Mapisarema 12 - Shona Bible 1949 revised 2002

Dhavhidhi anotsvaka kubatsirwa naMwari, nokuti vanhu vanyengeri

Kumutungamiriri wokuimba; namazwi avarume. Pisarema raDhavhidhi.

¹ Batsirai, Jehovha; nokuti vanoda Mwari vopera; Nokuti vakatendeka havachipo pakati pavana vavanhu.

² Vanotaura mumwe nomumwe zvisina maturo nowokwake; Vanotaura nomuromo unobata kumeso, uye nemwoyo miviri.

³ Jehovha achagura miromo yose inobata kumeso, Norurimi runotaura zvinhu zvikuru;

⁴ Ivo vakati, “Tichakunda norurimi rwedu; Miromo yedu ndeyedu; ndianiko angava ishe wedu?”

⁵ “Nokuda kwokumanikidzwa kwavarombo, nokugomera kwavanoshaiwa, Ndichamuka zvino nokuda kwaizvozvo,” ndizvo zvinotaura Jehovha; Ndichamuisa pakasimba ipo paanoshuva.

⁶ Mashoko aJehovha mashoko akachena; Sesirivha yakaidzwa mubisiro panyika, Yakanatswa kanomwe.

⁷ Muchavachengeta, Jehovha, Muchavachengeta parudzi urwu nokusingaperi.

⁸ Vakaipa vanofamba pamativi ose, Kana zvakashata zvichikudzwa pakati pavanakomana vavanhu.