniya.

² Nakenakem na ni Ama ta do to o yana kanimapanop jinyo a omanoyong ji Yeso. So yanyo ikanoyong rana a yana nyavayo no Seyzi so onowned a yaomonot ji Yeso Kizisto, do kanimvonas na so raraten nyo no rala na. Inaoy si arakorako pa o pangangarilawan na kano apiya onowned nyo a itoro na jinyo ni Ama ta do to.

Nakem na jyaten ni Ama ta do to do teyngato

³ Isaray takamo si Ama ta do to a Ama na ni Yeso Kizisto a Panirsirngen ta. Ta yatey rako o pangangasyan na a yanimanta nyaten so vayo a onowned ta, do yana kanimapeyvangon si Yeso Kizisto do heseb na. So anoyngan ta do akman sang a oyowyat ni Ama ta do to a mapeyvangon jyaten no makwa.

⁴ So tamo ikanoyong a yaomamoon so peymeymasaodan na ni Ama ta do to a omanoyong jya tao. To meyyonong o itoro na jinyo do teyngato ni Ama ta do to.

⁵ Ori rana am itoro na ni Ama ta do to do meyhanhan nya tao, do kapzat na jira ni Ama ta do to no oyowyat na a kaji da na vozawan a mangay do ikarateng no araraw no ipatazadang na sira do teyngato.

⁶ Ori o sarayan nyo nya an. Tana yaro pa o alalaw nyo sicyaikwaya am cyaha, ta ji meyyonownay o akman sang a mavitos.

⁷ O peypeypangayan no alalaw nyo am ipakateneng jinyo a manoyong so nakem ji Ama ta do to. Mapaonag no apoy o ovay. Am o nakenakem nyo ji Ama ta do to am jyabo kaji nakdekdengan pa kano ovay a jyagonay a. So ji na alasi no keyleylamdam na so onowned nyo ni Ama ta do to. No si ji kamo a hayo am mahap nyo rana o kazwayan nyo no marateng rana o araraw no yai na ni Yeso Kizisto.

⁸ Tana nyo jyacita si Yeso Kizisto sicyaikwaya am nyo katenngan o nyo kararalay nya. Abo rana o ciriciring jinyo, ta kamo tey masaray rana so onowned.

⁹ Ta nyo na nimahap o patazadangan na jinyo ni Ama ta do to. Ori rana am kakownongan na ori no nakem nyo ji Ama ta do to.

¹⁰ Sira rana panoyonoywan na so ciring ni Ama ta do to a tao no kakwa am nimanakem da o kakala da so peypeypangayan no kapatazadang na so tao do teyngato ni Ama ta do to. So nipakalavatan da so sang a itoro na jinyo ni Ama ta do to.

¹¹ O Seyzi na ni Kizisto amyan jira am ori o nipaziman jira so keyyan no alalaw ni Kizisto a kapakaranes na rana no kazwayan na. Am ori o nipakanakman da no panoyonoywan na so ciring ni Ama ta do to so kapakateneng da do araraw na kano agcigcinan na no vazay ang.

¹² Nipaziman na rana ni Ama ta do to do panoyonoywan na so ciring a tao o ka beken na monganay jira no ipanci da vazay. Ta monganay jinyo a omanoyong jya. Am sicyaikwaya am na rana nioyatan sira no Seyzi o yameylimwang no Mapasaray a Ciriciring jinyo. Am o da ipeylimwang ori am mangay do tinsi o yamakza nya a katenngan.

Ji meylimoteng so onowned a tao

¹³ Am ori o ipeytataziman nyo a mahap so vazay na ni Ama ta do to a meyhanhan nya a manta ninyo so aryarilaw na no mai rana si Yeso Kizisto.

¹⁴ Onotan nyo si Ama ta do to. Ji nyo to nginara o marahet a icicirawat nyo no kaji nyo pa manaralayan.

¹⁵ Naknakmen nyo o kaji nyo mapazavozan so marahet a vazay nyo. Ta si Ama ta do to a yanimapanop jinyo am yabo jiya o marahet.

¹⁶ Maniring do Seysyo am, “Ji kamo meylimoteng so onowned an. Ta yaken rana am ji ko meylimoteng so onowned a Tao do to.”

¹⁷ No kamo meynozi am nyo abneken si Ama ta do to a Ama nyo. Iya rana am ji mapeycyakaban a yamanita so mina vazay no tao. Am ori o panadnadan nyo sya an, do iyan nyo pa do karawan.

¹⁸ Naknakmen nyo o kaji na nitombosan jinyo ni Ama ta do to no monganay jinyo a ovay, do nyamoon nyo a malas a icicirawat no ineynapo nyo no kakwa.

¹⁹ Ta o na nitbos jinyo ni Ama ta do to do nyo peyraratenan am rala na ni Yeso Kizisto, akman so icicirawat da no mapatanatanang so nakem ji Ama ta do to a mapatanang so rala no ney yapya na kagling da.

²⁰ Ji na pa nyamaog o karawan am nipamnekan na rana si Yeso ni Ama ta do to a mawakwak no raraten no tao do karawan. So na ikanoyong rana a nimai a somidong jinyo.

²¹ Iya o yanyo ipakateneng rana ji Ama ta do to a nimapeyvangon sya do heseb na a nimanta nya so azwazway na. Am ori o nyo rana to ngotokoci so nakem ji Ama ta do to a omanoyong do akman sang a oyowyat na a mapeyvangon jinyo no makwa.

²² Kamo manoyong a yarana ji meylimoteng so onowned a yamarilaw no akma nyoy kakteh do cinai, do yanyo kanoyong a yaomonot do nanao na ni Ama ta do to. So ikakdekdeng nyo pa a marilaw no kadwan jinyo.

²³ Ta inyo rana am yamyan rana jinyo so to meyyonong a Ciriciring ni Ama ta do to a ikavyay no pahad nyo.

²⁴ Akman so ciring do Seysyo. Ta maniring am, “Yamamimin o tao a yakmey tamek. O kapyapya da am akman so savong no tamek a ji meyyonownay a mavozas.

²⁵ Am o ciring na ni Ama ta do to am to meyyonong.” Ori rana am Mapasaray a Ciriciring na ni Ama ta do to a yanamen rana nipeylimwang jinyo.