Kuuguudo Sugudo akav Makolluro sakwollokakwono Mak 1 - Gooti Toolluro Yogalokwono

Wonyo galuvollokwe Joonol a'mwo abolo tonyu kuuguudo amoruujajuko tovinokwono

¹ Kuuguudo sugudo akav Gooti toolluro kwolaiyo Jisas Kraisollunokwono. Toro tov muudu'nodo toga aro sumo'nokakwono.

² Aiyoga proofet Aisaiyal Gooti toolluro yogalo puruv aro sakwollokaikono. “Duu'nono. Nuvu moro a'mwo modomollokwe pwollu morapiyo'mi gumi sumdomgu wanonekono. Toro tool wanowo'ji guvu a'mwo abolo tonyu wuuru'mallo'moneyokwe puuto tovi yovo'dogalagubweyonekono.

³ Toro tool kwako a'mwomaiyo kuu'maiyo tomuu modomollodowo'jure toga gamoro deko tov aro dodowo'jure tovi wuu'nupinekono. Aguto tool nobaiki'mowono toolluno'mo jovo'dogallunyulo! Toro toolluno puuto tov ido'nyuno jovo'dogalubweyulo. Toro dodowo'jure toollu wuu'nupinekono.”

⁴ Aisaiyalluro toro sakwollungiko kuvino Wonyo Galuvollokwe Joonol kwako a'mwomaiyo kuu'maiyo tomuu bai'movo'no aro amoruujajukekono. “Kevu Gooti toollomno kuudo souragunyumo'nupi tov Gooti tool kemi ma'no ma'nodo tovuro kirumwallo tovi nomodukwopiyonekono. Aki kemoro kuudo me'no souragunyumo'nupi su tovino duuwallo'moneyokwe wonyo buuvollunyulo.” Kuujajukekono.

⁵ Joonol toro galuvolloduke toga yiuwi'nokai Juudiyada'ai toorogai'aro Jeruusalemda'ai toorogai'aro tooro Joonollomno aboporogano. Toro tooro kemi ma'no ma'nodo tonyuno dodowiyoku'bworosuno'mno Joonol wonyo Joodanovi agaluvollokarogano.

⁶ Joonol youro pun sa'ai kemel tooravuro ato tokwe kiwiyakwollodupudo ton sesajukekono. Aki ibesa'aiyo tooravuro kulako tonyuda'ai sakwollungiko muulo tokwe sesajukekono. Wosamujuko ton tomabore'bore toorogai'aro tamwallugwolamdo tooravuro podopto togai'aro anyajukekono.

⁷ Toro tool aro amoruujajukekono. “Lukomgu mi anuwolo'mwalluko pwol nobwonekono. Toro abwo'ji su tool aguto kuunodekono. Toro toolluro suulpweyo tovi nuu tekwonyuno'gwowi suduko inuguto'no'mi mollurolopiyo'mo tov ilaiyekwonyumaiyo.

⁸ Nuvu wonyo tokwe mogalaikuvollodumdo kuvi kuruv mi lukomgu abwo'ji toolno'gwowi wonyo tokwe kemi mamogalaikuvollonekono. Toro kwol kuruv nomogalaikuvollo'mo tool Gooti toolluro Kuullo toolluda'ai mogalaikuvollonekono.” Joonol toro sodubwasajukekono.

Joonol Jisasollu wonyo tovi amogaluvolloka tovinokwono

⁹ Toro yodubwasoduke toga iruko su tollugwoji Jisasol proovins Galili tomuu wagwolago Nasaretda'ai wuugollu'movo'no Joonollomno avlavokaikono. Plaino sumaiyokwe abuuru'maroka toollu Joonol wonyo Joodanovi agaluvollokaikono.

¹⁰ Toro galuvolluno sumaiyokwe Jisasol wonyo tovida'ai biloda'mduke kuga'gwo kuuno sulugumdo tov kuusoda'mduke tovi kwonokaikono. Gooti toolluro Kuullo tool dokato sobuuro pwolbusuko wolabino sumaiyokwe Jisasollu abwolomwalokaikono.

