Mollurolovomato 2 - Gooti Toolluro Yogalokwono

Kwolaiyo muudoga Moosesollu maromiyopo tovinokwono

¹ Su toro toga a'mwo Livaiyolluro iko tovasuda'ai pwol gami avalo iko tovasuda'ai abolo puvi amarokaikono.

² Toro malluno sumaiyokwe abolo tov kwolaiyo sumwoluko imo'no'no kwolaiyo pwollu amulomworarokakwono. Kwolaiyo muudoga toollu wonyuno sumaiyokwe sajunokakwono. Sugumalukekono. Toro yajunyuno sumaiyokwe yiulo amollajukokwono. Yiulo molluno sumaiyokwe lobako pworapwol kuuwolo'nokakwono.

³ Toro kuuwolo'noka toga'no'gwowi yiulo ku'nono mamollokakwono. Toro te kwolaiyo su toollu ganeyago tov basket puruv maro'no kwolaiyo toollu basket tovi anakuuto tomuu kuullurosuno sumaiyokwe wonyo Nailovi wolo toru yemiyo womdo tomuu aulopuurosokakwono. Basket su tovi wonyo noulawo'jokwe gwomalo tokwe aluvomuugutowopiyokakwono.

⁴ Toro kuulopuurosuno sumaiyokwe kwolaiyo toollu jo'mwo tov adado wimo'nonoldukoneyokwe manyu toruda'ai amuugonodaiyajukokwono.

⁵ Toro muugonoda'duke toga Ijupda'ai Feroo toolluro taiyo tov gami kulako tovi yal'mo'nyo'moneyokwe gami womdokwe sujuraiyo togai wonyo tovino kwolapogano. Toro wolno sumaveyokwe gami womdokwe sujuraiyo ton wonyo wolo toru yomollodopure toga Feroo toolluro taiyo tov wonyo tovi yal'mo'no'no basket tov yemiyo womdo tomuu wo'duke tovi kwonokakwono. Toro wonyuno sumaiyokwe basket tovi amorapureyokweyo'mo gami womdokwe sujuraiyo puvi amodapiyokakwono. Toro amodapiyoka tov basket tov aluvomokabokakwono.

⁶ Toro luvomokabino sumaiyokwe Feroo toolluro taiyo tov basket tovi kuuso'no kwolaiyo muudoga i'na'duke toollu kwonokakwono. Toro wonyuno sumaiyokwe kwolaiyo tool kumdo doduke toollu wono'no kalo kwinokakwono. Toro tov aro adokakwono. “Oo kwolaiyo muudoga akal Hibruuda'ai tonyuro kwolaiyoldeyo.” Adokakwono.

⁷ Toro doduke toga kwolaiyo toollu jo'mwo tov Feroo toolluro taiyo tovi aro abuudoganokakwono. “Nuu plavo'mi Hibruuda'ai abolo tonyuda'ai puruv kwolaiyo akallu amdo yausumwalono'moneyokwe yowa'no yo'mgonoma'mo'mideyo?” Kuudoganokakwono.

⁸ Toro kuudoganoka tovi Feroo toolluro taiyo tov kuudokakwono. “Tade, toro nokwo ibinokwono.” Toro kuudoka tov kwolaiyo toollu jo'mwo tov plaino sumaiyokwe kwolaiyo toolluro ganeyago tovi adomarokakwono.

⁹ Toro adomaroka tovi Feroo toolluro taiyo tov aro kuudokakwono. “Guu mi kwolaiyo akallu mollomwalo'bi amdo yausumwalbinekono. Toro yodo'bure tovino nuu mubiyo nogujumwalme'gono.” Kuudokakwono. Toro wuujuno sumaiyokwe ganeyago tov kwolaiyo toollu maro'no amdo yausodowo amollomwallajukokwono.

