Mapisarema 17 - Shona Bible 1949 revised 2002

Dhavhidhi anochema kuti arwirwe kuvavengi vake

Munyengetero waDhavhidhi

¹ Inzwai zvakarurama Jehovha, muteerere kuchema kwangu; Rerekerai nzeve dzenyu kumunyengetero wangu, unobva pamiromo isinganyengeri.

² Kutongwa kwangu ngakubve pamberi penyu; Meso enyu ngaatarire zvakarurama.

³ Makaidza mwoyo wangu; makandishanyira usiku; Makandiidza, mukasawana kufunga kwakaipa mandiri; Ndakazvisunga kuti muromo wangu urege kudarika.

⁴ Kana ari mabasa avanhu; neshoko remiromo yenyu, Ini ndakanzvenga nzira dzomuparadzi.

⁵ Kutsika kwangu kwakarambira panzira dzenyu, Tsoka dzangu hadzina kutedzemuka.

⁶ Ini ndakadana kwamuri, nokuti muchandipindura, imi Mwari; Rerekerai nzeve dzenyu kwandiri, munzwe kutaura kwangu.

⁷ Ratidzai unyoro hwenyu hunoshamisa, imi, munoponesa vanovimba nemi, Imi munoponesa noruoko rwenyu rworudyi, ava vanovimba nemi Kunavanovamukira simba.

⁸ Ndichengetei semboni yeziso renyu, Ndivanzei pasi pomumvuri wamapapiro enyu,

⁹ Kunavakaipa, vanondiparadza, Ivo vavengi vangu vakaipa, vanondikomba.

¹⁰ Vakadzivira mwoyo yavo; Vanotaura vachikudza nemiromo yavo.

¹¹ Vakatikomba zvino pakufamba kwedu; Vanocherekedza nameso avo kuti vatiwisire pasi.

¹² Vakafanana neshumba inokarira kuparadza, somwana weshumba inovandira panzvimbo dzakavanda.

¹³ Simukai, Jehovha, Mirai pamberi pake, mumuwisire pasi; Rwirai mweya wangu nomunondo wenyu kuna vakaipa;

¹⁴ Kuvanhu, noruoko rwenyu imi Jehovha, Kuvanhu venyika, vanomugove wavo paupenyu uhwu, Vamunozadza dumbu ravo nepfuma yenyu; Vana vana vazhinji, Vanosiyira vacheche vavo zvakasara zvepfuma yavo.

¹⁵ Ini ndichaona chiso chenyu pakururama; Ndichaguta nomufananidzo wenyu pakumuka kwangu.