Room 9 - Gooti Toolluro Yogalokwono

Poolol gami avalo Isuraiyolda'ai tonyuno kalo kwinyajuko tovinokwono

¹ Nuu Krais toolluro a'mwo pwonyugono. Toro toonyuno tov moro kuuguudo aikudumi akav kuunano'maiyo. Yiuno nebal'nodo tovi ikudumonyugono. Aki moro nebaikuuguudo ikudumo su tovino Gooti toolluro Kuullo tooke'aro moro poowokalago tokwe'aro yiuwi'nokai su toval yiuno kuu'maiyo toru'no, “kuvigono,” nyudodubulovakono. Toro tovino tov moro kuuguudo akav yiuno nebal'nodo tovi ikudumonyugono.

² Kuuguudo tov arokwono. Nuu moro avalo Isuraiyolda'ai tobuuro Krais toolluno kuudo muubweyodupudo tobuuraino kalo bwotonyo nyunowo'ji moro poowokalago tov jul'nyo ibwosunodumdonyugono. Aki moro jul'nyo ibwosunodumdo su tov piyarupto manyunodowodokwono.

³ Toro toonyu aro kuudo yau'dumdonyugono. Oo nuuge avalo kuunodo Isuraiyol tobuuro kemi ma'no ma'nodo tovuro kirumwallo tovida'ai neya abirolo'nugolokuupureyokweyo'mo anyunadopiyo. Su toro kuudo yauro'mi aki aro kuudo yau'dumdonyugono. Nuvnokwe toonyu Krais tooke yeru'mdeyapino'mi wiyo'mwojo'moneyokwe kemoro aiko toru kirumwallo tov nokwo ma'monyudukono? Awiyo, mi avalo tobuurai su toro tomgu'aro wiyo'mwojo'moneyokwe puuto puruv nonagutokwono. Su toro kuudo yau'dumdonyugono.

⁴ Gooti tool nuuge avalo Isuraiyolda'ai su tonyu aro wiyodowodekono. Gamoro kwoloraiyo kuunodo wimo'nyo'moneyokwe me'no jeso'no mollumwoga yodowodogano. Toro tonyu Gooti tool gamoro bako bwotonyo tov me'no kuuduuwallokagano. Aki Gooti tool Isuraiyolda'ai a'mwo abolo togai subuu'yamju pun yajuno'mno gamoro loowo ton kwiyokaikono. Toro te Isuraiyolda'ai su ton Gooti toolluno ilomoropiyodapu gamoro subuu'yamju kwiyajuko su ton me'no ma'dupudogano.

⁵ Aki Isuraiyolda'ai su ton kemi kwikweyago kuunodo Eburaiyameke Aisakeke Jekoopeke tooraida'ai imo'nugelabodupudogano. Aki Krais gavnokwe kwol kuruv kwako akavida'ai a'mwo pwolbusuko imo'nyo'moneyokwe tov Isuraiyolda'ai su tonyuro iko tovasuda'ai abwollumo'nokaikono. Krais su tool Gooti kuunodekono. Aki toro tool yiuwi'nokai tonyu mido aguto mollomwalodowodekono. Toro toolluno yovo tov yiuwi'nokai toga neya ilomoropimwolowanekono. Kuuguudo akav yiuno nebal'nodokwono.

Gooti toolluro Isuraiyolda'ai tonyu kwimelabiyajuko tovinokwono

⁶ Gooti tool moro avalo Isuraiyolda'ai tonyu subuu'yamju ton kwiyajukekono. Toro kuvi kuruv Isuraiyolda'ai bwotonyago su ton Gooti toolluro subuu'yamju tonyuno kavlo tov kuudo miyouromallajupogano. Toro tovino tov Gooti toolluro kwoloraiyo kuunodo mwimo'nyajupogano. Su toro tovino kevu aro kuudo nyaupiyo. Oo Gooti toolluro subuu'yamju tov me'no bwolo'dawodokwono. Kuudo nyaupiyo. Awiyo, Isuraiyolda'ai tonyuno Gooti toolluro subuu'yamju kwiyajuko su ton kuvinono bai'mo'mdupudogano. Kevu kuudo neya jaullulo. Yiuwi'nokai Isuraiyol iko tovasuda'ai yowosungobodupudo ton Gooti toolluro kwoloraiyo ku'nono mwimo'nodupudogano.

