Room 2 - Gooti Toolluro Yogalokwono

Kooti yogalo pi'mwono mollomwalokwe Gooti tool kironekumwallodowodo tovinokwono

¹ Mi a'mworavoo, moro me'no aikudumo tovino tov kevu aro kuudo nyaupiyo. Nevu a'mwo abolo punbusuko ma'no ma'nodo maiyokwe tonolluno tov Gooti tool maironekumwallonekono. Kuudo nyaupiyo. Su tov aro tovinokwono. Kevu yiuwi'nokai pwolno puru'monodo togaikul aro dodupudogaikikono. “Oo a'mwo abolo ma'no ma'no yodupudo ton Gooti toolluro kirumwallo tov neya amapuro.” Kemoro su toro adupi tov yiuno a'mwo abolo punyuno dupinogaikulmaiyo. Toro kuvi kuruv kevnokwe togaikulluno dupinokwono. Kevu kugaikul ma'no ma'no aval'nodo su to'busuko ton yodupudogaikikono. Toro togaikulluno tov Gooti toolluro kirumwallo tov nomapinogaikikono.

² Gooti tool a'mwo abolo ma'no ma'no yodupudo tonyu kirumwallo'moneyokwe tov yiuno'no uubweyodowodekono. Gooti toolluro toro uubweyodowodo tov yiuno sugudo to'no yokwekono. Su toro tovino nevu kuudo me'no youroma'dowadonogano.

³ Toro te a'mwo ma'no ma'no yodupudo pworaino, “Oo kirumwallo tov neya amapuro.” Kevu su toro dodupudo kuvi kuruv ma'no ma'no aval'nodo ton yodupudorekikono. Toro toorekul aro kuudo nyaupiyo. Oo Gooti tool moro ma'no ma'nodo tovino aironumwallo'ji toga lukado nokwo birolo'nugolokuumonyugono. Su toro kuudo nyaupiyo.

⁴ Toro kuvi kuruv kevu neya duu'nyulo. Gooti sugudo ikubweyodowodo su tool yere nokwo amovaikugu'mwojowo'jujuko kwol kuruv kemi sogwollo to'no ikinodowodekono. Kevu kemi ma'no ma'nodo tonyuno buulo uugunyumopiyopi Gooti toollomno neya youragunyumo'nupureyokwe sogwollo to'no ikinodowodekono. Gooti tool kemi ilaiyo yaikullugolodowodo tovida'ai toro ikinodowodekono. Toro te kevu Gooti toolluro su toro ikullodowodo tovino kuudo yau'dupudorekuldukono?

⁵ Awiyo, kevu toro kuudo miyau'dupudo kuvi kuruv kemoro poowokalago tono'gwowi lumdo kuulopiyopi kemoro kuudo kun kuruv dogaipo'nyo kuumwiyo bwotonyo yau'dupudorekikono. Toro toorekulluro kirumwallo tov bwotonyo imo'nugelodawodokwono. Toro te aiyowo'mo toga Gooti tool gamoro kooti yogalo idopto'nodo tokwe daikullowo'ji airekumwallo'ji toga gamoro surodo tov yiuno kuu'maiyo toru'no ikuduuwallonorekikono. Toro aikuduuwallo'ji tovi noonpinorekikono.

⁶ Gooti tool yiuwi'nokai a'mwo abolo tonyu kooti yogalo aduuwiyo'ji toga pwolno puru'monodo tonyu mubiyo tov nuuwiyonekono. Gooti tool yiuwi'nokai a'mwo abolo ma'no ma'no pasudo mujumovla'mdupudo tonyu mubiyo kaiya'nodo tokwe uubiyonekono. Aki a'mwo abolo sugupasudo mujumovla'mdupudo tonyuno'gwowi mubiyo sugudo tokwe uubiyonekono.

⁷ Toro te a'mwo abolo pun Gooti toolluro bako bwotonyo tovi anakuuto tomuu kuulomwallo'moneyokwe puuto tovi a'mgono yodupudogano. Aki Gooti tool muunyu toru'aro yomollonekumwallowo'ji yiunokuudo nobola'jokwe tovino winodupudogano. Su toro winodupudo ton sugupasudo yomjumovla'mdupu mimwogapiyodupudogano. Toro tonyu Gooti tool aiyo yiunokuudo mujomwekovlaiyo'moneyokwe tov kuvinono nuubweyonekono.

