Mapisarema 11 - Shona Bible 1949 revised 2002

Dhavhidhi anovimba naMwari, nokuti anochengeta vakarurama

Kumutungamiriri wokuimba; Pisarema raDhavhidhi.

¹ Ndinovimba naJehovha; Munoreva seiko kumweya wangu, muchiti, “Tizira kugomo rako seshiri?

² Nokuti, tarira, vakaipa vanowembura uta, Vanogadzira museve wavo parukungiso, Kuti vafure anomwoyo wakarurama parima.

³ Kana nheyo dzakaparadzwa, Akarurama angaiteiko?”

⁴ Jehovha uri mutemberi yake tsvene, Iye Jehovha, chigaro chake chohushe chiri kudenga; Meso ake anotarira, mafungiro ameso ake anoidza vana vavanhu.

⁵ Jehovha anoidza vakarurama; Asi mweya wake unovenga wakaipa neanomanikidza.

⁶ Achanisira misungo pamusoro pavakaipa; Moto nesuriferi nemhepo inopisa, ndiwo uchava mukombe wavo wavakagoverwa.

⁷ Nokuti Jehovha akarurama; anoda zvakarurama; Vakarurama vachaona chiso chake.