Mapisarema 13 - Shona Bible 1949 revised 2002

Dhavhidhi anovimba nokubatsira kwaMwari

Kumutungamiriri wokuimba; Pisarema raDhavhidhi

¹ Jehovha muchandikanganwa nokusingaperi kusvikira rini? Muchandivanzira chiso chenyu kusvikira riniko?

² Ndichafunga mano mumweya mangu kusvikira rini, Ndine shungu pamwoyo pangu zuva rimwe nerimwe? Muvengi wangu achandikurira kusvikira rini?

³ Rangarirai, mundipindure, Jehovha Mwari wangu; Vhenekerai meso angu, ndirege kuvata hope dzokufa;

⁴ Muvengi wangu arege kuti, “Ndamukunda;” Vadzivisi vangu varege kufara kana ndichizununguka.

⁵ Asi ndakavimba nenyasha dzenyu; Mwoyo wangu uchafara nokuponesa kwenyu;

⁶ Ndichaimbira Jehovha, Nokuti akandiitira zvakanaka.