Matyuu 9 - Gooti Toolluro Yogalokwono

Jisasol a'mwo suvlato abolopingikokwe pwollu sukuloka tovinokwono

¹ Toruda'ai Jisasol boot puvi ilomwalno sumaiyokwe wonyo buugo tovi igo'mgu suloga'movokaikono. Me'no iloga'mo'mno sumaiyokwe gavnokweyolluro wagwolago tovi aulai'movokaikono.

² Su toro kuulai'mo'mduke toga a'mwo abolo pun a'mwo suvlato abolopingikokwe pwol i'buronyuko tovi wo'duke toollu Jisasollomno amollukwovomokabopogano. Toro amollukwovomokabopo togai'aro a'mwo suvlato abolopingikokwe tooke'aro tonyuro kuudo uubweyodopure tovi Jisasol me'no wonyuno sumaiyokwe a'mwo suvlato abolopingikokwe toollu aro kuudokaikono. “Mi kwolaiyoloo, gumi poowokalago tov jurogudo nokwo jumo'nogawono. Nuu gumoro ma'no ma'no pasudo yodumdo tovuro kirumwallo tov amagudukwopimono.” Kuudokaikono.

³ Toro wuudoduke toga a'mwo loowo tovino pi'mwo kuudokwe pworo aro sajunoporogano. “Oo a'mwo akal Gooti toolluno abwolomorumwogapimwolaiyo.” Sajunoporogano.

⁴ Toro kuvi kuruv Jisasol a'mwo su tooravuro kuudo yau'dopure tovi youroonyuno sumaiyokwe aro kuudokaikono. “Kemoro poowokalago tonyu kirovanyuvanyu kuudo tooro kuulaikwo'dupudo tov buro'nyo'mo'mdeyo? Su toro kuulaikwo'dupudo tov kavlo nonagutokwono.

⁵ Neya duu'nyulo. Nuu suvlato abolopingikokwe toollu yere nokwo ikulmonyugono. Aki gamoro ma'no ma'no pasudo tovuro kirumwallo kuruv yere nokwo modukwopimonyugono. Yiuwi'nokai su tovallu kuvinono yo'mo tov mi jurogudo manyumo'nodubulonyugono. Toro toonyu aro nokwo wuudumonyugono. “Guu ilodavo'bi kado dovlavono.” Nokwo wuudumonyugono.

⁶ Toro te moro jurogudo tokwe ikulodo'mure tovi wonopi mino aro kuudo yanuupinorekikono. Oo A'mwo Kwolaiyo Kuunodo tool kwako akavi kuuno amwalo'ji kuga kuruv ma'no ma'nodo tovuro kirumwallo tovi modukwopiyo'mo jurogudo tov kurukweyoldeyo, kuudo yanuupinonyugono. Su toro kuudo neya yanuupino'moneyokwe aga nuvu a'mwo toollu aro kuudumono. “Guvu ilodavo'bi gumoro i'buronyuko tov momworaro'bi gumi ago tomuuno domokovlavono.” Kuudumono.” Jisasol a'mwo suvlato abolopingikokwe toollu toro kuudokaikono.

⁷ Toro wuujuno sumaiyokwe a'mwo suvlato abolopingikokwe tool iloda'mno sumaiyokwe gami ago tomuuno avlavokaikono.

⁸ Jisasolluro soka su tovi a'mwo abolo kwolallo abi'bwo'nopo ton wonyuno sumaveyokwe luko amorumoukuropiyopogano. Aki Gooti toolluno sulomoropiyapogano. Aro tovinokwono. Gooti su tool a'mwo abolo tonyu ikullo'moneyokwe jurogudo tov me'no kuubwemokaldeyo, do'mno sulomoropiyapogano.

Jisasol Matyuu'wollu adomaroka tovinokwono

⁹ Su toro tomuuda'ai Jisasol plaino sumaiyokwe a'mwo pwol takis nuugwiyo biyo'moneyokwe adaiyo puvi womdo kuulloduke toollu kwonokaikono. A'mwo su toolluno yovo tov Matyuu'wolekono. Toro toollu wonyuno sumaiyokwe Jisasol aro kuudokaikono. “Guu donumjunono.” Toro wuujuno sumaiyokwe Matyuu'wol ilodavo'no Jisasollu kuumjunokaikono.

¹⁰ Aki Jisasol Matyuu'wolluro ago tovi aulonomwalokaikono. Aki a'mwo takis nuugwiyo mallokwe pworogai'aro a'mwo ma'no ma'nodokwe pworogai'aro su tooro kuulno sumaveyokwe Jisaseke'aro gami uumjunyokwe toorogai'aro bwotonyago tooro aulonomwaloporogano.

