Matyuu 3 - Gooti Toolluro Yogalokwono

Wonyo galuvollokwe Joonol kuuguudo amoruujajuko tovinokwono

¹ Su toro toga Wonyo Galuvollokwe Joonol Juudiyada'ai kwako kuu'maiyo tomuu bai'mo'mno sumaiyokwe aro amoruujajukekono.

² “Kevu Gooti toollomno kuudo jouragunyumo'nyulo. Muunyu kai'muuda'ai aguto kig toolluro mido mollomwalo tov wobo toga nobai'meyo'mo sadopiyo.” Amoruujajukekono.

³ Aiyoga proofet Aisaiyal a'mwo pwolluno ajakwolloka tov Wonyo Galuvollokwe Joonol kwekono. Aisaiyal Joonolluno adoka tov arokwono. “Kwako a'mwomaiyo kuu'maiyo tomuu a'mwo pwolluro deko tov aro dodowo'jure toollu wuu'nupinekono. Oo Aguto tool nobaiki'mowono toollo'mo jovo'dogallunyulo. Toro toolluro puuto tov ido'nyuno jovo'dogalubweyulo, dodowo'jure wuu'nupinekono.” Aisaiyal su toro ajakwollokaikono.

⁴ Joonol youro tov kemel ato tovida'ai sakwollungiko tokwe sesajukekono. Aki ibesa'aiyo tooravuro kulako tovida'ai muulo sakwollungiko tokwe sesajukekono. Aki toro tool wosamujuko ton tomabore'bore toorogai'aro tamwallugwolamdo tooravuro podopto togai'aro ton anyajukekono.

⁵ Toro te a'mwo abolo Jeruusalemda'ai togai'aro Juudiyada'ai togai'aro yiuwi'nokai wonyo Joodanovi wobo toru mwalodupudo togai'aro ton Joonollu wonyo'moneyokwe abiyajupogano.

⁶ Toro ton bodupu kemi ma'no ma'nodo tonyuno adodowiyoku'bworosunyajupogano. Toro dodowiyoku'bworosunodopure tonyu Joonol wonyo Joodanovi amogaluvollajukekono.

⁷ Toro galuvolloduke toga Farasi toorogai'aro Sajuusi toorogai'aro bwotonyago tooro wonyo uuvollunyo'moneyokwe Joonollomno aboporogano. Toro bodopure toorai Joonol wonyuno sumaiyokwe aro kuudokaikono. “Kevu a'mwo abolo tonyu kaiyako igolodupudo toorekulluno tov gabakuto yaunanyo toorobusukorekikono. Toro toorekulluno Gooti toolluro suroulo tov nobadopiyo. Toro abadopiko tovida'ai kevu irukuruwoleyo'mo tov ala'mwol, “Lukado dovlaiyulo,” aikudumokarekuldukono?

⁸ Kevu Gooti toollomno kuudo souragunyumo'nupi tov kemoro pasudo kun kuruv a'mwo nebal'no youragunyumo'nodupudo toorobusuko neya ikwonmorekikono.

⁹ Aki kevu aro kuudo nyau'mwalpiyo, Oo nevu nemi nellunumiyago Eburaiyamolluda'ai bodowado toonolluno tov Gooti tool ilaiyo to'no mollonekumaronekono, su toro kuudo nyau'mwalpiyo. Nuu aro ikudumo'mokwono. Gooti tool sulo akaraida'ai Eburaiyamolluro jukweyago kwoloraiyo muuduko pworo amollumo'nosumokwe so'ji tov kaveno yokwollosonekono.

¹⁰ Toro te aga sajugo tov iko tooravuro kavlo tonyu dovomwogapiyo'moneyokwe ikolato sugiyo. Toro sukolasuko su tool yiuwi'nokai iko tooro ikulsulo mai'nodupudo toorai dovomwogapiyowo'ji du'muudo tovi mobwokulluroudapiyonekono.

¹¹ Toro te kevu Gooti toollomno kuudo souragunyumo'numwakopo toorekullu nuvu wonyo tokwe mogalaikuvollodumdonyugono. Toro kuvi kuruv pwol mi lukomgu anumjunadopiko su tool aguto kuunodekono. Nuu akaro tekwonyu Aguto su toolluro suulpweyo tov mokavlaiyo'mo kuruv ku'nonodo'mekwonyumaiyo. Su toolno'gwowi Gooti toolluro Kuullo tooke'aro duko tokwe'aro tovake mogalaikuvollonekono.

¹² Aguto su tool abwo'ji toga sapoollo pilatokwe tov mworarowo'ji wit dapto toorai mobwokurodukwopiyonekono. Yowo'ji wit sugudo ton mollu'bworosowo'ji gami wosamuju'ago tovi kuulomorosonekono. Yowo'ji daptorodeyo ado'ji to'gwowi duko yiunokuudo maibuulopiyodowodo tovi molluroudapiyonekono.” Joonol su toro kuudokaikono.

Joonol Jisasollu wonyo amogaluvolloka tovinokwono

¹³ Jisasol Joonolluro ato tovida'ai wonyo uuvollunyo'moneyokwe Galilida'ai wuugollu'mokabino sumaiyokwe wonyo Joodanovino abokaikono.

¹⁴ Toro aboka kuvi kuruv Joonol Jisasollu wonyo mogaluvollo'mo mwinokaikono. Toro tool aro kuudoganokaikono. “Nuvu gumoro wonyo mogalanuvollubino tovino supto sadokwono. Guvno'gwowi supto miyodumdo kweku kuruv miyomno buro'nyo'mo dobadokuuno?” Kuudoganokaikono.

¹⁵ Su toro kuudoganoka kuvi kuruv Jisasol aro kuudokaikono. “Guvu mi mogalanuvollubino tov nokwo'mokwono. Navu Gooti toolluro ilaiyo winodowodo tovi suuwiyo imwojo'mo tov nokwo mogalanuvollubinekugono.” Kuudokaikono. Toro kuudoka tovi Joonol, “Yowa'nogano,” wuudo'no Jisasollu wonyo tovi amogaluvollokaikono.

¹⁶ Jisasol wonyo me'no uuvollunyuno sumaiyokwe biloda'mduke toga sulugumdo tov ausodavokakwono. Toro kuusoda'mno sumaiyokwe Gooti toolluro Kuullo tool dokato sobuuro pwolbusuko wolaboduke toollu Jisasol suloonyopiyokaikono. Toro iloonyopino sumaiyokwe Kuullo su tool Jisasollu abwolmwalokaikono.

¹⁷ Toro bwolomwaloduke toga yogaimaguurai puruv sulugumdo tomuuda'ai aro adokakwono. “Numoro Kwolaiyo kalo buuropino nyunodowodo tool, akal kwekono. Toro toolluno ilaiyo bwotonyo anyunumaiyoo.” Adokakwono.