¹¹ Yogaimaguurai puruv sulugumdo tovi muunyu tomuuda'ai aro adokakwono. “Guvu moro Kwolaiyo kalo buuropino nyunodumdo tookugono. Toro tookujuno ilaiyo bwotonyo sumono.” Adokakwono.

Satanyol Jisasollu yamju kwiyoganoka tovinokwono

¹² Toruda'ai kuga'gwo kuuno Gooti toolluro Kuullo tool Jisasollu kwako a'mwomaiyo toru'no amollo'mwojapiyokaikono.

¹³ Jisasol kwako a'mwomaiyo toru iruko 40-pela tobuullu mwaloduke toollu Satanyol yamju abuuwiyoganyajukekono. Toro tomuu ibesa'aiyo kuulludaiyo tooro mwalodopure su tomuu Gooti toolluro ensel tooro amollovi'mwojomwallajupekono.

Jisasol proovins Galili towai womdo muudu'no soka tovinokwono

¹⁴ Toruda'ai Joonollu wuulo killo'mo ago tovi amerosopekono. Me'no merosuno sumaveyokwe toga Jisasol Galili'no aikomgu bo'no Gooti toolluro kuuguudo sugudo tokwe amodomollajukekono.

¹⁵ Toro tool aro sodubwasajukekono. “Aga'no me'no ajesungiko tov kuvinono bai'meyo'mo sadopiyo. Aguto kig Gooti toolluro mido mollomwallo yodowodo tov aga nobai'mowono'mokwono. Toro te kevu Gooti toolluno kuudo youragunyumo'nopi kuuguudo sugudo tovi kuudo duubweyulo.” Kuujajukekono.

Jisasol a'mwo aral aral toorai wuudo'no kuumjunopo tovinokwono

¹⁶ Toruda'ai Jisasol wonyo buugo Galili wolo toru plaino sumaiyokwe a'mwo pudorallu kwonokaikono. Toro todoralluno yovo tov pwol Saimoonolekono. Aki pwol Adruu'wolekono. Toro todoral domwoga ki'nomallo'mo tov kuurowabwollo'moneyokwe kuto tonyu wonyo buugo tovi wolowopiyodole toorallu kwonokaikono. Toro todoral domwoga ki'nomallokweyorakono.

¹⁷ Toro todorallu Jisasol aro kuudokaikono. “Donumjunyulo. Nuvu me'no sekubwasumi toga kevu domwoga ai'noma'mwakulo to'busuko kubalno a'mwo abolo tonyu de'noma'bullunorakikono.” Kuudokaikono.

¹⁸ Toro wuujuno sumaiyokwe kuga'gwo kuuno a'mwo su todoral kemi kuurowabwollo'mo kuto tonyu yogallu'mo'mno sumaleyokwe kuumjunolorakono.

¹⁹ Jisasol toro doma'no sumaiyokwe kuru'gwo plavo'no kwonoka tov Sebediyolluro kwolaiyo Jemseke Jooneke todorallu kwonokaikono. Toro todoral kemi boot tovi muunyu toru ilomwalolno domwoga kuurowabwollo'mo kuto adobiyopiyopo tonyu meyaguunodole todorallu kwonokaikono.

²⁰ Wonyuno sumaiyokwe kuga'gwo kuuno Jisasol aro adomarokaikono. “Donumjunyulo.” Toro adomaroka tooral kemi kuunumiyago Sebediyol gamoro womdokwe toorogai tooro boot tovi muunyu toru kuuno mwalodopure toorai wuugollu'mo'mno sumaleyokwe Jisasollu kuumjunolorakono.

A'mwo pwolluro kuullo ma'no ma'nodo kuulomwaloduke toollu Jisasol amodovomjapiyoka tovinokwono

²¹ Toro tooro plaino sumaveyokwe wagwolago Kapurniyam'no avlavoporogano. Toro plaino sumaveyokwe Sabat abai'movoka tollugwoji Jisasol Juu tooravuro i'bwo'nyago tovi kuula'no a'mwo abolo tonyu sodubwasajukekono.

