Matyuu 10 - Gooti Toolluro Yogalokwono

Jisasolluro 12-pela uumjunyokwe toorainokwono

¹ To'no'gwowi Jisasol gami 12-pela uumjunyokwe toorai, “Dobiloo,” doma'no sumaiyokwe kuullo ma'no ma'nodo toorai modovomjapiyo'moneyokwe jurogudo tov kuubweyokaikono. Aki yiuwi'nokai nobolluwuulo judo'no judo'nodo toorai ikullo'moneyokwe jurogudo tokwe'aro kuubweyokaikono.

² A'mwo 12-pela kuurotokwe su tooraino yovo tov muudu'nodo tool Saimoonolekono. Toro toolluno yovo puruv Pitalekono. Pitaike'aro gami avalo Adruu'weke'aro yiuwi'nokai todorakono. Aki Sebediyolluro muugunyo Jemseke gagwai'yago Jooneke todorakono.

³ Aki pworaino yovo tov Filipeke Batalamiyuuweke Toomaseke Matyuu'weke toorogano. Matyuu'wol takis nuugwiyo mallokwe pwekono. Aki Alfiyasolluro muugunyo Jemsekono. Aki Tadiyasekono.

⁴ Aki Selat Saimoonekono. Aki Juudas Iskeriyootekono. A'mwo su tool Jisasollu kaiyako wiyo'moneyokwe ikomago toorai amorubweyoka tool kwekono.

Jisasol gami uumjunyokwe toorai womdo kuubweyoka tovinokwono

⁵ Jisasol a'mwo 12-pela su toorai morapiyo'no kuuguudo aro aduuwiyokaikono. “Kevu a'mwo abolo Juu miyawosunodupudo tonyomno novlapiyo. Aki a'mwo abolo Samariyada'ai wagwolago tonyu maulapinono.

⁶ Toro kworekul kuruv Isuraiyolda'ai a'mwo abolo tonyomno neya dovlavogaulo. Isuraiyolda'ai a'mwo abolo su ton sipsip me'no younopiyodupudo tobuurobusuko imo'nodupudogano. Su toro tonyomno to'gwowi kevu neya dovlavogaulo.

⁷ Kevu su toro tonyomno avlapi toga aro neya domoruudomollogaulo. “Oo muunyu kai'muuda'ai aguto kig toolluro mido mollomwalo tov nobai'mowono'mo sadopiyo.” Domoruudomollogaulo.

⁸ Aki kevu a'mwo abolo nobollokwe tobuurai neya duuwikulogaulo. Aki a'mwo abolo me'no bolodopure tonyu neya domodukavogaulo. Aki kevu wonawiyo nobollokwe tonyu duuwikulogaulo. Aki kuullo ma'no ma'nodo toorai neya domodovomjapiyogaulo. Kevu womdo su toro ton imwalpino'moneyokwe jurogudo aikullamo su ton Gooti gavnokwe toolluro yasuwa'no ikullabodowodogano. Toro tovino tov kevu womdo su tovi momjumovlavopi toga a'mwo abolo tonyuro nuugwiyo noma'mwalpiyo. Toro kworekul kuruv yiuno yasuwa'no to'no neya duuwiyo'mwojumovlavogaulo.

⁹ Aki kevu goolodeyo oo silvadeyo oo sallukwa'jo nuugwiyodeyo ton kemi pauso tonyu mamullosupinono.

¹⁰ Aki kevu novlaiyo'mo kuto puruv mamokavlapinono. Aki kevu youro puruvalo'mdeyo oo suulpweyo'mdeyo oo yodeko'mdeyo ton mamokavlapinono. Su tov aro tovinokwono. A'mwo pwol a'mwo abolo punyuro womdo tovi kwiyo'ji tov a'mwo abolo su ton a'mwo toollu neya uubimwalpinekono. Gamoro wosamujuko nonugovlaiyo'moneyokwe togai neya uubimwalpinekono. Noonyumwonyu pun mamokavlapino tov su toro tovinokwono.

¹¹ Aki kevu wagwolagodeyo oo ajumiyodeyo punyu aulapi toga aro tovino neya jo'mgonomallulo. A'mwo pwol kemoro yogalo mokabodopure tonyuno ilaiyo kwino'ji tov gamoro ago tovi neya wo'mwalpinorekikono. Toro toorekul ago puruvi puruvi mwopinorekikono. Toro kworekul kuruv yiuno wagwolago su toru kuugollu'mopi toga'no'gwowi ago su tovi nokwo dukwopiyopi plapinorekikono.

¹² Aki gamoro ago tovi aulapi toga ago su to kuvi kuulomwalodupudo tonyu, “Ilaiyokwono,” neya duudogaulo.

