Mapisarema 19 - Shona Bible 1949 revised 2002

Ukuru hwaJehovha hunoonekwa pazvisikwa zvake nomurayiro wake

Kumutungamiriri wokuimba. Pisarema raDhavhidhi.

¹ Kudenga-denga kunoparidzira kubwinya kwaMwari; Uye denga rinoratidza basa ramaoko ake.

² Musi mumwe unotaurira mumwe musi, Uye usiku humwe hunopupurira humwe usiku njere.

³ Hapana kutaura, kana mashoko; Izwi razvo harinzwiki.

⁴ Rwonzi rwokuyera rwazvo rwakasvika kunyika yose, Namashoko azvo kumugumo wenyika. Akagadzirira zuva tende mukati mazvo.

⁵ Iro rakafanana nechikomba chinobuda mumba macho, Rinofara semhare kumhanya nenzira yaro.

⁶ Kubuda kwaro kunobva pamugumo wedenga, Kupota kwaro kunosvika pakuguma kwarozve; Hakune chinhu chakavanzirwa kupisa kwaro.

⁷ Murayiro waJehovha wakakwana, unoponesa mweya; Chipupuriro chaJehovha ndechazvokwadi, chinopa vasina mano njere.

⁸ Zvinorairwa naJehovha zvakarurama, zvinofadza mwoyo; Murau waJehovha wakaisvonaka, unovhenekera meso.

⁹ Kutya Jehovha kwakanaka, kunogara nokusingaperi; Zvakatongwa naJehovha ndezvazvokwadi, zvakarurama kwazvo.

¹⁰ Zvinofanira kutsvakwa kukunda ndarama, zvirokwazvo kukunda ndarama zhinji yakaisvonaka; Zvinotapirawo kupfuura huchi nomusvi wamazinga ohuchi.

¹¹ Uyezve, muranda wenyu unonyeverwa nazvo; Pakuzvichengeta panomubayiro mukuru. Kana kuri kutsauka, ndiani angakuziva?

¹² Ndianiko angaziva zvitadzo? Ndinatsei imi pazvitadzo zvakavanzika.

¹³ Dzoraiwo muranda wenyu pazvivi zvokuzvikudza; Ngazvirege kuva nesimba pamusoro pangu; ipapo ndichava akakwana, Handingavi nemhosva yokudarika kukuru.

¹⁴ Mashoko omuromo wangu nokurangarira kwomwoyo wangu ngazvifadze pamberi penyu, Imi Jehovha, dombo rangu, nomudzikinuri wangu.