¹¹ Toro kuulonomwalodopure toga Farasi tooro amuugonallajuporogano. Toro muugona'no sumaveyokwe Jisasolluro uumjunyokwe toorai aro kuudoganoporogano. “Kemi ibwasokwe su tool a'mwo takis nuugwiyo mallokwe toorogai'aro a'mwo ma'no ma'nodokwe toorogai'aro su toorogai kuulonomwalodowodo tov buro'nyo'mo'mdeyo?” Kuudoganoporogano.

¹² Toro kuudoganopo tovi Jisasol wuu'nyuno sumaiyokwe yovekurajo puruv aro kuudokaikono. “Nobollomaiyokweyonoldeyo, adupi tooro dookta toollomno mavla'mdupudorogano. Toro kuvi kuruv, Nobollokweyonoldeyo, adupi toorono'gwowi dookta toollomno pla'mdupudorogano. Su toro to'busuko kubalno nuu a'mwo pworo, Sugudonoldeyo, adupi tooraiyomno abonyumaiyo. Toro kwonyu kuruv a'mwo pworo, Ma'no ma'nodokweyonoldeyo, adupi su tooraino'gwowi miyomno domallo'moneyokwe abonyugono.” Kuudokaikono.

¹³ Jisasol Farasi toorai toro wuujuno sumaiyokwe aki aro kuudokaikono. “Kevu Gooti toolluro yogalo puvino kavlo tov neya jouromallulo. Yogalo su tov aro sakwollungikokwono. Nuu kemoro yasuwa'no romiroudapiyodupudo tonyuno ilaiyo manyunodowodonyugono. Toro kuvi kuruv kevu a'mwo abolo pubuuraino kalo mamwonyo'moneyokwe su to'gwowi nuu ilaiyo nyunodowodonyugono. Su toro sakwollungikokwono. Toro te neya duu'nyulo. Nuvu a'mwo pworo, Sugudonoldeyo, adupi tooraiyomno abonyumaiyo. Toro kwonyu kuruv a'mwo, Ma'no ma'no yodowadonoldeyo, adupi tooraino'gwowi miyomno domallo'moneyokwe abonyugono.” Kuudokaikono.

Jisasol gami uumjunyokwe tooro kumako mamwalodopure tooraino adoka tovinokwono

¹⁴ Toruda'ai Joonolluro uumjunyokwe tooro Jisasollomno bino sumaveyokwe aro abuudoganoporogano. “Nevuge'aro Farasi toorogai'aro toonol wosamujuko tonyuno kumako mwalodowadonogano. Toro kuvi kuruv gumoro gumjunyokwe toorono'gwowi wosamujuko tonyuno kumako mamwalodupudo tov buro'nyo kavlo tovino'mdeyo?” Kuudoganoporogano.

¹⁵ Toro kuudoganopo toorai Jisasol yovekurajo puruv aro kuudokaikono. “A'mwo pwol abolo nomallo'mo tool kuuno mwalodowo'jure toga gami ibwoto'nyo pworo gavuge ilaiyo yopi wosamujuko tonyuno kumako mwalpinorodukono? Awiyo, wosamujuko ton neya nonomwalpinorogano. Toro kuvi kuruv iruko pullugwoji abolo nomallo'mo su toollu nomokavlapinekono. Su toro me'no amokavlapi toga'no'gwowi mamwalodowo'jure toolluno tov gamoro ibwoto'nyo tooro kalo winopi wosamujuko tonyuno kumako nomwalpinorogano.” Kuudokaikono.

¹⁶ Toro wuujuno sumaiyokwe aki yovekurajo puruv aro kuudokaikono. “A'mwo pwol youro uumnorojo tovi giwollo'mo tool youro aiyo tokwe madokuuragiwolonekono. Toro adokuuragiwolo'ji tov youro aiyo nodokuullo tov uumdo tovi guureji ki'nomarowo'ji bwotonyo rojonokwono. Su toro tovino tov uumdo tokwe aiyo tokwe toval amolla'mo'bi tov kaiya'no imo'nonokwono.” Kuudokaikono.

¹⁷ Toruda'ai aki Jisasol yovekurajo puruv aro kuudokaikono. “A'mwo pwol meme kulako tovida'ai sakwollungiko guumiyo uumdo tovi wain wonyo aiyo tokwe suroso'ji tov wain wonyo su tov munowo'ji nobwolowikuropiyawonokwono. Toro abwolowikuropiyawo'ji tov meme kulako tovida'ai guumiyo sakwollungiko uumdo tokwe'aro wain wonyo tokwe'aro toval kaiyako i'nopibullunovakono. Toro tovino tov wain wonyo aiyo tov meme kulako tovida'ai guumiyo aiyo sakwollungiko tovino to'no iroso'mokwono. Su toro surosupi tov wain wonyo aiyo tokwe'aro guumiyo aiyo tokwe'aro yiuwi'nokai su toval ilaiyo to'no wo'bullunovakono.” Jisasol yovekurajo tov toro kuudokaikono.

