Mapisarema 20 - Shona Bible 1949 revised 2002

Munyengetero kuti mambo akunde

Kumutungamiriri wokuimba. Pisarema raDhavhidhi.

¹ Jehovha ngaakupindure nomusi wokutambudzika; Zita raMwari waJakobho ngarikuise pakakwirira;

² Ngaakutumire rubatsiro runobva panzvimbo tsvene, Akutsigire nesimba rinobva Zioni.

³ Ngaarangarire zvipiriso zvako zvose, Agamuchire zvibayiro zvako zvinopiswa;

⁴ Ngaakupe zvinodikanwa nomwoyo wako, Ngaaite sezvawakafunga.

⁵ Tichafara kwazvo nokukunda kwenyu, Tichasimudza mireza yedu nezita raMwari wedu; Jehovha ngaaite zvose zvawakakumbira.

⁶ Zvino ndinoziva kuti Jehovha anoponesa muzodziwa wake; Achamupindura ari kudenga kwake kutsvene Nesimba roruoko rwake rworudyi, rinoponesa.

⁷ Vamwe vanovimba nengoro, vamwe namabhiza; Asi isu tichareva zita raJehovha Mwari wedu.

⁸ Ivo vakotamiswa, vawira pasi; Asi isu tasimuka, timire zvakanaka.

⁹ Ponesai, Jehovha; Mambo ngaatipindure kana tichidana.