¹⁰ Toro mollomwalno mollomwalno sumaiyokwe kwolaiyo tool kuru'gwo aguto agullokaikono. Toro toollu ganeyago tov momwora'no sumaiyokwe Feroo toolluro taiyo tovino amokavlavokakwono. Toro te Feroo toolluro taiyo tov kwolaiyo toollu malluno sumaiyokwe amollumwojajukokwono. Toro mollumwojuno sumaiyokwe gami kwolaiyo kuunodo pwolbusuko kwimo'nyajukekono. Toro kwimo'nyajuko toolluno aro adokakwono. “Kwolaiyo akal wonyo tovida'ai aluvomaro toolluno tov Moosesolo sowa'mono.” Adokakwono.

Moosesol lukado plaiyo'mo tool kwako Midiyan tomuuno avlavoka tovinokwono

¹¹ Lukomgu Moosesol mwalno mwalno sumaiyokwe a'mwono sumo'nokaikono. Toro tool iruko pullugwoji gavuge avalo tooraiyomno avlavokaikono. Plaino sumaiyokwe gavuge avalo tobuuro Ijupda'ai Feroo toolluro womdo bwotonyo tonyu yodopure tobuurai kwonokaikono. Toro wonoduke toga Ijupda'ai a'mwo pwol Moosesolluro avalo Hibruuda'ai a'mwo pwollu iwago romiyoduke kwonokaikono.

¹² Iwago toro romiyoduke toga Moosesol Ijupda'ai a'mwo toollu romiyoso'mo kwinokaikono. Toro tool a'mwo pworo nonuwonpiyokweyo'mo sumdo yenomolluno sumaiyokwe aro sajunokaikono. A'mwo gabovo pworo nonagutomuudeyo. Toro yajunyuno sumaiyokwe Ijupda'ai a'mwo toollu aromiyosokaikono. Toro romiyosuno sumaiyokwe a'mwo bwiyo toolluro kulako tov kwako tokwe yiulo amollusosokaikono.

¹³ Toro molsosuno sumaiyokwe iruko aikomguda'ai tollugwoji gavuge avalo tooraiyomno aikomgu avlavokaikono. Plaino sumaiyokwe gavuge avalo Hibruuda'ai a'mwo pworal molo do'nodole toorallu kwonokaikono. Toro wonyuno sumaiyokwe a'mwo molo kuuno amolloluwosoka toollu samuugojokaikono. “Guu guuge Hibruuda'ai avalo toollu buro'nyo'mo iwago doromiyadokuuno?”

¹⁴ Toro samuugojoka tovi Hibruuda'ai a'mwo tool Moosesollu kuudokaikono. “Guu nemi mido mollonekumwalo'bi kooti yogalo danekullo'moneyokwe tookudukono? Awiyo, guu kwekumaiyo. Toro tooku suro toga Ijupda'ai a'mwo pwollu aromiyosumwa'judo kubalno aga nuu kwonyuda'ai romiyanubwebino'mekudukono?” Kuudokaikono. Toro kuudoka tovi Moosesol wuu'nyuno sumaiyokwe kuudo saurokaikono. Oo a'mwo abolo ton moro sumwa'jo tovi me'no souronuma'mwa'juponyudeyo. Kuudo yauro'no luko sokaikono.

¹⁵ Toruda'ai Feroo tool Moosesolluro soka tovino wuu'nyuno sumaiyokwe Moosesollu romiyoso'mo kwinokaikono. Toro te Moosesol Feroo toollu wuugollu'mo'mno sumaiyokwe lukado avlavokaikono. Lukado plaino sumaiyokwe kwako Midiyan tomuu ki'movo'no wonyo buugo allusovomwollosungiko pwollu wobo toru amwalokaikono.

¹⁶ Kwako Midiyan su tomuuda'ai pris womdo yodowodo toolluno yovo tov Jetroo'wolekono. Iruko pullugwoji Jetroo'wolluro 7-pela taiyo tonodoto kemi kuunumiyago toolluro sipsip meme toorai wonyo willo'moneyokwe wonyo buugo allusovomwollosungiko toolluno kwolabopogano.

