Taitos 3 - Gooti Toolluro Yogalokwono

Jisasolluro a'mwo abolo ton sugupasudo yo'moneyokwe tov yiuwi'nokai toga neya yovrowosunmwalpino tovinokwono

¹ Jisasolluro a'mwo abolo ton aro tonyuno kuudo nyallulo'gwonmwalpiyokwe guu neya duudogawono. “Kevu gavman a'mwo aguto toorogai'aro gavman womdokwe gabovo toorogai'aro su toorai kwako tomuu'aro neya duuwiyogaulo. A'mwo su tooravuro yogalo dodopure tonyu po'dogalo uumjunopi buro'nyo buro'nyo sugupasudo tonyu yo'moneyokwe tov yiuwi'nokai toga neya jovrowosunogaulo.

² Aki kevu a'mwo pwolnodo kwolluno kuruv burolyogalo madopi molo yogalo nyoullajunmwalpiyo. Toro kugaikul kuruv yiuwi'nokai a'mwo abolo tonyu kavo uubemwojopi ilaiyo to'no neya jugolmovlavogaulo.” Su toro tonyuno neya duudogawono.

³ Kuudo neya jaullulo. Muudu'nodo toga ne kunol kuruv junorukuudo tooro yau'dowa Gooti toolluro yogalo tovi kisuvolo kwiyajuwonogano. Aki kuunano yogalo youkuu'nanekudodopure toorai kaduko wiyodowa noonyumwonyu kwanyu sumdo kinuwiyo'mo pasudo toorogai'aro nevnokwenollu ilaiyo igollunyo'mo pasudo toorogai'aro su toorai kiroungovlaiyo'moneyokwe ki'nato womdo sajuwonogano. Aki toro tonol magu'nyo kuudo toorogai'aro kwekuullu kuudo toorogai'aro you'movla'mdowa a'mwo abolo togai sumwoluko gwabo sungovlaiyajuwonogano. Muudu'nodo toga nevu kaiya'no pasudo su toro toorogai somjomwekovlaiyajuwonogano.

⁴ Toro kuvi kuruv Gooti tool nemi ma'no ma'nodo tovuro kirumwallo tovida'ai mollurolovonekumokalokwodowodekono. Toro toolluro ilaiyo yanekullugolodowodo tokwe'aro aki nemino kalo buuropino winodowodo tokwe'aro su toval kuu'maiyo toru'no me'no sanekulo'nolovakono. Su toro sanekulo'nolo toga'no'gwowi

⁵ Gooti tool nemi ma'no ma'nodo tovuro kirumwallo tovida'ai kuvinono abomollurolovonekumokalokwokanogano. Su toro abomollurolovonekumokalokwoka su tov nevnokwenolluro sugupasudo sajuuwo tovida'aiyo'maiyo. Toro kuvi kuruv yiuno gavnokwe toolluro kalo mamwonyodowodo tovida'ai nemoro ma'no ma'nodo tonyu amollol'movonekumarokaikono. Toro mollol'movonekuma'no sumaiyokwe gamoro Kuullo anekullaboka toollu'aro nemoro poowokalago tonyu amonekudukavokaikono. Toro monekuduka'mno sumaiyokwe a'mwo abolo muuduko tonolbusuko yomjomwekovlawano'moneyokwe me'no sumo'nowonogano.

⁶ Gooti tool yanyagekono. Toro toolluno tov gamoro Kuullo tool nemoro poowokalago tonyu yiunokuudo aulanekubweyokaikono. Su tool nemi bomollurolovonekumokalokwodowodo Jisas Kraisollu'aro kuvinono anekubweyokaikono.

⁷ Aki Gooti tool gamoro yasuwa'wino sugumaluko tov me'no anekubweyokaikono. Toro tovi'aro nevu gamoro sumdo tovi sugudo me'no wimo'nodowadonogano. Aki toro tonol aiyo yiunokuudo mujomwekovlaiyo'moneyokwe tovi, kuvinono nomaranonoldeyo, kuudo yau'dowadonogano. Su toro kuudo yaurowa'ji sogwollo to'no kingovla'mdowadonogano.

