Numeri 10 - Shona Bible 1949 revised 2002

Vanorairwa kuita hwamanda mbiri dzesirivha

¹ Zvino Jehovha akataura naMosesi, akati.

² “Uzviitire hwamanda mbiri dzesirivha; unofanira kudziita nesirivha yakapambadzirwa; idzo dzinofanira kukubatsira kudana ungano nokuraira kuti mapoka afambe.

³ Kana vachidziridza ungano yose inofanira kuungana kwauri pamukova wetende rokusangana.

⁴ Kana vachiridza imwechete, zvino machinda vari vakuru vezviuru zvavaIsiraeri vanofanira kuungana kwauri.

⁵ Kana muchiridzisa, mapoka okurutivi rwamabvazuva anofanira kusimuka, vafambe.

⁶ Kana muchiridzisa rwechipiri mapoka okurutivi rwezasi anofanira kusimuka, vafambe; vanofanira kuridzisa kana vofamba nzendo.

⁷ Asi kana ungano ichifanira kuunganidzwa, munofanira kuridza, asi musaridzisa.

⁸ Vanakomana vaAroni, vapristi, ndivo vanofanira kuridza hwamanda; ngazvive tsika kwamuri nokusingaperi kusvikira kumarudzi enyu ose.

⁹ Kana muchindorwa munyika yenyu nomuvengi anokumanikidzai, munofanira kuridzisa nehwamanda; ipapo mucharangarirwa pamberi paJehovha Mwari wenyu, mugoponeswa pavavengi venyu.

¹⁰ Uye nomusi wamunofara nawo, napamitambo yenyu yakatarwa napakutanga kwemwedzi yenyu, munofanira kuridza hwamanda pamusoro pezvipiriso zvenyu zvinopiswa, napamusoro pezvibayiro zvezvipiriso zvokuyananisa, kuti Jehovha akurangarirei nazvo; ndini Jehovha Mwari wenyu.”

VaIsiraeri vanosimuka paSinai

¹¹ Zvino negore rechipiri, nomwedzi wechipiri, nezuva ramakumi maviri romwedzi, gore rakasimudzwa pamusoro petabhenakeri yechipupuriro.

¹² Ipapo vana vaIsiraeri vakasimuka murenje reSinai, kuzofamba nzendo dzavo; gore rikandomira murenje reParani.

¹³ Vakatanga kufamba sezvavakarairwa naJehovha nomuromo waMosesi.

¹⁴ Pakutanga mureza weboka ravana vaJudha wakasimuka namapoka avo; boka rake rakanga richirairwa naNashoni, mwanakomana waAminadhabhu.

¹⁵ Boka rorudzi rwavana vaIsakari rakanga richirairwa naNetaneri, mwanakomana waZuari.

¹⁶ Boka rorudzi rwaZebhuruni rakanga richirairwa naEriabhu, mwanakomana waHeroni.

¹⁷ Zvino tabhenakeri yakabviswa, vanakomana vaGeshoni navanakomana vaMerari, vatakuri vetabhenakeri, vakasimuka.

¹⁸ Zvino mureza weboka raRubheni wakasimuka namapoka avo; boka rake rakanga richirairwa naErizuri, mwanakomana waShedheuri.

¹⁹ Boka rorudzi rwavana vaSimeoni rakanga richirairwa naSherumieri, mwanakomana waZurishadhai.

²⁰ Boka rorudzi rwavana vaGadhi rakanga richirairwa naEriasafi, mwanakomana waDheueri.

²¹ Zvino vaKohati vakasimuka, vakatakura imba tsvene; vamwe vakamisa tabhenakeri ivo vachigere kusvika.

²² Zvino mureza weboka ravana vaEfuremu wakasimuka namapoka avo; boka rake rakanga richirairwa naErishama, mwanakomana waAmihudhi.

²³ Boka rorudzi rwavana vaManase rakanga richirairwa naGamarieri, mwanakomana waPedhazuri.

²⁴ Boka rorudzi rwavana vaBhenjamini rakanga richirairwa naAbhidhani, mwanakomana waGidheoni.

²⁵ Ipapo mureza weboka ravana vaDhani, ndivo vokupedzisira pamapoka ose, vakasimuka namapoka avo; boka rake rakanga richirairwa naAhiezeri, mwanakomana waAmishadhai.

²⁶ Boka rorudzi rwavana vaAsheri rakanga richirairwa naPagieri, mwanakomana waOkirani.

²⁷ Boka rorudzi rwavana vaNafutari rakanga richirairwa naAhira, mwanakomana waEnani.

²⁸ Ndiko kufamba kwavana vaIsiraeri namapoka avo; vakasimuka.

²⁹ Zvino Mosesi akati kuna Hobhabhu, mwanakomana waReueri, muMidhiani, mukarahwa waMosesi, “Toenda kunzvimbo iyo yakanzi naJehovha, ndichakupai iyo; endai nesu, tigokuitirai zvakanaka, nokuti Jehovha akataura zvakanaka pamusoro pavaIsiraeri.”

³⁰ Iye akati kwaari, “Handingaendi, asi ndichaenda hangu kunyika yangu nokuhama dzangu.”

³¹ Iye akati, “Ndinonyengetera kuti murege henyu kutisiya, zvamunoziva kudzikirwe wamatende edu murenje, muchava meso edu.

³² Kana mukaenda nesu, kana Jehovha akatiitira zvakanaka zvipi nezvipi, tichakuitirai izvozvowo.”

³³ Zvino vakasimuka pagomo raJehovha, vakafamba mazuva matatu; areka yesungano yaJehovha ikavatungamirira mazuva matatu, kuvatsvakira pokuzorora.

³⁴ Gore raJehovha rikava pamusoro pavo masikati pakusimuka kwavo pamisasa.

³⁵ Zvino areka yakati yasimuka, Mosesi akati, “Simukai Jehovha, vavengi venyu ngavaparadzwe; navanokuvengai ngavatize pamberi penyu.”

³⁶ Zvino pakuzorora kwayo, akati, “Dzokai Jehovha, kuzviuru zvine gumi nezviuru zvavaIsiraeri.”