⁷ Yiuwi'nokai Isuraiyolda'ai a'mwo abolo ton Eburaiyamolluda'ai bodupudogano. Toro bodupudo kun kuruv yiuwi'nokai ton Eburaiyamolluro kwikweyago kwoloraiyo kuunodo mwimo'nodupudogano. Aiyoga Gooti tool Eburaiyamollu aro kuudokaikono. “Gumoro jukweyago kwoloraiyo kuunodo ton yiuno gumoro kwolaiyo Aisakolluda'ai sowosungelabupi tono gujumo'numwalpinogano.”

⁸ Gooti toolluro su toro kuudoka tovino kavlo tov arokwono. A'mwo abolo Gooti toolluro kuunodo wimo'nodupudo ton yiuno kulako tovida'ai to'no mwimo'nodupudogano. Toro kuvi kuruv a'mwo abolo ton Gooti toolluro Eburaiyamollu subuu'yamju kwiyoka tovino kuudo kuubwepi su tono'gwowi gamoro kwoloraiyo kuunodo wimo'nodupudogano.

⁹ Gooti tool Eburaiyamollu subuu'yamju wiyo'no aro adubweyokaikono. “Nuu kworomo aikomguda'ai tollugwoji aikomgu nobumonyugono. Toro bo'mi moro jurogudo uubweyodo'mure tokwe gumoro abolo Sarav kwolaiyo pwol nyomaronokwono.” Gooti tool subuu'yamju su toro kwiyokaikono.

¹⁰ Aki puruv aro sumo'nokakwono. Saravuro kwolaiyo sawosunoka su toolluno yovo tov Aisakolekono. Nemi nellukweyago su tool aguto gulluno sumaiyokwe Rebekavi amarokaikono. Toro malluno sumaiyokwe Rebekav kwolaiyo guro'marolo tooralluno sumwolukokwe sumo'nokakwono. Kwolaiyo su toorallu kuunumiyago tool yiuno pwolnodekono. Su tool Aisakolekono.

^11-12 Toro te kwolaiyo su tooral yere mimo'nyodole toga kemoro ma'no ma'no pasudo'mdeyo oo sugupasudo'mdeyo tov miyajulorakono. Toro todoralluda'ai pwollu jeso'moneyokwe Gooti tool Rebekavi kuuguudo tov yiuno'no aro adubweyokaikono. “Kwolaiyo sumdomguda'ai tool lukomguda'ai toollu womdo wimovla'mwalono'moneyokwe imo'nonekono.” Adubweyokaikono. Gooti toolluro toro adubweyoka tov aro tovino anekuduuwalladopiyo. Gooti tool a'mwo pwollu jeso'mo kwino'ji tov gavnokweyolluro tomgu'aro uumjunowo'ji jesodowodekono. Aki toro tool a'mwo pwolluro buro'nyo buro'nyo pasudo'mdeyo tovi wonomarowo'ji jesodowodolmaiyo. Toro kwol kuruv yiuno gavnokweyolluro ilaiyo winodowo'jure tomgu'aro domarowo'ji jesodowodekono. Gooti toolluno su toro nekuduuwallodowodokwono.

¹³ Kuuguudo adubweyoka su tov suwiyo sumwojokakwono. Su toro tovino Gooti toolluro yogalo puruv aro sakwollungikokwono. “Nuu Isoo'wollu molluduvolono gami gagwai'yago Jekoopolluno'gwowi kalo buuropino anyunokanyugono.” Sakwollungikokwono.

¹⁴ Toro te kevu buro'nyo kuudo jukiyau'mwakovo? A'mwo pwol aro ado'ji tov, “Oo Gooti tool gavnokweyolluro tomgu'aro uumjunodowo a'mwo abolo tonyu jesodowodo su tov ilaiyo'maiyo.” A'mwo pwol toro ado'ji su tov kuvimaiyo. Gooti toolluro yodowodo to'gwowi ilaiyo to'nodokwono.