⁸ Toro kuvi kuruv a'mwo abolo puno'gwowi kevnokwenyuro kuudo tovino to'no uumjungovla'mdupudogano. Toro ton Gooti toolluro nebaikuuguudo tovi kisuvolo wiyodupu yiuwi'nokai toga ma'no ma'no yomjomwekovla'mdupudogano. Su toro ton Gooti toolluro surodo wuunodowodo tov maropi ma'no ma'nodo tovuro kirumwallo'mo mubiyo tov nomapinogano.

⁹ Toro te yiuwi'nokai pwolno puru'mono ma'no ma'no yomjomwekovla'mdupudo su tonyu Gooti tool nerumwallo'moneyokwe kaiyako igolonekono. Toro igolodowo'jure tovida'ai tabunyuwuulo bwotonyo ton nyubwosunpinogano. Gooti tool toro airomwallo'ji toga sumdomgu Juu tooraida'ai kirumwallonekono. Aki lukomgu a'mwo Juu toonolluro miyawosunodowado kworai kuruv nerumwallonekono.

¹⁰ Toro kuvi kuruv a'mwo abolo yiuno sugudo mujumovla'mdupudo tonyuno'gwowi Gooti tool muunyu toru'aro yomorumwallowo'ji gamoro bako bwotonyo tovi anakuuto tomuu kuulomorumwallonekono. Aki gamoro sumwoluko tov iroto uubweyonekono. Gooti toolluro sugudo su toro yono tov sumdomgu Juu tooraida'ai uubweyowo'ji aki lukomgu a'mwo Juu toonolluro miyawosunodowado kworai kuruv nuubweyonekono.

¹¹ Kevu kuudo neya jaullulo. Gooti tool Juu toonogai'aro a'mwo abolo Juu toonolluro miyawosunodowado togai'aro tonollu judo'no judo'no manekwonodowodekono. Toro toolluno tov yiuwi'nokai tonollu aval'no gallenyubworonekumallokwekono.

¹² Kuudo neya jaullulo. A'mwo abolo Juu toonolluro miyawosunodowado ton loowo maiyokwe kun kuruv ma'no ma'no supi tov du'muudo tovi kaiyako yiunokuudo i'nopipinogano. Aki loowokwe Juu a'mwo abolo kun kuruv ma'no ma'no supi tov loowo su tovi kisuvolo wipinogano. Toro tonyu Gooti tool loowo tovuro yogalo tovi'aro kinamjowo'ji nerumwallonogano.

¹³ Su tov aro tovinokwono. A'mwo abolo pun Gooti toolluro loowo tovi wuu'nopi muu'nyubusuko supi tov Gooti toolluro sumdo tovi ilaiyo mwimo'nupinogano. Toro kuvi kuruv pun Gooti toolluro loowo tovi kuumjunpi tonyuno'gwowi Gooti tool, “Sugudogano,” dowo'ji gamoro sumdo tovi sugudo wimo'nupinogano.

¹⁴ Kevu kuudo pun jaullulo. Gooti tool gamoro loowo tov a'mwo Juu toonolluro miyawosunodowado toorai kwiyokalmaiyo. A'mwo Juu toonolluro miyawosunodowado su tooro loowo tovi mamaropo kworo kuruv sugudo yo'moneyokwe kuudo puno'gwowi kemoro mido tovi kuuluuwo'dowodogano. Toro tonyu kuumjunpi tov loowo tovi me'no ma'dupudo tonbusuko imo'nodupudogano.

¹⁵ Toro te loowo nonagutokwe tooravuro yodupudo su tov kuu'maiyo toru'no aro tovino anekuduuwalladopiyo. Loowo tovi uumjunyo'moneyokwe kuudo tov Gooti tool kemoro poowokalago tonyu kuulubweyodowodekono. Toro kuulubweyodowo'jure tovi a'mwo gavnokwe tool wonowo'ji aro tovalluno mollodo'movomaronekono. “Oo pasudo akav sugudo'mdeyo oo ma'no ma'nodo'mdeyo.” Toro mollodo'movomallo'moneyokwe kuudo ton kemoro poowokalago tonyu me'no kuuluuwo'dowodorogano.