²² Toro tool loowo tovino pi'mwo kuudokwe toorobusuko miyodubwasajukekono. Toro kwol kuruv a'mwo jurogudo kuunodokwe pwolbusuko sodubwasajukekono. Toro ibwasoduke tovi a'mwo abolo ton wuu'no'mno luko morumoukuropi soporogano.

²³ I'bwo'nyago te kuuno kuulomwaloduke toga a'mwo kuullo ma'no ma'nodokwe pwol deko aro auladokaikono.

²⁴ “Nasaretda'ai Jisasoloo, guvu buro'nyo'mo amodekudeyo? Nemi kaiyako mollowuunonekwapiyo'mo amodekudeyo? Nuu gumino kuudo nyaguu'mwakono. Gooti toolluro kwolaiyekugono. Gooti toolluro sugudo kuunodo tookudeyo kuudo saguu'mwakono.” Kuudokaikono.

²⁵ Toro kuudoka toollu Jisasol aro amojurugolokaikono. “Guu yogalo madubiyo. Buugollu'mokalokwono.” Amojurugolokaikono.

²⁶ Toro amojurugoloka tovi kuullo ma'no ma'nodo tool a'mwo toollu gudogwabo mollo'no deko bwotonyo juno sumaiyokwe abuugollu'mokalokwokaikono.

²⁷ A'mwo abolo ton toro tovi wono'mno aro sajunopogano. “Awi, a'mwo jurogudokwe akalluro sodonekubwasadopiko akav kuuguudo muuduko purukwe jukiyodonekubwasadopiyo? Toro tool kuullo ma'no ma'nodo kworai kuruv kuuwolo'mwallo. Aki toro toolluro duuwiyodowo'jure toga kuullo ma'no ma'nodo tooro kwollu uumjunyokwerogano.” Toro sajunopogano.

²⁸ Jisasolluro soka su tovino yiuwi'nokai proovins Galilida'ai tooro abiyojungoulapokwono.

Jisasol Pitalluro ganyalum tovi sukuloka tovinokwono

²⁹ Toruda'ai i'bwo'nyago tovida'ai abolokwoporogano. Toro abolokwopo kuga'gwo kuuno Saimooneke Adruu'weke tooralluro ago tomuuno avlavoporogano. Aki Jemseke Jooneke tooral kworake plavo'mno ago tovi aulaporogano.

³⁰ Saimoonolluro ganyalum tov kula'du'nobollo wo'duke tovino a'mwo abolo ton Jisasollu kuudopogano.

³¹ Jisasol toro tovino bino sumaiyokwe gamoro ato tovi'aro amoduko'bworapiyokaikono. Toro amoduko'bworapiyoka toga gamoro kula'du'nobollo tov kuugollu'movokakwono. Toro wuugollu'mo'mno sumaiyokwe abolo tov a'mwo tooraiyo'mo wosamujuko pun sovroubweyokakwono.

Jisasol a'mwo abolo bwotonyago tonyu sukullajuko tovinokwono

³² Kuujo tool me'no kwolomwoloka sulato toga a'mwo abolo ton kemi a'mwo abolo nobollokwe togai'aro kuullo ma'no ma'nodokwe toorogai'aro yiuwi'nokai su tonyu Jisasollomno amokabopogano.

³³ Toro mokabo'mno yiuwi'nokai wagwolago su toruda'ai ton anoullo wobo toru abi'bwo'nopogano.

³⁴ Toro bi'bwo'nodopure toga Jisasol nobollokwe amokabopo bwotonyago tonyu sukulokaikono. Aki kuullo ma'no ma'nodo bwotonyago toorai amodovomjapiyokaikono. Toro ikuloduke toga kuullo ma'no ma'nodo tooro Jisasolluno aro kuudo me'no sauropekono. Akal Krais tooldeyo. Toro sauropo tovino Jisasol kuullo ma'no ma'nodo toorai, “Madupinono.” Kuujajukekono.