¹⁵ Gooti tool aiyoga Moosesollu aro kuudokaikono. “Nuu a'mwo pwolluno kalo mamwonyo'mo anyuno'ji tov kuvinono imonyugono. Aki a'mwo pwolluno kalo wino'mi wiyo'mwojo'mo anyuno'ji kuruv kuvinono imonyugono.” Kuudokaikono.

¹⁶ Toro tovino tov Gooti gavnokwe toolluro kalo mamwonyodowodo tovida'ai to'no a'mwo abolo tonyu jesodowodekono. Toro te Gooti toolluro janekubweyo'moneyokwe womdo su tov nami manakuuwoso. Aki navnokwenalluro womdo bwotonyo sosi kuvida'ai kuruv ku'nono manakullo'mwojonokwono.

¹⁷ Gooti toolluro yogalo sakwollungiko puruv wo'dowodokwono. Yogalo su tov aiyoga Gooti tool Ijupda'ai Feroo kirovanyuvanyu kuumwiyo toollu aro kuudokaikono. “Moro jurogudo guduuwallodo'mure tovida'ai mino yovo tov yiuwi'nokai kwako tomuu ilomonuwopimwolapinonyugono. Su toro ilomonuwopimwolapino'moneyokwe gumi'aro ajagubwemono.” Kuudokaikono.

¹⁸ Toro te Gooti tool a'mwo abolo tonyu kalo mamwonyo'moneyokwe jesodowodo su tonyu kuvinono winodowodekono. Aki a'mwo abolo pun kemoro poowokalago ton lumdo kuulopipino'moneyokwe jesodowodo su to kun kuruv kuvinono lumdo kuulopiyodupudogano.

¹⁹ Moro su toro aikudumo tovino pugaikul kuunano aro youkuu'nadodupudogaikikono. “Gooti tool a'mwo abolo punyu kirovanyuvanyu pasudo toorogai mujumovlaiyo'moneyokwe sokwollubweyokaikono. A'mwo abolo su ton Gooti gavnokwe toolluro sokwollubweyoka tomgu'aro to'no uumjunodupu mujumovla'mdupudogano.” Pugaikul su toro youkuu'nadodupudo tov kuvimaiyo. Toro tovino tov kevu Gooti toollu aro nuudoganpiyo. “Ma'no ma'no yodopure su tonyu guu buro'nyo'mo derumwalladokuuno?” Nuudoganmwalpiyo.

²⁰ Kuudo neya jaullulo. Guu yasuwa'no mimo'nodekugono. Toro kweku kuruv Gooti toolluro ilaiyo winoduke tomgu'aro sokwollagubweyoka tooku imo'nodumdekugono. Toro tooku Gooti toolbusukekumaiyo. Toro tookujuno tov Gooti toollu yamuugojo aro nuudoganbiyo. “Oo Goot, guu akaro tomgu'aro sokwollanubweyodo tov buro'nyo kavlo tovino'mdeyo?” Guu su toro kuudoganbi tov ilaiyo mibinekugono. Gooti tool gavnokweyolluro winoduke tomgu'aro sokwollagubweyokaikugono.

²¹ Aro to'busukokwono. A'mwo pwol kwa'bootoollo tonyu yakwollo'mo kwino'ji tov gavnokweyolluro ilaiyo winodowo'jure tomgu'aro yakwollonekono. A'mwo su tool kwako pun luvomarowo'ji womdo go'no go'nodo tonyu yo'moneyokwe kwa'bootool puruval yakwollonekono. Kwa'bootoollo su tovalluro puruv sugudokwono. Toro tov a'mwo abolo tonyuro sumdollu toru kuulludapiyo'mokwono. Aki puruv yaiyo ton iroso'mokwono. Toro te a'mwo tool kwako avalo tokwe womdo judo'no judo'nodo tov yo'moneyokwe kwa'bootool tovallu su toro yokwolludapiyonekono. Su toro to'busuko kubalno a'mwo abolo judo'no judo'nodo ton womdo go'no go'nodo tonyu yo'moneyokwe Gooti gavnokwe toolluro yokwolludapiyodowodogano.

