Kuuguudo Sugudo akav Makolluro sakwollokakwono Mak 3 - Gooti Toolluro Yogalokwono

Jisasol Sabat toga a'mwo ato amuullugolopingikokwe pwollu sukuloka tovinokwono

¹ Iruko pullugwoji Jisasol Juu tooravuro i'bwo'nyago puvi aki aiko te aulomwalokaikono. Toro aulomwaloka su towai ato amuullugolopingikokwe pwol aulomwalokaikono.

² Toro kuulomwalno sumaiyokwe a'mwo kuwai aulomwalopo pworo Jisasolluno mojokuu'noso'mo winodupudo tooro aro kuudo souromuugonaroporogano. Jisasol Sabat akaga a'mwo toollu ikulonoldukono oo mikulonoldukono? Souromuugonaroporogano.

³ Toro yomuugona'dopure toga Jisasol ato amuullugolopingikokwe toollu, “Boulodavono,” kuudokaikono.

⁴ Toro iloda'mno sumaiyokwe Jisasol toro yomuugona'dopure toorai kuudokaikono. “Gooti toolluro loowo tovida'ai Sabat tollugwoji yowa'no yo'mo tov gado'mdeyo? Sugudo yano'mdukono oo kaiya'no yano'mdukono? Aki puruv a'mwo toollu wiyo'mwojano'mdukono oo nobollo'mo yodowo'jure toollu nokwo wonyapino yano'mdukono? Gado'mdeyo?” Kuudokaikono. Toro kuudoka tooro yogalo puruv maravoporogano.

⁵ Jisasol wonomollo'no toro tooraino surodo kwinokaikono. Kemoro poowokalago tov lumdo kuulopiyodopure tooraino kalo kwinokaikono. Toro tool ato amuullugolopingikokwe toollu aro kuudokaikono. “Gumi ato tov doruuguusapiyono.” Toro ruuguusapino sumaiyokwe gamoro ato tov yiuno sugudo to'no sumo'nokakwono.

⁶ Toro te Farasi tooro bolokwo'mno Herootolluro toorogai kuullu'bwo'nomwalo'mno Jisasollu adadomgu'aro yoromiyosanoldukoneyokwe tovino adovi'mwojosoporogano.

Kwolallo bwotonyo ton wonyo buugo wolo toru su'bwo'nopo tovinokwono

⁷ Toruda'ai Jisaseke'aro gami uumjunyokwe toorogai'aro tooro su toru wuugollu'movo'mno wonyo buugo toru'no avlavoporogano. Toro pla'mduke toollu Galilida'ai kwolallo bwotonyo ton kuumjunopogano. Aki Juudiyada'ai togai'aro

⁸ Jeruusalemda'ai togai'aro Iduumeyada'ai togai'aro wonyo Joodanovi igo'mguda'ai togai'aro wagwolago Tairuke Saidoonke su tovallu wobo toruda'ai togai'aro bwotonyago su ton Jisasolluro yoduke tovino wuu'no'mno abopogano.

⁹ Toro te Jisasol kwolallo tonyu wono'no nyetovonuwapipiyokwe gami uumjunyokwe toorai boot puruv wobo toru idowosupureyokweyo'mo kuudokaikono.

¹⁰ Jisasol a'mwo abolo noonyumwonyu nobollokwe bwotonyago tonyu sukulokaikono. Toro tovino tov a'mwo abolo nobollokwe bwotonyago pun uubogai'nyo'mo ton setowapiyopogano.

¹¹ Pun kuullo ma'no ma'nodo aulomwallungikokwe ton bodopure toga kuullo ma'no ma'nodo tooro Jisasollu wonodupudo toga Jisasolluro sumdollu toru bwolomuulo'na'dupu aro kuujajuporogano. “Guu Gooti toolluro kwolaiyekugono.” Kuujajuporogano.

¹² Toro wuudodopure kuvi kuruv Jisasol aro aduumjukullajukekono. “Kevu kuullo ma'no ma'nodo toorekul mino tov, Gooti toolluro Kwolaiyekono, a'mwo pworai muudupinono.” Yogalo guureji toro aduumjukullajukekono.

Jisasol a'mwo 12-pela toorai ajesoka tovinokwono

¹³ Toruda'ai Jisasol muumuudo pwolluno ilno sumaiyokwe a'mwo jeso'mo winoduke toorai adomarokaikono. Toro adomaroka tooro kwollomno aboporogano.

¹⁴ A'mwo abopo su tooro gavuge mwalopi a'mwo abolo punyu moruujo'moneyokwe morapiyonorogano. Toro morapiyo'mo tool a'mwo 12-pela toorai ajesokaikono. Toro ajesoka tooraino yovo tov gavnokwe tool, kuurotokweravo, sowarokarogano.

¹⁵ Aki toro tooro kuullo ma'no ma'nodo toorai nokwo modovomjapipino'moneyokwe gamoro jurogudo tov uubweyo'mo tool a'mwo su toorai ajesokaikono.

¹⁶ A'mwo 12-pela ajesoka tooraino yovo tov pwol Saimoonol. Toro toollu yovo muuduko sowaroka tov Pitalekono.

¹⁷ A'mwo pworaino yovo tov Sebediyolluro muugunyo Jemsollu ajesokaikono. Jemsolluro gagwai'yago Joonollu ajesokaikono. Toro todorallu yovo muuduko puruv sowaroka tov Boowanegesoralo sowarokaikono. Yovo su tovuro kavlo tov aro'mokwono. Kuuloulo yere ki'nodowodo to'busuko tooral sumwoluko su'mnodokweyorakoneyo'mokwono. Toro tovino sowarokarakono.

