Numeri 13 - Shona Bible 1949 revised 2002

Vasori vane gumi navaviri vanotumwa Kenani

¹ Zvino Jehovha akataura naMosesi, akati,

² “Tuma varume kuti vandoshora nyika yeKenani, yandichapa vana vaIsiraeri; utume mumwe worudzi rumwe norumwe rwamadzibaba avo, vose vave vakuru pakati pavo.”

³ Mosesi akavatuma, vakabva murenje reParani, nokuraira kwaJehovha, vose vavo vari varume vaiva vakuru vavana vaIsiraeri.

⁴ Ndiwo mazita avo: Vokurudzi rwaRubheni, Shamua, mwanakomana waZakuri.

⁵ Vokurudzi rwaSimeoni, Shafati, mwanakomana waHori.

⁶ Vokurudzi rwaJudha, Karebhu, mwanakomana waJefune.

⁷ Vokurudzi rwaIsakari, Igari, mwanakomana waJosefa.

⁸ Vokurudzi rwaEfuremu, Hoshea, mwanakomana waNuni.

⁹ Vokurudzi rwaBhenjamini, Paruti, mwanakomana waRafu.

¹⁰ Vokurudzi rwaZebhuruni, Gadhieri, mwanakomana waSodhi.

¹¹ Vokurudzi rwaJosefa, irwo rudzi rwaManase, Gadhi, mwanakomana waSusi.

¹² Vokurudzi rwaDhani, Amieri, mwanakomana waGemari.

¹³ Vokurudzi rwaAsheri, Seturi, mwanakomana waMikaeri.

¹⁴ Vokurudzi rwaNafutari, Nabhi, mwanakomana vaVhofusi.

¹⁵ Vokurudzi rwaGadhi, Geueri, mwanakomana waMaki.

¹⁶ Ndiwo mazita avarume vakatumwa naMosesi kundosora nyika. Mosesi akatumidza Hoshea, mwanakomana waNuni, zita rinonzi Joshua.

¹⁷ Mosesi akavatuma kundosora nyika yeKenani, akati kwavari, “Endai nenzira iyi yeZasi, mukwire mumakomo;

¹⁸ mundoona nyika, kuti yakadiniko, navanhu vageremo, kana vane simba, kana vasina, kana vari vashoma, kana vari vazhinji;

¹⁹ nenyikawo yavageremo, kuti yakadiniko, kana yakanaka, kana yakaipa; namaguta mavagere, kuti akadiniko, kana vagere mumisasa kana munhare;

²⁰ nevhu, kuti rakadiniko, kana rakaorera kana risina kuorera, kana pane miti kana pasina miti; tsungai mwoyo, mugouya nezvibereko zvenyika iyo.” Zvino yaiva nguva yokutanga kuibva kwamazambiringa.

²¹ Naizvozvo vakakwira vakandosora nyika, vachibva murenje reZini, kusvikira Rehobhu, pavanopinda Hamati.

²² Vakapinda neZasi, vakasvika Hebhuroni; ipapo pakanga pana Ahimani naSheshai naTarimai, vanakomana vaAnaki. (Pakuvakwa Hebhuroni rakatangira Zoani paIjipiti namakore manomwe.)

²³ Vakandosvika pamupata weEshikori, vakatema davi raiva nesumbu rimwe ramazambiringa, vakaritakura padanda pakati pavanhu vaviri; vakauyawo namatamba namaonde.

²⁴ Nzvimbo iyo vakaitumidza mupata weEshikori nokuda kwesumbu rakatemwapo navana vaIsiraeri.

²⁵ Mazuva ana makumi mana akati apera, vakadzoka pakusora nyika.

²⁶ Vakasvika kuna Mosesi naAroni neungano yose yavana vaIsiraeri, murenje reParani paKadheshi, vakavaudza mashoko nokuvaratidza ivo neungano yose zvibereko zvenyika iyo.

²⁷ Vakamuudza, vakati, “Takaenda kunyika iyo kwamakatituma; zvirokwazvo inoyerera mukaka nouchi; izvi ndizvo zvibereko zvayo.

²⁸ Asi vanhu vagere munyika iyo vane simba, maguta akakombwa namasvingo, makuru kwazvo; uye, takaonapo vana vaAnaki.

²⁹ VaAmareki vagere munyika necheZasi, navaHeti, navaJebhusi, navaAmori vagere mumakomo; vaKenani vagere pagungwa, nokurutivi rwaJorodhani.”

³⁰ Ipapo Karebhu akanyaradza vanhu pamberi paMosesi akati, “Ngatikwire pakarepo, tindoitora, nokuti tinogona kwazvo kuikunda.”

³¹ Asi vamwe varume vakanga vakwira naye, vakati, “Hatigoni kukwira kundorwa navanhu avo, nokuti vanotikurira nesimba.”

³² Naizvozvo vakauya kuvana vaIsiraeri neshoko rakaipa pamusoro penyika iyo, yavakanga vaenda kundoisora, vachiti, “Nyika iyo yatakapfuura napakati payo kuisora, inyika inopedza vanhu vageremo; vanhu vose vatakaonamo vaiva varume vakakura kwazvo.

³³ Takaonapo vanhu varefu, vana vaAnaki, vanobva pavarefu; kana tichizvifananidza, takanga takaita semhashu, ndozvatakanga takaita kwavariwo.”