Mollurolovomato 4 - Gooti Toolluro Yogalokwono

Gooti tool gamoro jurogudo tonyu wuuduuwallo'moneyokwe Moosesollu kwiyoka tovinokwono

¹ Toro kuudoka tovi Moosesol kuudokaikono. “Toro kuvi kuruv Isuraiyolda'ai ton moro yogalo kuudumi tovi kaduko manyopi kuudo manubwepi to'gwowi adado imonyudeyo? Aki toro ton, “Gooti Yawel mabiyagulo'numokaikugono,” anyudupi kuruv adado imonyudeyo?” Kuudoganokaikono.

² Toro kuudoka tovi Gooti Yawel kuudoganokaikono. “Gumoro ato tovi amworakudo su tov buro'nyo'mdeyo?” Toro kuudoganoka tovi Moosesol kuudokaikono. “Yodeko tov amworakono.”

³ Toro kuudoka tovi Gooti Yawel kuudokaikono. “Yodeko amworakudo su tov kwako tovi duumwogapiyono.” Toro kuudoka tovi Moosesol yodeko kuumwogapiyoka tov gabakuto sumo'nokakwono. Toro te Moosesol gabakuto toollu wonyuno sumaiyokwe luko yo'no manyu toru'aro sovo'bworodavokaikono.

⁴ Toro sovo'bworodavoka kwollu kuruv Gooti Yawel kuudokaikono. “Gumoro ato tov kwako tovi wolopiya'bi gabakuto toollu suwiyo tovi'aro dogalomworarono.” Toro kuudoka tovi Moosesol nogalomwora'duke toga gabakuto su tool yodeko aiko te sumo'nokakwono.

⁵ Toro imo'nyuno sumaiyokwe Gooti Yawel kuudokaikono. “Guu Isuraiyolda'ai tooraiyomno avla'bi toga su toro kuuduuwallubi tovi wonopi kuudo yaguupinogano. Oo nebalo'mdeyo. Nemi nellukweyago Eburaiyameke Aisakeke Jekoopeke tooravuro Gooti Yawel abwiyalo'numokaldeyo. Yaguupinogano.” Kuudokaikono.

⁶ Aki toruda'ai Gooti Yawel Moosesollu aro kuudokaikono. “Gumi pollo puruv nobwaiyo tovi anakuuto tomuu jopuuromworarono.” Toro kuudoka tovi Moosesol gami pollo puruv nobwaiyo tovi tomuu sopuuromworarokaikono. Toro sopuuromworaroka tovi aki aiko te ki'nomaro'no gamoro pollo tov wonawiyo kuumwiyokwe sumo'noka tovi kwonokaikono. Wonawiyo su tov kunaikwoljo kulako to'no moropiyoduke tovi kwonokaikono.

⁷ Toro wonyuno sumaiyokwe toga Gooti Yawel kuudokaikono. “Gumi pollo tov nobwaiyo tovi tomuu aki aiko te jopuuromworarono.” Toro kuudoka tovi Moosesol gamoro pollo tov nobwaiyo tovi tomuu sopuuromworarokaikono. Toro sopuuromworaroka tovi aki aiko te ki'nomaro'no gamoro pollo tov pollo pumuuda'ai sugudo to'busuko aiko te sumo'noka tovi kwonokaikono.

⁸ Toruda'ai Gooti Yawel Moosesollu kuudokaikono. “Isuraiyolda'ai ton duuwallo muudu'nodo tovi kwonpi toga gumi kaduko magujupi kuudo magubwepi tov duuwallo lukomguda'ai tovi wuuduuwallubinekugono. Toro kuuduuwallubi toga'no'gwowi kuudo nokwo gubwepinogano.

⁹ Toro kuvi kuruv yiuwi'nokai duuwallo su tovallu me'no kwonpi toga gumi kuudo magubweyopi aki kaduko magujupi to'gwowi guu aro ibinekugono. Guu wonyo Nailovida'ai pun iromaro'bi kwako yalukullo toru kimowosubinekugono. Wonyo aimowosubi su tov muja'buugo imo'nowo'ji kwako tovi muunyu toru woronokwono.” Kuudokaikono.

¹⁰ Toro kuudoka kuvi kuruv Moosesol Gooti Yawellu aro kuudokaikono. “Agutoloo, nuvno'gwowi yogalo pi'mwono majokwenyugono. Aiyoga yogalo pi'mwono majajekwonyugono. Aki aga guu me'no anyudumado kuga kuruv aval'no jokwenyugono. Toro tekwonyu moro mago tov tago nyunodowo yogalo tov kavo kavo jokwenyugono.”