¹⁸ Aki pworaino yovo tov Adruu'weke'aro Filipeke'aro Batalamiyuuweke'aro Matyuu'weke'aro Toomaseke'aro Alfiyasolluro muugunyo Jemseke'aro Tadiyaseke'aro Selat Saimooneke'aro toorai ajesokaikono.

¹⁹ Aki Juudas Iskeriyooteke'aro ajesokaikono. A'mwo su tool Jisasollu kaiyako wiyo'moneyokwe ikomago toorai kuumalloka tookono.

A'mwo pworo Jisasolluno, “Belsebuulolluro jurogudo tokwe womdo amolladopiyo,” adopo tovinokwono

²⁰ Toruda'ai Jisasol gamoro ago mwalodowodo tomuuno aki aiko te bai'movo'no ago tovi aulomwalokaikono. Toro kuulomwaloduke toga a'mwo abolo bwotonyago ton aki aiko te abi'bwo'nopo tovino tov Jisaseke'aro gami uumjunyokwe toorogai'aro tooro wosamujuko tov ku'nono manoporogano.

²¹ Toro kuulomwaloduke toolluno gami avalo kuunodo ton puu'yogalo tovida'ai wuu'no'mno aro sajunopogano. “Oo imokakweyoldeyo.” Sajunopogano. Toro yajunyuno sumaveyokwe kwollu nogaibworomorabiyo'mo ton kemi ago Nasaretda'ai bolokwo'mno Jisasollomno wagwolago Kapurniyam'no abopogano.

²² Toro bodopure toga loowo tovino pi'mwo kuudokwe pworo Jeruusalemda'ai wolabo'mno Jisasolluno aro ajunoporogano. “Kuullo ma'no ma'nodo Belsebuulol kuuluumwalodowodo tookono. Toro tool kuullo ma'no ma'nodo tooravuro aguto kuunodo mollomwallo Belsebuulolluro jurogudo tokwe tool kuullo ma'no ma'nodo toorai modukwopiyokwekono.” Ajunoporogano.

²³ Toruda'ai Jisasol a'mwo abolo tonyu gamiyomno mollu'bworo'no yovekurajo kuuguudo togai aro kuudokaikono. “Satanyol gavnokweyollu adado bilomodukwopinonoldeyo? Awiyo. Ku'nono mabilomodukwopinonekono.

²⁴ Aki kantri puru'monodo tov jopolosunowo'ji molo suno'ji tov ku'nono mamjomwekovlawonokwono.” Kuudokaikono.

²⁵ Toro wuujuno sumaiyokwe aki puruv aro kuudokaikono. “Ago puusuda'ai tonumdoto jopolosunopi molo sunpi tov ku'nono mamjomwekovlapinonumdotogano.”

²⁶ Aki puruv aro kuudokaikono. “Satanyolluro tooro kevnokwero jopolosunopi molo sunpi tov guureji mamjomwekovlapinorogano. Yere younopipinorogano.

²⁷ Aki kuuko pwol a'mwo jurogudo toolluro kuto ivito pun kuulomallo'mo tool a'mwo jurogudo tool ago tovi kuuno kuulomwalodowo'jure toga ku'nono maulomaronekono. Toro kwol kuruv a'mwo jurogudo toollu wuulo me'no galogullosowo'ji toga'no'gwowi ago tovi nokwo kuulawo'ji kuulomaronekono.” Kuudokaikono.

²⁸ Toro wuujuno sumaiyokwe aro kuudokaikono. “Nuu nebal'no ikudumo'mokwono. A'mwo tooravuro yiuwi'nokai ma'no ma'no pasudo togai'aro Gooti toolluno burolyogalo adupi kugai'aro yiuwi'nokai su tonyuro kirumwallo tovi Gooti tool nokwo modukwopiyonekono.

²⁹ Toro kuvi kuruv a'mwo pwol Gooti toolluro Kuullo toolluno burolyogalo ado'ji to'gwowi ma'no ma'nodo su tovuro kirumwallo tovi mamodukwopiyowo'ji yiunokuudo mujo'movla'mwalonokwono.” Kuudokaikono.

³⁰ Su toro kuudoka tov aro tovinokwono. Loowo tovino pi'mwo kuudokwe tooro, “Jisasolluno tov kuullo ma'no ma'nodo tool kuuluumwalodowodo tooldeyo,” adopo tovino tov Jisasol toro kuudokaikono.

Jisasollu ganeyago gagwai'yago wimo'nodupudo tonyunokwono

³¹ Toruda'ai Jisasolluro ganeyago tokwe'aro gagwai'yago toorogai'aro ton bai'movo'mno kwa'mgu toruda'ai kuuroto aulodopiyapogano.

³² Toro kuulodopino sumaveyokwe Jisasol a'mwo abolo tonyuro akuuto tomuu kuulomwaloduke toollu a'mwo pworo kuudoporogano. “Doonono. Gumi juneyago tokwe'aro jugwai'yago toorogai'aro ton gumi gwonyo'mo kwa'mgu tomuu amwakovo.” Kuudoporogano.

³³ Toro kuudopo tool aro kuudoganokaikono. “Mi nyuneyago nyugwai'yago nyumo'nodupudo su ton ala'mwovodeyo?”

³⁴ Toro wuudoganyuno sumaiyokwe a'mwo abolo wobo toru mwalodopure tonyu wono'no aro kuudokaikono. “Kevu doonyulo. Mi nyuneyago nyugwai'yago anyumo'nadokwopo togaikul akawai amwakovo.” Kuudokaikono.

³⁵ Toro wuujuno sumaiyokwe kuudokaikono. “A'mwo abolo Gooti toolluro ilaiyo winodowo'jure tovi uumjunodupudo su ton mi nyugwai'yago nyo'mwo nyuneyago nyumo'nodupudogano.” Kuudokaikono.