Abolo abewo'nyo nobollokwe tokwe'aro taiyo aboloka tovi aiyo aiko te adukavoka tokwe'aro tovallunokwono

¹⁸ Jisasol toro wuudoduke toga a'mwo mido mollomwalokwe pwol bino sumaiyokwe Jisasolluro suvlo dolago toru suduko abinuguto'nokaikono. Toro binuguto'nyuno sumaiyokwe Jisasollu aro kuudokaikono. “Moro taiyo tov me'no abolmokakwono. Toro tovi guu bo'bi kuubogai'nubi tov aiyo aiko te dukavowo'ji nokwo mwalonokwono.” Kuudokaikono.

¹⁹ Toro wuujuno sumaiyokwe Jisasol ilodavo'no gami uumjunyokwe toorogai'aro tooro a'mwo su toollu kuumjunoporogano.

²⁰ Toro pla'mdopure toga abolo puruv abewo'nyo nobollokwe tobuul Jisasollomno abokakwono. Abolo su tobuul abewo'nyo to'no to'no yodowodo tov 12-pela kworomo tobuul kuuwolo'nokakwono. Toro tobuul bino sumaiyokwe Jisasolluro buulo tomgu'aro kuula'no gamoro youro do'gwapiyo tovi kuubogai'nokakwono.

²¹ Toro kuubogai'noka su tobuul aro sajunokakwono. “Oo nuvu yiuno gamoro youro tovino to'no kuubogai'numi tov nokwo ikunme'gono.” Su toro yajunyuno sumaiyokwe kuubogai'nokakwono.

²² Toro uubogai'nyuno sumaiyokwe Jisasol buulo tomgu mogunyubworoono'no abolo tovi aro kuudokaikono. “Gumi poowokalago tov jurogudo nokwo jumo'nogawono. Gumoro kuudo nubweyodumdo tovino tov agujukulmono.” Toro kuudoka kuga'gwo kuuno abolo tovi sukulokaikono.

²³ Jisasol abolo su tovi me'no ikulosuwolo'mno sumaiyokwe a'mwo mido mollomwalokwe toolluro ago tovi ai'movokaikono. Toro ki'mo'mno sumaiyokwe aro kwonoka tov a'mwo abolo kwolallo ton i'bwo'nodopure kwonokaikono. Kwolallo su tonyuro pun kumdato jodupu nogunyo tonyu pwo'mi muujudo airapiyopogano. Aki pun kumdato kuuloderaunodopure tonyu kwonokaikono.

²⁴ Su toro tonyu kuuloonyuno sumaiyokwe Jisasol aro kuudokaikono. “Kevu dovlaiyulo. Aro tovinokwono. Taiyo tov mabolmokakwono. Yiuno sa to'no kwoso.” Kuudokaikono. Toro kuudoka tovi a'mwo abolo kumdato auloderaunyajupo su ton wuu'no'mno kakwo amadopogano.

²⁵ Toro kuvi kuruv a'mwo abolo kwolallo su tonyu kwa'mguno me'no bilomovomjopino sumaiyokwe toga Jisasol ago su tovi aulokaikono. Toro kuulno sumaiyokwe taiyo tovuro ato tovi amworarokaikono. Toro mwora'no sumaiyokwe taiyo tobuul adukavokakwono.

²⁶ Jisasolluro soka su tovino kuuguudo tov distrik su tovi yiuwi'nokai tomuu abomomjodumoulapogano.

Jisasol a'mwo sumnowojokwe pworake'aro aki a'mwo yogaimajokwe pweke'aro toorai sukuloka tovinokwono

²⁷ Jisasol su toro tomuuda'ai bolokwino sumaiyokwe puuto tovi avlavokaikono. Toro pla'mduke toga a'mwo sumnowojokwe pworal kuumjunolorakono. Toro tooral Jisasollu aro aduumjunolorakono. “Devitolluro jukweyago kwolaiyoloo, namino kalo neya agujunono!” Aduumjunolorakono.

²⁸ Toro duumjunyuno sumaleyokwe Jisasol ago tovi aulomwalokaikono. Toro kuulomwaloduke toga a'mwo sumnowojokwe su tooral kwollomno kuulalno aulluru'marolorakono. Toro toorallu Jisasol aro kuudoganokaikono. “Kevu toorakul mino aro kuudo dukonubwemwakulo, Oo a'mwo akal nokwo nonakullo'mwojonoldeyo, kuudo dukonubwemwakulo?” Kuudoganokaikono. Jisasol toro kuudoganoka tovi a'mwo sumnowojokwe tooral aro kuudolorakono. “Agutoloo, tadeyo.” Kuudolorakono.

