Mapisarema 9 - Shona Bible 1949 revised 2002

Dhavhidhi anovonga nokuti Jehovha akamurwira

Kumutungamiriri wokuimba; neMutirabheni. Pisarema raDhavhidhi.

¹ Ndichavonga Jehovha nomwoyo wangu wose; Ndichaparidza mabasa enyu ose anoshamisa.

² Ndichafara nokukufarirai zvikuru; Ndichaimbira zita renyu nziyo dzokurumbidza, imi Wokumusorosoro.

³ Kana vavengi vangu vachidzokera shure, Vanogumburwa nokupera pamberi penyu.

⁴ Nokuti mandiruramisira mhosva yangu; Makagara pachigaro choushe muchitonga nokururama.

⁵ Makatuka vahedheni, makaparadza vakaipa, Makadzima zita ravo nokusingaperi-peri.

⁶ Vavengi vakapera, vakaparadzwa nokusingaperi; Makaparadza maguta avo, Nechiyeudzo chawo chakaparara.

⁷ Asi Jehovha agere ari mambo nokusingaperi; Akagadzira chigaro chake choushe kuti atonge.

⁸ Achatonga nyika nokururama, Achatonga vanhu zvakafanira.

⁹ Jehovha achava nhare yakasimba kuna vanomanikidzwa, Nhare yakasimba panguva yokutambudzika.

¹⁰ Vanoziva zita renyu vachavimba nemi; Nokuti imi Jehovha hamuna kurasha vanokutsvakai.

¹¹ Imbirai Jehovha nziyo dzokumurumbidza, iye agere paZioni; dudzirai zvaakaita pakati pendudzi dzavanhu.

¹² Nokuti iye, anotsiva ropa, anovarangarira; Haakanganwi kuchema kwavarombo.

¹³ Ndinzwirei tsitsi, Jehovha; Tarirai, kumanikidzwa kwangu navanondivenga, Imi munondisimudza pamisuo yorufu;

¹⁴ Kuti ndiparidze kurumbidzwa kwenyu kwose; Pamisuo yomukunda weZioni, Ndichafarira kuponesa kwenyu.

¹⁵ Vahedheni vakanyura mugomba ravakachera; Rutsoka rwavo rwakabatwa mumumbure, wavakavanza.

¹⁶ Jehovha wakazvizivisa, akatonga; Akaipa wakateyiwa nebasa ramaoko ake.

¹⁷ Vakaipa vachadzokera kuSheori, Ivo vahedheni vose, vakakanganwa Mwari.

¹⁸ Nokuti anoshaiwa haangakanganikwi nokusingaperi, Nokutarira kwomurombo hakungaperi nokusingaperi.

¹⁹ Simukai Jehovha; munhu ngaarege kukunda; Vahedheni ngavatongwe pamberi penyu.

²⁰ Chivatyisai, Jehovha; Vahedheni ngavazive kuti vanongova vanhu.