Room 12 - Gooti Toolluro Yogalokwono

Nevu aiyo mwalowa'ji toga nemoro kulako ton Gooti toollu neya wimwalano tovinokwono

¹ Miyobuuravoo, Gooti tool nemino kalo mamwonyodowodo tovino tov nuu kemi aro ikujo'mo anyunadopiyo. A'mwo abolo pun sipsiporodeyo tooravuro kulako togai Gooti toollu kwiroudapiyajupo to'busuko kubalno kevnokwe togaikul kemi kulako ton Gooti toollu duuwiyogaulo. Sipsiporodeyo kwiyajupo su toorai sumdomgu me'no romiyodupu abolpi toga kemoro kulako ton Gooti toollu kwiroudapiyajupogano. Toro kuvi kuruv kevno'gwowi yere mabolopi aiyo kuuno mwalodopure toga kemoro kulako ton Gooti toollu yere neya duuwiyogaulo. Kemi poowokalago kuunodo togai Gooti toollu ilomoropiyo'moneyokwe su toro tomgu'aro kwipi tov Gooti toollu ilaiyo igolpinogaikikono.

² Aki toro togaikul kwako akavida'ai a'mwo abolo punyuro mujumovla'mdopure tomgu'aro nuumjungovla'mwalpiyo. Toro kuvi kuruv Gooti tool kemoro poowokalago kuudo tonyu aiyo aiko te yokwollaikubweyodowo'jure tovi ilaiyo neya domollomarogaulo. Gooti tool kemoro poowokalago kuudo tonyu aiyo aiko te me'no sokwollaikubweyo'ji toga gamoro ilaiyo winodowodo tonyuno kuudo nokwo youroma'mwalpinogaikikono. Toro togaikul sugupasudo yo'mo togai'aro Gooti toollu ilaiyo igollo'moneyokwe togai'aro aki pasudo pun kaiya'no puru'monodo kuruv muumgu'mo'nodowodo togai'aro tonyuno nokwo youroma'mwalpinogaikikono.

Gooti toolluro womdo go'no go'no nekullabodowodo tonyu mujumovla'mwalano tovinokwono

³ Gooti tool gamoro yasuwa'wino sugumaluko tov me'no anubweyokanyugono. Toro tovino tov kevu yiuwi'nokai togaikullu aro ikudumo'monyugono. Kevu ilomoropunyu yapi noonyumwonyu womdo ku'nono mipino tonyuno aro kuudo nyaupiyo. Oo nevu yowa'no yanonogano. Toro kuvi kuruv pwolno puru'monodo togaikul aro kuudo neya jaurogaulo. Oo Gooti tool gamoro womdo tovi momjumovlaiyo'moneyokwe yasuwa'wino sugumaluko tollovo nubweyodowodonyugono. Toro nubweyodowodo tollovai'aro to'no uumjuno'mi gamoro womdo momjumovla'mwalmonyugono. Gooti tool gamoro womdo judo'no judo'nodo tonyu imwalano'moneyokwe tonollu aval'nodo toru'aro manekullabodowodekono.

⁴ Su tov aro to'busukokwono. A'mwo pwolluro kulako tovi sumdo'mdeyo mago'mdeyo suvlo'mdeyo ato'mdeyo ton wo'dupudogano. Bwotonyago su ton womdo go'no go'nodo tonyu yo'moneyokwe kuvi kuruv kemoro kulako to'gwowi yiuno puru'monodokwono.

⁵ Su toro to'busuko kubalno nevu Krais tooke uuguro'mwonyodowado tonollu womdo go'no go'nodo tonyu yo'moneyokwe Gooti tool me'no nekubweyodowodonogano. Toro tonol bwotonyago imo'nodowado kuvi kuruv nemoro kulako to'gwowi yiuno puru'monodo to'busuko imo'nodowadonogano.

⁶ Toro te pwolno puru'monodo tonollu Gooti toolluro womdo go'no go'no nekullabodowodo su tonyu neya amjumovlavogawano. Womdo su ton Gooti gavnokwe toolluro yasuwa'wino sugumaluko tovida'ai nekullabodowodogano. Toro te womdo go'no go'no nekullabodowodo su ton arogano. Punol gamoro kuuguudo tokwe a'mwo abolo punyu moruudomollo'moneyokwe nekullabodowodonogano. Toro nekullabodowodo su tonol nemoro Krais toolluno kuudo uubweyodowado tomgu'aro to'no neya uumjunowa'ji kuuguudo tov a'mwo abolo punyu amoruudomollogawano.

⁷ Aki punol a'mwo abolo punyu womdo wimwalano'moneyokwe nekullabodowodo su tonol womdo su to kuvi neya amjumovlavogawano. Aki punollu a'mwo abolo tonyu ibwaso'moneyokwe nekullabodowodo tonol kuvinono neya ibwasumwalanonogano.

⁸ Aki punol a'mwo abolo tonyu jurogudo duuwimwojo'moneyokwe nekullabodowodo tonol kuvinono neya duuwimwojumwalanonogano. Aki punol nemi poowokalago tokwe yanyago wimo'nyo'mo nekullabodowodo su tonol kuvinono yanyago neya wimo'numwalanonogano. Aki punol mido mollomwallo'moneyokwe nekullabodowodo tonol womdo su tovi guureji neya mujumovla'mwalanonogano. Aki punol a'mwo abolo pubuuraino kalo mamwonyo'moneyokwe tov nekullabodowodonogano. Toro nekullabodowodo su tokwe a'mwo abolo tobuurai kwiyo'mwoja'ji toga ilaiyo neya ibwosunmwalanonogano.