²⁹ Toro kuudolo toga Jisasol kemoro sumdo tonyu uubogai'nyuno sumaiyokwe aro kuudokaikono. “Kev toorakul mino kuudo anubwemwakulo tovino tov aikullukulmono.” Kuudokaikono.

³⁰ Toro kuudoka toga a'mwo su tooralluro sumdo ton ainolorakono. Toro kinyuno sumaleyokwe Jisasol a'mwo su toorallu duudapi yogalo guureji aro aduuwiyokaikono. “A'mwo pwolnodo kwol kuruv kemi aikullumo'numoka su tovino kuudo nyouromaro'jokwe muudubullunono.” Aduuwiyokaikono.

³¹ Toro aduuwiyoka kuvi kuruv a'mwo su tooral plaino sumaleyokwe distrik su tovuro yiuwi'nokai tomuu Jisasolluno yogalo tov abomomjodumoullajulorakono.

³² A'mwo sumnowojokwe sukuloka su tooral me'no pla'mdole toga a'mwo abolo pun a'mwo yogaimajokwe pwollu Jisasollomno amokabopogano. A'mwo yogaimajokwe su toollu kuullo ma'no ma'nodo pwol aulomwallajukekono.

³³ Toro te Jisasol kuullo ma'no ma'nodo su toollu amodovomjapiyokaikono. Toro me'no modovomjapino sumaiyokwe a'mwo yogaimajokwe su tool yogalo adokaikono. A'mwo su toollu toro kwimo'noka tovino a'mwo abolo kwolallo ton morumoukuropiyo'mno aro sajunopogano. “Aiyoo, akaro tov yiuwi'nokai kwako Isuraiyol tomuu mabai'meyajukokwono. Toro kuvi kuruv aga nevu kwonmwakuuwo aka'gwowi maluko'nyo'maiyo.” Sajunopogano.

³⁴ Toro yajunodopure kuvi kuruv Farasi toorono'gwowi aro sajunoporogano. “Su tool kuullo ma'no ma'nodo tooravuro aguto kuunodo mollomwalokwe toolluro jurogudo tokwe kuullo ma'no ma'nodo toorai modovomjapiyodowodekono.” Sajunoporogano.

Gooti toolluro wosamujuko tonyu mulomallo'moneyokwe a'mwo abolo womdokwe tonyuno supto imo'nodowodo tovinokwono

³⁵ Toruda'ai Jisasol yiuwi'nokai wagwolago togai'aro ajumiyo togai'aro tonyuda'ai Juu tooravuro i'bwo'nyago tonyu kuuguudo sodubwosumovlaiyajukekono. Toro tool aguto kig Gooti toolluro mido mollomwalo tovino kuuguudo sugudo tokwe amoruudomollajukekono. Aki toro moruudomollodowo a'mwo abolo tobuuravuro nobolluwuulo judo'no judo'nodo tonyu sukulmovlaiyajukekono.

³⁶ Jisasol toro ikulmovla'mdowo a'mwo abolo kwolallo bi'bwo'nodopure tonyu wonyuno sumaiyokwe kalo kwinokaikono. Jisasol kalo kwinoka su tov aro tovinokwono. A'mwo abolo su ton tagunyo tooro ma'dupu aki kevnokwe tobuuro ku'nono mwiyo'mwoju'nyajupogano. Aki toro ton sipsip tobuurobusuko imo'nodopure tobuurai a'mwo duuwato'moneyokwe pwol nonaguto sumo'nyajupogano. Su toro imo'nodopure tobuuraino Jisasol kalo kwinokaikono.

³⁷ Toro te gami uumjunyokwe toorai yovekurajo puruv aro kuudokaikono. “Wosamujuko bwotonyago ton nomulomallo'moneyokwe suuwiyo me'no mujumawodupudogano. Toro kuvi kuruv wosamujuko su tonyu mulomallo'moneyokwe a'mwo abolo womdokwe tonyuno supto sumo'nadopiyo.

³⁸ Toro tovino tov kevu wosamuju'womdo su tovuro jukwo toollu subusu'nyogalo aro neya duudumovlavogaulo. “Agutoloo, gumoro wosamujuko su tonyu mulomallo'moneyokwe a'mwo abolo womdokwe tonyu guvu neya domorapiyogawono.” Kevu subusu'nyogalo su toro neya duudumovlavogaulo.” Kuudokaikono.