¹¹ Toro kuudoka toollu Gooti Yawel kuudokaikono. “A'mwo abolo tonyuro mago tovi ala'mwolluro yokwollosodowododeyo? Aki a'mwo yogaimajokwe toorogai'aro kadu'nollukullokwe toorogai'aro sumdo kinodupudo toorogai'aro sumnowojokwe kworogai'aro yiuwi'nokai su toorai ala'mwolluro yokwollosodowodorodeyo? Yiuwi'nokai su toorai yakwollodowodo tool nuu Gooti Yawel toonyunodokwono.

¹² Toro tovino tov guu neya dovlavono. Guu avla'bi toga nuu gujo'mwojo'mi gumoro kuuguudo jo'mo tov nuvnokwenyuro yodogubwasodo'mure tovida'ai to'no nokwo wuudubinekugono.” Kuudokaikono.

¹³ Toro kuudoka kuvi kuruv Moosesol kuudokaikono. “Mi Agutoloo, nuu ku'nono mavla'mekwonyugono. Guu a'mwo pwollu neya domodapiyono.” Kuudokaikono.

¹⁴ Toro kuudoka tovi wuu'nyuno sumaiyokwe Gooti Yawel Moosesolluno surodo wuuno'no aro kuudokaikono. “Guu gumi judai'yago Eroonol Livaiyolluro iko tovasuda'ai su toolluno adado kuudo jau'mwakuno? Nuu a'mwo su toolluno aro kuudo yau'dumdekono. Kuuguudo ilaiyo to'no dodowodoldeyo. Yau'dumdekono. Aki toro tool aga gumiyomno abadopiyo. A'mwo su tool boguru'marowo'ji agwono'ji toga ilaiyo bwolato yonekono.

¹⁵ Toro toollu guu kuuguudo wuudodo'bure tovida'ai a'mwo abolo tonyu nokwo wuudonekono. Toro te yiuwi'nokai todorakulluro wuujo'mo tov nuu nekullo'mwojumonyugono. Aki kemoro nyubulluno ton nuu nyekubwasumonyugono.

¹⁶ Toro te gumoro kuuguudo tov gumi judai'yago toolluro sumdo tovi Gooti toolluro kuuguudo to'busuko wimo'nonokwono. Toro tool gumoro mago tovino aiko toru marowo'ji guu kuuguudo wuudodo'bure tovi a'mwo abolo tonyu moruudonekono.

¹⁷ Toro te aga guu gumi yodeko tokwe momworaro'bi duuwallo jurogudo pun wuuduuwallo'mo domokavlavono.” Gooti Yawel Moosesollu toro kuudokaikono.

Moosesol Ijup'no aikomgu avlavoka tovinokwono

¹⁸ Toruda'ai Moosesol me'no wuu'nyuno sumaiyokwe ganyalumiyago Jetroo'wollomno aikomgu avlavokaikono. Toro plaino sumaiyokwe Jetroo'wollu aro kuudoganokaikono. “Nuuge avalo ton kuuno dukomwakoveyokwe wonyo'mo tov nuu Ijup'no pla'mdo'mure toga nokwo nuwonyapino ibinekudukono?” Toro kuudoganoka tovi Jetroo'wol Moosesollu kuudokaikono. “Ilaiyokwonoo, guu sumwoluko kavo wosuno'bi nokwo dovlavono.” Kuudokaikono.

¹⁹ Toruda'ai Moosesol yere muugollu'movo'no Midiyan toru kuuno mwaloduke toollu Gooti Yawel aro kuudokaikono. “Sumdomgu Ijupda'ai a'mwo pworo gumi noromiyagubweyo'mo agujajupo su tooro me'no aboloporogano. Toro te aga guu Ijup'no aikomgu neya dovlavono.” Kuudokaikono.

²⁰ Toro kuudoka tovi Moosesol gami abolo tokwe'aro gami kwolaiyo toorake'aro tonotai gami doonki pwollu muunyu toru ilomorumwalluno sumaiyokwe Gooti toolluro yodeko kuudoka tokwe momworaro'no Ijup'no aikomgu avlavoponumdotogano.

