Mapisarema 6 - Shona Bible 1949 revised 2002

Dhavhidhi anochema zvivi zvake

Kumutungamiriri wenziyo; nemitengeranwa, namanzwi avarume. Pisarema raDhavhidhi.

¹ Haiwa Jehovha, regai kundiraira pakutsamwa kwenyu, Musandirova nokusafara kwenyu kukuru.

² Ndinzwirei nyasha, Jehovha; nokuti ndaonda; Ndiporesei, Jehovha; nokuti mapfupa angu anotambudzika.

³ Mweya wangu unotambudzikawo zvikuru; Asi imi Jehovha, muchanonoka kusvikira riniko?

⁴ Dzokai Jehovha, murwire mweya wangu; Ndiponesei nokuda kwounyoro hwenyu.

⁵ Nokuti parufu hapana achakurangarirai; Ndiani achakuvongai paSheori?

⁶ Ndaneta nokugomba kwangu; Usiku humwe nohumwe ndinoshambirisa nhoo dzangu; Ndinonyorodza mubhedha wangu nemisodzi yangu.

⁷ Ziso rangu rapera nokuchema, Rinosakara nokuda kwavadzivisi vangu.

⁸ Ibvai kwandiri, imi vabati vose vezvakaipa; Nokuti Jehovha akanzwa izwi rokuchema kwangu.

⁹ Jehovha akanzwa kukumbira kwangu; Jehovha achagamuchira munyengetero wangu.

¹⁰ Vavengi vangu vose vachanyadzwa nokutambudzika zvikuru; Vachadzoka, vachanyadzwa pakarepo.