²² Aki Gooti su tool yiuwi'nokai ma'no ma'no mujumovla'mdupudo toorai kirumwallo'moneyokwe tov gami uuwo'dowodokwono. Aki kuudo wuuteyo'moneyokwe kuruv avalo toollu kuuwoso. Toro toolluno tov yiuwi'nokai a'mwo abolo ma'no ma'no mujumovla'mdupudo tonyuno Gooti tool surodo wuunodowo nerumwallonekono. Gooti tool a'mwo abolo su tonyu yere nokwo kirumwallono kwol kuruv gamiyomno kuudo neya youragunyumo'nupureyokwe tovino sogwollo kingovla'mdowodekono. Gooti tool a'mwo abolo surodo wuunodowodo tonyu gamoro jurogudo tov su toro tomgu'aro kuu'maiyo toru'no wuuduuwallodowodekono.

²³ Toro kuvi kuruv Gooti tool a'mwo abolo punolluno'gwowi kalo manekumwonyodowodekono. Toro tonollu gamoro jurogudo tov aro nekuduuwallodowodekono. Gooti tool gamoro bako pwopiyodowodo sugudo toru nemi kuulomonekumwallowo'ji gavuge mujomwekovlaiyo'moneyokwe mollovrovanekubweyodowodekono.

²⁴ Toro tovino tov Gooti tooke gamoro sugudo su toru ilomwallo'moneyokwe nevu Juu tonolluda'ai punollu me'no janekubweyodowodekono. Toro kuvi kuruv yiuno nevu Juu tonolluno to'no janekubweyodowodolmaiyo. A'mwo abolo Juu tonolluro miyawosunodowado kunyu kuruv doma'dowo aval'no gavuge ilomwallo'moneyokwe jesodowodekono.

²⁵ Juu tonolluro miyawosunodowado su tonyuno Gooti toolluro yogalo tovi aiyoga proofet Hooseyal puukwollo puruv aro sakwollokaikono. “A'mwo abolo pun sumdomgu moro kuunodo manyumo'nyajupogano. Toro kuvi kuruv aga'no'gwowi a'mwo abolo su tonyuno aro dumonyugono. Oo akan moro kuunodogano. Aki toro tonyuno sumdomgu moro poowokalago tov mwiyajo kwonyu kuruv aga'no'gwowi a'mwo abolo su tonyuno kalo buuropino nyunodowodogano.” Hooseyal toro sakwollokaikono.

²⁶ Aki kuuguudo sakwollungiko puruv aro dodowodokwono. “Lukomgu aro tov imo'nonokwono. Aiyoga Gooti tool a'mwo abolo gabovo punyu aro kuujajukekono. “Kevu moro kuunodogaikulmaiyo.” Toro kuujajuko kwol kuruv aga'no'gwowi a'mwo abolo avalo su tonyu aro wuudonekono. “Kevu yiuwi'nokai toga aiyo mwalodumdo Gooti toonyuro kwoloraiyo anyumo'nadokwovo.” Wuudonekono.” Puukwollo puruv su toro sakwollungikokwono.

²⁷ Aki Aisaiyal Isuraiyolda'ai tonyuno kuudo yauro'no puukwollo puruv aro ajakwollokaikono. “Isuraiyolda'ai a'mwo abolo ton kwolallo bwotonyo imo'nodupudogano. Soolwaravuro wolo tomuuda'ai we'gullugulludo wo'dupudo to'busuko tonyu ku'nono majagilbinogano. Kwolallo su toro imo'nodopure tonyu Gooti tool yiuwi'nokai tonyu mwiyo'mwojonekono. Toro kuvi kuruv yiuno pwekwonodo tonyu kemoro ma'no ma'nodo tovuro kirumwallo tovida'ai bomollurolovomokalokwonekono.

