Numeri 12 - Shona Bible 1949 revised 2002

Miriami anorohwa namaperembudzi, nokuti iye naAroni vakamukira Mosesi

¹ Zvino Miriami naAroni vakapopotera Mosesi nokuda kwomukadzi aiva muKushi, aakanga awana; nokuti akanga awana mukadzi aiva muKushi.

² Vakati, “Ko Jehovha akataura naMosesi iye oga here? Ko haana kutaura nesuo here?” Jehovha akazvinzwa.

³ Zvino munhu uyu Mosesi akanga ari munhu munyoro kwazvo, kupfuura vanhu vose vaiva panyika.

⁴ Jehovha akataura pakarepo naMosesi naAroni naMiriami, akati, “Budai imi vatatu kutende rokusangana.” Ivo vatatu vakabuda.

⁵ Ipapo Jehovha akaburuka mushongwe yegore, akamira mumukova wetende rokusangana, akadana Aroni naMiriami; ivo vaviri vakabuda.

⁶ Zvino akati, “Teererai mashoko angu; kana kuno muporofita pakati penyu, ini Jehovha ndichazvizivisa kwaari nechiratidzo, ndichataura naye nokurota hope.

⁷ Muranda wangu Mosesi haana kudaro; akatendeka paimba yangu yose.

⁸ Iye ndichataura naye nomuromo, pachena, ndisingatauri namashoko asinganzwisiswi; iye uchaona Jehovha kuti akadini; naizvozvo makaregereiko kutya kupopotera muranda wangu Mosesi?”

⁹ Ipapo kutsamwa kwaJehovha kwakavamukira, iye akabva.

¹⁰ Gore rikabva pamusoro petende rokusangana, onei Miriami ava namaperembudzi, akachena sechando; Aroni akatarira Miriami, onei ava namaperembudzi.

¹¹ Zvino Aroni akati kuna Mosesi, “Haiwa, Ishe wangu, musaisa mhosva yezvivi pamusoro pedu, kunyange takaita hedu noupenzi, tikatadza.

¹² Ngaarege kuva somwana wakaberekwa akafa, imwe nyama yake yakaora pakubuda kwake padumbu ramai vake.”

¹³ Zvino Mosesi akachema kuna Jehovha, akati, “Haiwa Mwari, domuporesai henyu.”

¹⁴ Jehovha akati kuna Mosesi, “Dai baba vake vakanga vamupfira mate kuchiso chake, haazaifanira kunyara mazuva manomwe here? Ngaabudiswe kunze kwemisasa mazuva manomwe, agopinzwa pashure.”

¹⁵ Ipapo Miriami akabudiswa kunze kwemisasa mazuva manomwe, vanhu vakasafamba, kusvikira Miriami adzoswazve.

¹⁶ Shure kwaizvozvo vanhu vakasimuka vakabva Hazeroti, vakandodzika matende avo murenje reParani.