⁸ Yogalo agudumo akan yiuno nebal'nodogano. Toro te a'mwo abolo Gooti toolluno kuudo uubweyodupudo ton yiuwi'nokai toga sugupasudo tonyu aulolukumowopiyogapuro. Toro tonyu guu moro yogalo agudumo akagai jurogudo neya doduuwimwojumovlavogawono. Yogalo su ton sugudogano. Aki yogalo su ton yiuwi'nokai a'mwo abolo tonyu nokwo wiyo'mwojupinogano.

⁹ Toro kuvi kuruv yogalo pworo a'mwo pworavuro yamuugojo kaiya'nodo toorogai'aro kemi kwikweyago tooraino yovo tonyuno yajunodupudo toorogai'aro imgu amgu yogalo youllajunyo'moneyokwe toorogai'aro Juu tooravuro loowo tovino jainyubwo'dupudo toorogai'aro yiuwi'nokai yogalo su tooro kemi ku'nono maikullo'mwojupinorogano. Toro tovino tov kevu yogalo kaiya'nodo su toorai manyu tomuu'aro neya jurukuruwolovogaulo.

¹⁰ Kemi anakuuto tomuuda'ai a'mwo pwol Gooti toolluro a'mwo abolo tonyu molleru'mdowapiyo'mo yodowo'jure toollu guu wonyapino mibinono. Toro kweku kuruv a'mwo su toollu duudapi yogalo neya doduuwiyono. Toro toollu duudapi yogalo pugasal me'no aduuwibi kwol kuruv aki aiko te muu'nyubusuko so'ji toga'no'gwowi a'mwo su toollu buulo to'no duugunyumopiyogawono.

¹¹ Kuudo nyau'mwakovo. A'mwo su toro so'ji tool sugudo tomuuda'ai me'no buugollu'mokalokwowo'ji ma'no ma'no yodowodekono. A'mwo su toro yodowodo tekwo gavnokweyolluro pasudo tovasuda'ai Gooti tool kuudo nuuteyonekono.

Yogalo aiyowo'mokwono

¹² Oo nuu dole'manollo yodowo'jure toga wagwolago Nikapooles tovi neya mwalmo tovino me'no adomdukuurosumwa'jonyugono. Toro tovino tov a'mwo nuuge amwakuuwo tooralluda'ai pwollu gumiyomno nomogwopiyamonyugono. A'mwo su tooralluno yovo tov Atemaseke Tikikoseke toorakono. Toro tooralluda'ai pwollu amogwopiyami su tool me'no aboguru'maro'ji toga guu wagwolago Nikapooles mwalodo'mure toonyomno bonyuru'mallo'mo yamju neya duuwiyoganono.

¹³ Aki a'mwo pworal guuge mwalodubulorakono. Toro tooralluro pwol loowo tovino pi'mwo kuudokwekono. Toro toolluno yovo tov Senasolekono. Aki pwolluno yovo tov Apoolosolekono. A'mwo su tooral puuto tovi novlaiyo'mo toga noonyumwonyu punyuno supto nyubullokwe tov guu kaveno nuuwiyo'mwojubiyo. Toro kweku kuruv guureji neya duuwiyo'mwojono. Toro me'no wiyo'mwojo'bi toga a'mwo su toorallu puuto tovi nokwo iwapibinekugono.

¹⁴ Aku'momdo Kritda'ai Jisasolluro a'mwo abolo kun kuruv sugupasudo mujumovlaiyo'moneyokwe jurogudo neya imo'nogapuro. Jurogudo su toro sumo'nupi ton yiuno yasuwa'no to'no nomwalmwalpiyo. Toro kun kuruv a'mwo abolo supto yodopure tobuurai neya wiyo'mwojumwalpinogano.

¹⁵ Yiuwi'nokai nuuge mwalodupudo ton gumi, “Ilaiyokwono,” agwopiyamavo. Aki a'mwo abolo Jisasolluno kuudo uubweyodupudo pun nemino kalo buuropino winodupudo su tobuurai guu, “Ilaiyokwono,” duudono. Gooti toolluro yasuwa'wino sugumaluko tov kemi nekwo'movla'mwalonokwono.