Nevu a'mwo abolo punyuno kalo buuropino neya winmwalano tovinokwono

⁹ Toro te kevu kemoro poowokalago kuunodo togai a'mwo abolo tonyuno kalo buuropino neya aikullunogawono. Aki ma'no ma'no pasudo tooraino kwoda'molo sumdo to'no yopi sugupasudo tonyuno'gwowi po'dogalo neya dogudupolarogaulo.

¹⁰ Aki kevu Krais toolluro a'mwo abolo avalo pubuuraino kemi poowokalago togai kalo buuropino neya duuwingovlavogaulo. Aki kevuge avalo tobuurai kwako tomuu'aro wiyopi ilaiyo to'no guureji neya domollomarogaulo.

¹¹ Aki kevu Aguto toolluro womdo tonyu momjumovlaiyo'mo tovino burawo nyumwalpiyo. Toro kugaikul kuruv kemi poowokalago kuunodo togai Aguto toolluro womdo tonyu guureji neya domomjumovlavogaulo.

¹² Toro momjumovlavopi lukomgu Gooti tooke yiunokuudo mujomwekovlaiyo'moneyokwe tovino kuudo yauropi ilaiyo subwosunpi tov buro'nyo buro'nyo tagunyodeyo baiki'mo'mdowo'jure toga guureji neya dodavogaulo. Aki toro togaikul Gooti toollu subusu'nyogalo wuujo'mo tovino kuudo nyallulo'gwonmwalpiyo. Toro kugaikul kuruv yiuwi'nokai toga neya duudumovlavogaulo.

¹³ Aki Gooti toolluro a'mwo abolo supto yodopure tobuurai kevu neya duuwiyo'mwojogaulo. Aki a'mwo abolo pumuuda'ai ton kemi abekuru'mapi tobuurai kevu ilaiyo to'no mollomaropi kemoro ago tonyu neya domollomwalogaulo.

¹⁴ A'mwo pworo kemi kaiyako saikullugolpi tov Gooti tool a'mwo su toorai tabunyuwuulo pun uubweyono'moneyokwe kevu deko nuudupiyo. Toro kuvi kuruv Gooti tool a'mwo su toorai nokwo wiyo'mwojoneyokwe kevu Gooti toollu deko neya duudogaulo.

¹⁵ A'mwo abolo pun ilaiyo nyubwosunpinogano. Toro ibwosunodopure su togai kevu ilaiyo aval'no neya jubwosunogaulo. Aki a'mwo abolo pun kalo'mo yopi kumdo dodopure toga kevu a'mwo abolo su togai kumdo nokwo dumwalpinogaikikono.

¹⁶ Kevu yiuwi'nokai a'mwo abolo togai sumwoluko aval'no neya wosunmwalpinogaikikono. Aki toro togaikul aro kuudo nyau'mwalpiyo. Oo nevu yovo agutokwe tonol pi'mwo kuudokwenogano. Su toro kuudo miyauropi kugaikul kuruv a'mwo abolo yovomaiyokwe tobuurai wuuru'maropi a'mwo abolo su tobuurogai neya yomjomwekovla'mwalpinogaikikono.

¹⁷ A'mwo pwol kemi ma'no ma'no saikullugolo'ji tov kevu a'mwo su toollu ma'no ma'no puru'monodo kuruv nuuwipiyo. Aro tovinokwono. Yiuwi'nokai a'mwo abolo ton kemino tov, Oo ilaiyo to'no yodupudodeyo, neya dupino'moneyokwe a'mwo kaiyako saikullugolo'ji su toollu kavo to'no duuwiyogaulo.

¹⁸ Kevnokwe tobuurekulluro yomjomwekovla'mwalpino tov arokwono. Buro'nyo buro'nyo jul'nyodeyo pun sumo'no'ji toga kevnokwe togaikul molo nyunpiyo. Toro kuvi kuruv sumwoluko kavo wosunyo'moneyokwe puuto puruv kurukweyo'mno'juki yiuwi'nokai togaikul kuvinono uumjunopi ilaiyo aval'no neya jomjomwekovlavogaulo.

¹⁹ Miyobuuravoo, a'mwo pworo kemi ma'no ma'no saikullugolpi tov kevu aro kuudo nyau'mwalpiyo. Oo nevnokwe tonol a'mwo su toorai mido neya amarano. Kevu su toro kuudo miyauropi nokwo wonyapino to'no jogaulo. Gooti tool ma'no ma'nodo tonyuno surodo wuunodowodo su toolno nokwo yovo'dogalonekono. Su toro tovino Gooti gavnokwe toolluro yogalo sakwollungiko puruv aro dodowodokwono. “A'mwo ma'no ma'no yodopure toorai mido mallo'moneyokwe tov mi anuwoso. Nuvnokwe toonyu mido noma'morogano.” Aguto tool toro dodowodekono.

²⁰ Toro tovino tov kevu Gooti toolluro yogalo sakwollungiko puvi neya duumjunogaulo. Yogalo sakwollungiko su tov arokwono. “Kemi ikomago tooro mujuko yodopure toorai kevu wosamujuko ton neya duuwiyogaulo. Aki kuuleyaluko yodopure toorai kevu wonyo ton neya duuwiyogaulo. Kevu su toro tomgu'aro sugolpi tov ikomago su tooro wogulo bwotonyo ibwosungovla'mwalpinorogano.” Sakwollungikokwono.

²¹ Toro te ma'no ma'nodo tov kemi nekuuwolo'mwalo'jo. Toro kuvi kuruv kevu ma'no ma'nodo tovi uuwoleyo'moneyokwe yiuno sugupasudo to'no neya domjumovlavogaulo. Kevu su toro supi togaikul ma'no ma'nodo tovi suvlo nokwo ilomavolmwalpinogaikikono.