Numeri 27 - Shona Bible 1949 revised 2002

Mirairo yokugarisa nhaka

¹ Zvino vanasikana vaZerofehadhi, mwanakomana waHeferi, mwanakomana waGireadhi, mwanakomana waMakiri, mwanakomana waManase, wemhuri dzaManase, mwanakomana waJosefa, vakaswedera kuna Mosesi; ndiwo mazita avanasikana vake: Mara, naNoa, naHogira, naMirika, naTiriza;

² vakamira pamberi paMosesi napamberi paEreazari mupristi, napamberi pamachinda neungano yose, pamukova wetende rokusangana, vakati,

³ “Baba vedu vakafira murenje, asi vakanga vasi pakati peboka ravaya vakaungana kuzorwa naJehovha, veboka raKora; vakafira havo muzvivi zvavo, vasina vanakomana.

⁴ Zvino zita rababa vedu richabvisirweiko pakati pemhuri yavo, nokuti vakanga vasina vanakomana? Tipeiwo nhaka pakati pehama dzababa vedu.”

⁵ Mosesi akaisa shoko ravo pamberi paJehovha.

⁶ Jehovha akataura naMosesi, akati,

⁷ “Vanasikana vaZerofehadhi vanotaura kwazvo; zvirokwazvo, unofanira kuvapa nhaka pakati pehama dzababa vavo; unofanira kuvagarisa nhaka yababa vavo.

⁸ Zvino unofanira kutaura navana vaIsiraeri, uchiti, ‘Kana munhu akafa asina mwanakomana, munofanira kugarisa mwanasikana wake nhaka yake.

⁹ Kana asina mwanasikana, munofanira kupa vakuru vake navanun’una vake nhaka yake.

¹⁰ Kana asina vakuru kana vanun’una, munofanira kupa vakuru kana vanun’una vababa vake nhaka yake.

¹¹ Kana baba vake vasina vakuru kana vanun’una, munofanira kupa hama yake yomumba nhaka yake, ive yake.’ Unofanira kuva mutemo wokutonga nawo pakati pavana vaIsiraeri,” sezvakarairwa Mosesi naJehovha.

Joshua muteveri waMosesi

¹² Zvino Jehovha akati kuna Mosesi, “Kwira pagomo iri reAbharimu, uone nyika yandakapa vana vaIsiraeri.

¹³ Ipapo kana waiona, newewo uchasanganiswa navanhu vako, sezvakasanganiswa mukuru wako Aroni;

¹⁴ nokuti makaramba shoko rangu murenje reZini, panguva yokurwa kweungano, mukarega kunditsaura pamberi pavo pamvura.” (Ndiyo mvura yeMeribha paKadheshi, murenje reZini.)

¹⁵ Zvino Mosesi akataura naJehovha, akati,

¹⁶ “Jehovha, Mwari wemweya yavanhu vose, ngaagadze murume paungano iyi,

¹⁷ achabuda pamberi pavo, nokupinda pamberi pavo, angavabudisa nokuvapinza; kuti ungano yaJehovha irege kuva samakwai asina mufudzi.”

¹⁸ Ipapo Jehovha akati kuna Mosesi, “Tora Joshua, mwanakomana waNuni, murume uno mweya mukati make, uise ruoko rwako pamusoro pake.

¹⁹ Umuise pamberi paEreazari mupristi, napamberi peungano yose, ugomurairira pamberi pavo.

²⁰ Uise pamusoro pake zvoukuru hwako, kuti ungano yose yavana vaIsiraeri imuteerere.

²¹ Iye anofanira kumira pamberi pomupristi Ereazari, iye amuunzire pamberi paJehovha nokutonga kweUrimi; nokuraira kwake, vanofanira kubuda, nokuraira kwake, vanofanira kupinda, iye pamwechete navana vaIsiraeri vose, ungano yose.”

²² Mosesi akaita sezvaakarairwa naJehovha; akatora Joshua, akamuisa pamberi pemupristi Ereazari, napamberi peungano yose;

²³ akaisa maoko ake pamusoro pake, akamurairira, sezvakataura Jehovha nomuromo waMosesi.