²⁸ Su tov aro tovinokwono. Lukomgu Aguto toolluro me'no ajesoka tomgu'aro bai'mo'mdowo'jure toga Aguto tool a'mwo abolo kwako akavi mwalodupudo tonyu yere kirumwallowo'ji kaiyako yiunokuudo mollounapiyonekono.” Ajakwollokaikono.

²⁹ Aki kuuguudo avalo su to'busuko puvino Aisaiyal aro ajakwollokaikono. “Nemi nellukweyago pun ma'no ma'no yodopure tonyu Aguto tool nokwo aromiyebuuropiyowo'jujukekono. Nemi Aguto jurogudo kuunodo tool wonyapino miyowo'jujuko'mno'juki nevu yiuwi'nokai tonol kaiyako yiunokuudo su'nopiyowa'jujukonogano. Wagwolago Soodoomke Goomoorake tovalluda'ai a'mwo abolo tonyu aromiyebuuropiyoka to'busuko kubalno ne kunollu kuruv aval'no anekullumo'nowo'jujukonogano.” Aisaiyal su toro ajakwollokaikono.

Isuraiyolda'ai ton Krais toolluno kuudo muubweyajupo tovinokwono

³⁰ Toro tovino tov nevu aro kuudo neya yaurogawano. A'mwo abolo Juu tonolluro miyawosunodowado su ton sumdomgu Gooti toolluro sumdo tovi sugudo wimo'nyo'moneyokwe puuto tovino a'mgono miyajupogano. Toro kun kuruv aga'no'gwowi puuto su tovi me'no yo'mgonoma'dupudogano. Puuto su tov Krais toolluro wiyo'mwojo'moneyokwe womdo sopiyoka tovino kuudo uubweyodopure tovida'ai Gooti toolluro sumdo tovi sugudo wimo'nodupudogano.

³¹ Toro wimo'nodupudo kuvi kuruv Isuraiyolda'ai tono'gwowi Gooti toolluro sumdo tovi sugudo imo'nyo'mo kwinyajupogano. Toro ton Moosesolluro loowo tovi'aro yamju kuumjungobiyajupogano. Yiuwi'nokai toga guureji uumjunyo'mo wiyoganodupudo kun kuruv ku'nono muumjunyajupogano. Toro tovino tov Gooti toolluro sumdo tovi sugudo ku'nono mwimo'nyajupogano.

³² Isuraiyolda'ai ton su toro tomgu'aro Gooti toolluro sumdo tovi sugudo mwimo'nyajupo tov buro'nyo kavlo tovino'mdeyo? Aro tovinokwono. A'mwo abolo su ton Gooti toolluro wiyo'mwojo'moneyokwe puuto tovino kuudo muubweyajupogano. Toro kun kuruv aro kuudo saullajupogano. Oo nevnokwenolluro sugupasudo tovida'ai Gooti toolluro sumdo tovi sugudo wimo'nowa'ji ilaiyo mollonekumarononogano. Su toro kuudo saullajupo tov kuvimaiyo. Krais tool a'mwo abolo su tonyu kuu'maiyo toru'no me'no kuuduuwallunokaikono. Toro kuuduuwallunoka toollu Isuraiyolda'ai a'mwo abolo su ton mwonyubusuko to'no sopogano. Aki toro ton Krais sulo pwolbusuko imo'noduke toollu'aro yello su'nameyajupogano.

³³ Su toro tovino Gooti toolluro yogalo puruv aro sakwollungikokwono. “Kevu duu'nyulo. Nuu Isuraiyolda'ai a'mwo abolo tonyomno moro a'mwo pwol nomoropiyamekono. Amoropiyami su tool muumuudo Saiyoon toollu muunyu toru molludapimekono. Toro tool sulo pwolbusuko da'mdowo'jure toollu a'mwo abolo pun kuudo muubwepi tov sulo pwollubusuko bomunyukuuromaropi wolapinogano. Toro kuvi kuruv a'mwo abolo pun moro amoropiyami su toolluno kuudo kuubwepi tonyuno'gwowi a'mwo pworo wogulo ku'nono maduuwo'galpinorogano.” Gooti toolluro yogalo puruv su toro sakwollungikokwono.