¹⁷ Toro kwolabopo kuvi kuruv sipsip duuwatokwe a'mwo pworo Jetroo'wolluro taiyo su tonodotai amovomjapiyoporogano. Toro kuvi kuruv Moosesol Jetroo'wolluro taiyo tonyu a'mwo sipsip duuwatokwe tooraida'ai amollurolovomarokaikono. Toro mollurolovoma'no sumaiyokwe taiyo tonodotavuro sipsip meme toorai wonyo tov suremovobweyokaikono.

¹⁸ Toro iremovobweno sumaiyokwe taiyo su tonodoto kemi kuunumiyago Jetroo'wollomno aikomgu avlavopogano. Toro avlavopo tonyu kemi kuunumiyago tool wonyuno sumaiyokwe aro samuugojokaikono. “Kevu anuugwo yere aikomgu abai'mo'mapo tov adadomgu'aro'mdeyo?”

¹⁹ Toro samuugojoka tonodoto aro kuudopogano. “Sipsip duuwatokwe a'mwo tooro nemi movomjonekwapiyodopure toga Ijupda'ai a'mwo pwol amollurolovonekuma'mokaikono. Toro mollurolovonekuma'dowo nemoro meme sipsip toorai wonyo tov suremovobwemokaikono.” Kuudopogano.

²⁰ Toro kuudopo tovi wuu'nyuno sumaiyokwe kemi kuunumiyago tool gami taiyo tonyu aro kuudokaikono. “A'mwo amollurolovekuma'moka su tool gadomuu domwallo? Kevu a'mwo su toollu buro'nyo'mo kuugollu'mo'mapoldeyo? Kevu aikomgu uuwopi nevuge wosamujuko nomwalano'moneyokwe a'mwo su toollu duuduvo'noulo.” Toro wuujuno sumaiyokwe amodapiyokaikono. Toro amodapiyoka tonodoto plavo'mno Moosesollu adomokabopogano.

²¹ Toro domokabino sumaveyokwe Jetroo'wol Moosesollu samuugojokaikono. “Guu nuuge nokwo mwalmwalbinekudeyo?” Toro kuudoganoka tovi Moosesol aro kuudokaikono. “Yowa'nogano. Nokwo mwalosunonyugono.” Kuudokaikono. Toro te Jetroo'wol gami taiyo Supooravi malluno sumaiyokwe Moosesollu kuumasokaikono.

²² Toro uumasuno sumaiyokwe abolo su tov kwolaiyo sumwoluko imo'no'no kwolaiyo pwol somarokakwono. Toro somaroka toollu Moosesol wono'no aro adokaikono. “Nuu pumuuda'ai toonyu kwako akaru bomwalodum kwolaiyo akallu sawosunmo toolluno tov Gesoomolo sowa'mono.” Adokaikono.

²³ Toruda'ai kworomo bwotonyago tobuul me'no plavo'no Ijupda'ai a'mwo aguto kig Feroo tool abolokaikono. Toro aboloka kuvi kuruv Isuraiyolda'ai tobuuro womdo bwotonyo ton kuuno amujumovlaiyajupogano. Ijupda'ai tooro Isuraiyolda'ai tobuurai womdo bwotonyo uubweyodopure tonyu jul'nyo ibwosunodupu kwaru kwarupto adaillajupobuurogano. Toro tobuuro Gooti tool anekullo'mwojoneyokwe deko ilodopiyodopure tovi Gooti tool kuu'nokaikono.

²⁴ Isuraiyolda'ai tooravuro kwaru kwarupto dai'dupu deko ilodopiyodopure tovi Gooti tool wuu'nyuno sumaiyokwe aiyoga Eburaiyameke Aisakeke Jekoopeke tooravuro jukweyago kwolaiyo toorai wiyo'mwojo'mo subuu'yamju me'no soka tovino aki aiko te kuudo saurokaikono.

²⁵ Toro yau'no sumaiyokwe Isuraiyolda'ai tobuuro kaiya'no yomjomwekovla'mdopure tobuurai me'no kwonomarokaikono. Gooti tool toro wonoma'no sumaiyokwe kalo wino'no wiyo'mwojo'mo kwinokaikono.