¹⁶ Toro te lukomgu Gooti toolluro iruko me'no ajesungiko toga abai'mowo'ji moro yiuwi'nokai kuuguudo sugudo moruudomollodumdo akav kuvinono nyumo'nonokwono. Su toro toga yiuwi'nokai a'mwo abolo tonyuro jupweyo kuudo yau'dupudo toorai yiuno kuu'maiyo toru'no bomollolupto'nubweyowo'ji kooti yogalo duuwiyonekono. Gooti tool Krais Jisasollu'aro toro yonekono. Moro kuuguudo moruudomollodumdo tov torokwono.

Juu a'mwo abolo ton, Loowo tov nemi nokwo nekullo'mwojonokwono, kuudo yau'dupudo tovinokwono

¹⁷ Toro te aga nuu kevu Juu toorekulluno'gwowi aro ikudumo'monyugono. Kevu dodupudorekikono. “Oo Gooti tool nevu Juu toonolluno to'no gamoro loowo tov anekullabokaikono. Toro anekullaboka tovi guureji gudupola'dowado tovino tov Gooti toolluro a'mwo abolo kuunodo wimo'nodowadonogano.” Kevu su toro dodupu ilomoropunyu yodapudorekikono.

¹⁸ Aki toro toorekullu loowo tov me'no yekubwasodowodokwono. Toro tovino tov kevu Gooti toolluro ilaiyo winodowo'jure tovi imovlaiyo'moneyokwe tovino kuudo me'no youroma'dupudogaikikono. Toro toorekul ma'no ma'no pasudo togai'aro sugupasudo togai'aro tonyu jagilopi yiuno sugupasudo tonyuno nokwo yenyubworomapinorekikono.

¹⁹ Aki toro toorekul aro kuudo yau'dupudorekikono. Oo nevu a'mwo abolo sumnowojokwe tonbusuko mwalodupudo tonyu mwollubworomokavla'mdowadonogano. Aki a'mwo abolo pun dugumwuulo tovi anakuuto tomuu mwalodupudo tonyu puuto tovi wuuduuwallo'moneyokwe bako to'busuko wimo'nodowadonogano.

²⁰ Aki kwolaiyo muudoga toorobusuko kuudo maiyokwe tonyu po'dogalo mollovo'dogalodowa aki kwoloraiyo tonbusuko kuudo yau'dopure tonyu ibwasokwe wimo'nodowadonogano. Kuudo yau'dupudorekikono. Toro kuudo yau'dupu aki aro kuudo yaullokweyogaikikono. Oo nevu Gooti toolluro loowokwe toonolluno tov gamoro yiuwi'nokai pi'mwo kuudo togai'aro nebaikuuguudo togai'aro su ton nemi yiunokuudo kuullo'movanekwopiyodowodonogano.

²¹ Kevu su toro kuudo yau'dupu a'mwo abolo punyu yodubwasodupudorekikono. “Oo kevu su toro tomgu'aro neya duumjunogaulo.” Toro yodubwasodupudo kworekul kuruv kevnokwe toorekul mibwasunodupudorekikono. Aki a'mwo abolo punyu “Kuuko mipinono,” wuudodupudo kworekul kuruv kevnokwe toorekul kuuko yodupudorekikono.

²² Aki a'mwo abolo pugai, “Kwonyalo mipinono,” duumjuku'dupudorekikono. Toro duumjukuropi kworekul kuruv kevnokwe toorekul kwonyalo yodupudorekikono. Aki toro toorekul aro jokweyogaikikono. “Oo nevu kuunano gooti pworaino ilaiyo manekullunadopiyo.” Toro dopi kworekul kuruv kuunano gooti toorai ilomoropiyo'moneyokwe ago tonyuda'ai noonyumwonyu pun kuuko ma'dupudorekikono.

²³ Aki kevnokwe toorekul ilomoropunyu yapi aro dodupudorekikono. “Oo nevu loowo tovino me'no youromoropiyodowadonogano.” Toro dodupudo kworekul kuruv kisuvolo wiyopi muumjunodupudorekikono. Toro yodupudo tov Gooti toolluno kaiyako mojugolamo'mdupudorekikono.