Jisasol Galili tomuu amodomollajuko tovinokwono

³⁵ Toruda'ai lomwo iru'mago kuujo tool milopiyaboduke toga Jisasol dukavo'no ago toru wuugollu'mo'mno sumaiyokwe a'mwomaiyo pumuuno avlavokaikono. Plaino sumaiyokwe subusu'nyogalo adokaikono.

³⁶ Toro doduke toga Saimooneke'aro gamoro ibwoto'nyo toorogai'aro tooro Jisasolluno a'mgono soporogano.

³⁷ Me'no yo'mgonomaro'mno aro kuudoporogano. “Yiuwi'nokai a'mwo abolo ton gumino a'mgono sumwakovo.” Kuudoporogano.

³⁸ Toro toorai Jisasol aro kuudokaikono. “Nuu yiuno a'mwo abolo su to kunyuno moruujo'moneyokwe abonyumaiyo. Toro kwonyu kuruv Gooti toolluro yogalo tokwe wagwolago pumuuda'ai kunyu kuruv moruujo'moneyokwe abumwakonyugono. Toro tovino tov wagwolago woboruda'ai punyuno avlawano.” Kuudokaikono.

³⁹ Toro ino sumaveyokwe Galili towai Juu tooravuro yiuwi'nokai i'bwo'nyago go'no go'nodo tonyuno avlavoporogano. Toro plaino sumaveyokwe Jisasol yodubwasodowo kuullo ma'no ma'nodo tooro a'mwo pworai kuulomwalodopure toorai amodovomjapiyajukekono.

Jisasol a'mwo wonawiyo nobollo bwotonyokwe pwollu sukuloka tovinokwono

⁴⁰ To'no'gwowi a'mwo wonawiyo nobollo bwotonyokwe pwol Jisasollomno abokaikono. Bino sumaiyokwe Jisasollu suduko winuguto'no'no aro wuudoganyuno wuudoganyuno sokaikono. “Guu donyukulunoo. Guu mi nyukullo'mo tookuno'ji nokwo'mekugono.” Kuudokaikono.

⁴¹ Jisasol toro toolluno kalo winoduke tool ato uubogai'no'no aro kuudokaikono. “Yowa'noganoo. Nuu kuvinono imonyugono. Aga agujukulmono.” Kuudokaikono.

⁴² Toro kuudoka kuga'gwo kuuno wonawiyo nobollo su tov wuugollu'movo'no a'mwo toolluro kulako tov ilaiyo aiko te sumo'nokakwono.

⁴³ Toro toollu Jisasol duudapi yogalo guureji aro amodapiyokaikono.

⁴⁴ “Guu a'mwo toorai muudubinekugono. Toro kweku kuruv moro agujukulmo tovino wuuduuwallo'mo tooku aro ibinekugono. Guu Moosesolluro puukwollo aro sakwolloka tovi neya duumjunono. A'mwo wonawiyo nobollokwe me'no sukullungiko tool pris toollomno plawo'ji wuuduuwallunonekono. Toro wuuduuwallunowo'ji toga Gooti toollu wiyo'moneyokwe dokato pworallu neya aromiroudapiyono. Moosesolluro toro sakwollungiko kuvino neya ibinekugono. Toro yodo'bure toga pris tool gwonowo'ji kuudo yaguuronekono. Oo wonawiyo nobollomaiyo tooldeyo. Yaguuronekono. Toro tovino'mo dovlavono.” Jisasol a'mwo wonawiyo nobollokwe toollu me'no ikulo'no kuga'gwo kuuno toro amodapiyokaikono.

⁴⁵ Toro amodapiyoka kwol kuruv kuu'maiyo toru'no amoruudomollokaikono. Toro amoruudomolloka tovino tov Jisasol wagwolago puru'no kuullo'mo tool sugwonyu toru'no ku'nono maullajukekono. Toro kwol kuruv a'mwo tooro mamwalodopure tomuuno'gwowi amwallajukekono. Toro mwaloduke toollomno yiuwi'nokai tomuuda'ai tooro bodupu abuuru'mallajupekono.