Numeri 23 - Shona Bible 1949 revised 2002

¹ Zvino Bharamu akati kuna Bharaki, “Ndivakire pano atari nomwe, undigadzirire pano nzombe nomwe namakondohwe manomwe.”

² Bharaki akaita sezvakataura Bharamu; Bharaki naBharamu vakabayira paatari imwe neimwe nzombe imwe negondohwe rimwe.

³ Zvino Bharamu akati kuna Bharaki, “Chimira iwe pachipiriso chako chinopiswa, asi ini ndichaenda; zvimwe Jehovha achauya kuzosangana neni; zvose zvaanondiratidza, ndichakuudza izvo.” Akaenda pakakwirira, pakanga pasina chinhu.

⁴ Ipapo Mwari akasangana naBharamu, iye akati kwaari, “Ndagadzira atari nomwe, ndikabayira nzombe negondohwe paatari imwe neimwe.”

⁵ Jehovha akaisa shoko mumuromo waBharamu, akati, “Dzokera kuna Bharaki, utaure kwaari kudai.”

⁶ Akadzokera kwaari, akamuwana amire pachipiriso chake chinopiswa, iye namachinda ose aMoabhu.

⁷ Ipapo akataura nomufananidzo wake, akati, “Bharaki akanditora paArami, Mambo waMoabhu akanditora pamakomo okumabvazuva, Achiti, ‘Uya unditukire Jakobho, Uya, unditsamwire Isiraeri.’

⁸ Ini ndingatuka seiko asina kutukwa naMwari; Ini ndingatsamwira seiko asina kutsamwirwa naJehovha?

⁹ Nokuti ndinomuona ndiri pamusoro pamatombo, Ndinomutarira ndiri pamusoro pezvikomo; Havangaverengwi pakati pendudzi.

¹⁰ Ndianiko angaverenga guruva raJakobho, Kana kuverenga chikamu chechina chaIsiraeri? Kuguma kwangu ngakufanane nokwake!”

¹¹ Zvino Bharaki akati kuna Bharamu, “Wandiiteiko? Ndanokutora kuti utuke vavengi vangu; tarira, waramba uchingovaropafadza.”

¹² Akapindura, akati, “Ko handifaniri kuchenjera kuti nditaure zvinoiswa naJehovha mumuromo mangu here?”

¹³ Bharaki akati kwaari, “Douya hako neni kune imwe nzvimbo, paungavaona uripo; ungangoona vokumudzivo voga, haungavaoni vose; nditukirei ivo uri ipapo.”

¹⁴ Zvino akaenda naye kumunda waZofimu, pamusoro pePisiga, akavaka atari nomwe, akabayira nzombe negondohwe paatari imwe neimwe.

¹⁵ Akati kuna Bharaki, “Chimira pano pachipiriso chako chinopiswa, ini ndindosangana naJehovha uko.”

¹⁶ Ipapo Jehovha akasangana naBharamu, akaisa shoko mumuromo make, akati, “Dzokera kuna Bharaki utaure kudai.”

¹⁷ Iye akaenda kwaari, akamuwana amire pachipiriso chake chinopiswa, machinda aMoabhu anaye. Bharaki akati kwaari, “Jehovha wakataureiko?”

¹⁸ Ipapo akataura nomufananidzo wake, akati, “Simuka, iwe Bharaki, unzwe; Nditeerere, iwe mwanakomana waZipori:

¹⁹ Mwari haazi munhu, Haangarevi nhema; Kunyange Mwanakomana womunhu, Haangashanduki; Chaakataura, haangachiiti kanhi? Chaakataura, haangachisimbisi kanhi?

²⁰ Tarira, ndakarairwa kuti ndiropafadze; Iye wakaropafadza, ini handigoni kuzvishandura.

²¹ Haana kuona zvakaipa kuna Jakobho; Haana kuona zvakashata kuna Isiraeri; Jehovha Mwari wake anaye, Vanopupurira mambo pakati pavo.

²² Mwari akavabudisa Ijipiti, Ane simba rakafanana nerenyati.

²³ Zvirokwazvo hakunaunanga kuna Jakobho, Uye hakuna kuuka kuna Isiraeri; Zvino zvicharehwa pamusoro paJakobho napamusoro paIsiraeri, Zvakaitwa naMwari,

²⁴ Tarirai, vanhu avo vanosimuka seshumbakadzi, Vanosimuka seshumba. Havangavati pasi vasati vadya chakabatwa, Nokunwa ropa rechakaurawa.”

²⁵ Zvino Bharaki akati kuna Bharamu, “Usatongovatuka, kana kutongovaropafadza.”

²⁶ Asi Bharamu akapindura, akati kuna Bharaki, “Handina kukuudza here, ndikati, ‘Zvose zvinotaurwa naJehovha, ndizvo zvandinofanira kuita?’ ”

²⁷ Bharaki akati kuna Bharamu, “Uya zvino, ndiende newe kune imwe nzvimbo; zvimwe Mwari angafara nazvo kuti unditukire ivo, uri ipapo.”

²⁸ Zvino Bharaki akaenda naBharamu pamusoro pePeori, panotarira pasi kurenje.

²⁹ Bharamu akati kuna Bharaki, “Ndivakire pano atari nomwe, undigadzirire pano nzombe nomwe namakondohwe manomwe.”

³⁰ Bharaki akaita sezvakarehwa naBharamu, akabayira nzombe negondohwe paatari imwe neimwe.