²⁴ Su toro tovino Gooti toolluro yogalo sakwollungiko puruv aro dodowodokwono. “Kevu Juu toorekulluro ma'no ma'no yodopure tonyu a'mwo Juu miyawosunodupudo tooro ikwonopi Gooti toolluno yovo tovi bwolomorumwogapiyodapudorogano. Su toro bwolomorumwogapiyodapudo tov kemoro tovasuda'aiyokwono.” Gooti toolluro yogalo sakwollungiko puruv toro dodowodokwono.

Lakulkulako do'nodupudo tovino kavlo kuunodo tovinokwono

²⁵ Aki neya duu'nyulo. Kevu Juu toorekul aro dodupudorekikono. “Nevu lakulkulako do'nodowado toonol Gooti toolluro a'mwo kuunodo wimo'nodowadonogano.” Toro dodupudo kworekul kuruv Gooti toolluro loowo tonyu kisuvolo wiyodupudorekikono. Kevu loowo su tonyu po'dogalo kuumjunopujuko'mno'juki kemoro lakulkulako do'nodupudo tov aro tovino kuu'maiyo kuuduuwallopujukorekikono. Oo nevu Gooti toolluro kuunodonogano, tovino nokwo kuuduuwallopujukorekikono. Toro kworekul kuruv loowo su tonyu kisuvolo yodupudo tovino tov kemoro lakulkulako do'nodupudo su tov yiuno yasuwa'no to'no do'nodupudorekikono. Toro toorekul a'mwo Juu miyawosunodupudo toorobusuko imo'nodupudorekikono.

²⁶ Toro kuvi kuruv a'mwo lakulkulako mado'nodupudo tooro Gooti toolluro loowo tonyu kuumjunpi to'gwowi Gooti toolluro kuunodo nokwo wimo'nupinorogano. Toro tooro Gooti toolluro sumdo tovi lakulkulako do'nodupudo toorobusuko wimo'nupinorogano. Aki toro tooraino Gooti tool, “Moro a'mwo kuunodorogano,” donekono.

²⁷ Toro tooro kevu Juu lakulkulako do'nodupudo toorekullu nekuuwolopinorogano. Moro su toro aikudumo tov aro tovinokwono. Kevu lakulkulako do'nodupudo Juu toorekul Gooti toolluro loowo tovino kuudo me'no youroma'dupudorekikono. Toro kworekul kuruv kisuvolo yodupudorekikono. Toro te Juu miyawosunodupudo su tooro lakulkulako mamado'mdupudo kworo kuruv loowo tovi pi'mwono kuumjunpi toorono'gwowi kevu kisuvolo yodopure toorekullu ikwonopi aro domdukuurosupinorogano. “Oo a'mwo su tooro ma'no ma'no yodupudorogano,” domdukuurusupinorogano.

²⁸ Aki kevu aro dodupudorekikono. “Oo mi nyunum kwolabolo teyaul Juu kuunodo teyaulluronyugono. Toro toonyuno tov Gooti toolluro a'mwo kuunodo wimo'nodumdonyugono.” Toro dodupudo kuvi kuruv kuvimaiyo. A'mwo pwol gami lakulkulako tov yasuwa'no ado'no'ji tov Gooti toolluro a'mwo kuunodo mwimo'nonekono. Aki toro toolluro lakulkulako ado'no'ji tovida'ai muu imuulo kuruv yasuwa'no worowo'ji ku'nono mwiyo'mwojonekono.

²⁹ Toro te Juu a'mwo pworo kemi kulako tovino to'no kuudo yauropi lakulkulako ado'nupi tov yiuno yasuwa'no to'no ipinorogano. Toro kuvi kuruv a'mwo pworo kemi poowokalago kuunodo tokwe Gooti toollomno kuudo souragunyumo'nupi to'gwowi nebal'no kuunodo ipinorogano. Toro souragunyumo'nupi su tooro Gooti toolluro kuunodo wimo'nyo'moneyokwe muu imuulo to'busuko tov nomapinorogano. Aki a'mwo pworai Gooti toolluro Kuullo tool wiyo'mwojodowo'jure tovida'ai Gooti toollomno kuudo souragunyumo'nupi tov Gooti toolluro sumdo tovi sugudo wimo'nopi gamoro a'mwo kuunodo wimo'nupinorogano. Su toro kwimo'nupi tooraino yovo tov Gooti gavnokwe tool ilomoropiyawonekono. Toro kuvi kuruv kwako akavida'ai a'mwo pworono'gwowi su toro tooraino yovo tov milomoropiyapinorogano.