²¹ Toro pla'mdopure toga Gooti Yawel Moosesollu aro kuudokaikono. “Guu Ijup toru ai'mo'bi toga moro yiuwi'nokai duuwallo tonyu Feroo toolluro sumdo tovi kuvinono neya wuuduuwallubinekugono. Toro kuuduuwallubi kwol kuruv moro yodo'mure tovida'ai Feroo tool gamoro poowokalago tov lumdo kuulopiyowo'ji a'mwo abolo tonyu mirolowapiyonekono.

²² Feroo tool toro yodowo'jure toga aro duudono. “Gooti Yawel aro agudadopiyo. “Isuraiyolda'ai a'mwo abolo ton moro kwolaiyo sujuraiyo pwolbusuko anyumo'nadokwovo.

²³ Toro te moro kwolaiyo sujuraiyo pwolbusuko anyumo'nadokwopo su ton mino ilomonuwopiyo'moneyokwe neya jurolowapiyono. Toro me'no agudumo kweku kuruv guu manuu'nyubusuko yodum moro kwolaiyo sujuraiyo toolbusuko nyumo'nodupudo su tonyu kaiyako igollo'mo tooku mirolowapimodekugono. Toro tovino tov nuu kwonyu kuruv gumoro kwolaiyo sujuraiyo toollu kaiyako igolo'mi noromiyosumekono.” Gooti Yawel toro agudadopiyo.” Duudono.” Kuudokaikono.

²⁴ Gooti Yawel toro wuujuno sumaiyokwe Mooseseke tonumdoto Ijup'no avlavopogano. Toro tonumdoto kuuno plaino sumaveyokwe puuto tomuu kworopogano. Toro wo'dopure tomuu Gooti Yawel Moosesollu buuru'ma'no sumaiyokwe romiyoso'mo kwinokaikono.

^25-26 Toro kuvi kuruv Moosesolluro abolo Supoorav amuugo sulo puul maro'no gami kwolaiyo toolluro lakulkulako tovi modovoma'no sumaiyokwe Moosesolluro suulwuuduwago tovi kuubweyokakwono. Toro uubweno sumaiyokwe gamoro kwolaiyo toolluro lakulkulako amadovoka tovino tov gami kwolo toollu aro kuudokakwono. “Aga'no'gwowi mujako abwolmoka su tovi'aro guu mi kwolo nyumo'numwalbinekugono.” Kuudokakwono. Toro te lakulkulako adovomaroka tovi Gooti Yawel wonyuno sumaiyokwe Moosesollu maromiyosokaikono.

²⁷ Toruda'ai Gooti Yawel Eroonollu aro amodapiyokaikono. “Guu kwako a'mwomaiyo kuu'maiyo toru'no plavo'bi Moosesollu duuru'marono.” Toro amodapiyoka tool avlavokaikono. Plaino sumaiyokwe Gooti toolluro muumuudo towai Moosesollu wuuru'maro'no gamoro suwado tovi molluduuduulo amollokaikono.

²⁸ Toro molluno sumaiyokwe Moosesol Gooti Yawelluro yiuwi'nokai kuuguudo kuudoka tonyuno Eroonollu kuudokaikono. Aki Gooti Yawelluro yiuwi'nokai duuwallo jurogudo wuuduuwalloneyokwe kunyuno kuruv Moosesollu me'no aduuwiyokaikono. Toro aduuwiyoka togai'aro Eroonollu kuudokaikono.

²⁹ Toro wuujuno sumaiyokwe Mooseseke'aro Erooneke'aro todoral avlavolorakono. Toro todoral Ijup toru ki'movolno Isuraiyolda'ai mido mollomwalokwe toorai amollu'bworomwallolorakono.

³⁰ Toro mollu'bworumwalluno sumaleyokwe Eroonol Gooti Yawelluro Moosesollu yiuwi'nokai kuuguudo kuudoka ton amoruudokaikono. Toro moruujuno sumaiyokwe a'mwo abolo tonyuro sumdo tovi duuwallo jurogudo togai'aro kuuduuwallokaikono.

³¹ Toro kuuduuwalloka su tonyu wonoma'no sumaveyokwe Eroonolluro kuuguudo kuudoka tonyu kuudo kuubweyopogano. Aki aro tovino kuu'nopogano. “Oo Ijupda'ai tooro kaiyako yaikullugolodopure tovi Gooti Yawel ikwonodowo kuudo yaikuu'dowodekono.” Toro tovino Isuraiyolda'ai ton wuu'nyuno sumaveyokwe kemi mido ton lugulo'naro'mno Gooti Yawelluno sulomoropiyapogano.