¹³ Ago su tovi kuulomwalodupudo ton kemi ilaiyo saikullugolpi tov kevu Gooti toolluro sumwoluko kavo wosunyo'moneyokwe yogalo tov kunyu nokwo duubwemwalpinorekikono. Toro kuvi kuruv kemi ilaiyo miyaikullugolpi to'gwowi kevu Gooti toolluro sumwoluko kavo wosunyo'moneyokwe yogalo me'no aduubwepi su tov mo'mweyado neya yomapinorekikono.

¹⁴ Aki buro'nyo buro'nyomuuda'airodeyo tooro kemi maikwonyubusuko yopi kemoro yogalo tonyu muu'nyubusuko supi su toru neya duugollu'meyulo. Toro kuugollu'mopi toga sullukwako tov kemoro suvlo tonyu kwosuko tokwe ago su toru neya doluvourokurosumovlaiyulo.

¹⁵ Nebal'no ikudumo'mokwono. Gooti tool kooti yogalo aduuwiyo'ji iruko su tollugwoji wagwolago su tovida'ai a'mwo abolo ton kirumwallo bwotonyo tov nomapinogano. Kemoro kirumwallo mapino su tov wagwolago Soodoomke Goomoorake tovalluda'ai a'mwo abolo tonyuro kirumwallo amaropo su tovi nuuwolowonokwono.”

Lukomgu kaiyako igollo'moneyokwe tabunyuwuulo pun nomapino tovinokwono

¹⁶ Aki Jisasol aro kuudokaikono. “Neya duu'nyulo. Nuvu kevu toorekullu a'mwo pworavuro akuuto tomuuno amekwapimono. Aro to'busukokwono. A'mwo pwol gami sipsip toorai kuullujuluko tooravuro akuuto tomuu amorapiyo'ji to'busuko amekwapimono. Toro te kevu gabakuto tooro wako kuu'nodupudo to'busuko kubalno wako neya dou'nogaulo. Aki dokato sobuuro tooro magu'nyo mimo'nodupudo toorobusuko kubalno kevu a'mwo pworai magu'nyo mamolloluwosumwalpinono.

¹⁷ Kevu a'mwo pworaino wako neya kuu'numwalpinorekikono. A'mwo su tooravuro pworo kemi mekumworaropi a'mwo kooti yogalo mollomwalokwe tooravuro ato tovi maikubweyopi kooti yogalo nodaikullupinorogano. Aki pworo kevu Juu tooravuro i'bwo'nyago tonyu aulomwalpi toorekullu nogalogunyukuurekumollupinorogano.

¹⁸ Aki pworo a'mwo aguto gavona toorogai'aro a'mwo aguto kig toorogai'aro toorai kemi nome'nolopuurekumokaulapinorogano. Toro ame'nekumokaulapi toga kevu a'mwo aguto su toorogai'aro a'mwo abolo Juu miyawosunodupudo togai'aro su tonyu Gooti toolluro kuuguudo sugudo tovino kuu'maiyo toru nobomollolupto'nosupinorekikono.

¹⁹ A'mwo aguto su tooravuro ato tovi kemi kooti yogalo adaikullupi toga kevu aro kuudo nyaupiyo. Oo nevu adado wuudanonoldukono oo buro'nyo yogalo tov wuudanonoldukono? Su toro kuudo nyaupiyo. Aro tovinokwono. Kemi kooti yogalo amekudapipi toga kemoro kuuguudo wuujo'moneyokwe tov Gooti tool nekullabwonekono.

²⁰ Toro ikullabodowo'jure toga kevnokwe togaikul madupinokwono. Toro kuvi kuruv kemi Tellunumiyago Gooti toolluro Kuullo toolno'gwowi kemoro mago tonyu davowo'ji nuudumwalonekono.

²¹ Aki su toro toga a'mwo pworo kemi kuugwai'yagorodeyo kuudai'yagorodeyo toorai aromiyosupureyokweyo'mo a'mwo gabovo pworai nomorubwepinorogano. Aki a'mwo pworo kemi kwolaiyo kuunodo toorai aromiyosupureyokweyo'mo a'mwo gabovo pworai nomorubwepinorogano. Aki kwoloraiyo pun kemi kuunum kwolabolo tonyu kisuvolo wiyopi aromiyosupureyokweyo'mo a'mwo gabovo pworai nomorubwepinogano.

²² Kevu mi numjunodupudo togaikulluno tov yiuwi'nokai a'mwo abolo ton kemino surodo'mo ipinogano. Toro te kevu mi numjunodupudo togaikulluda'ai pwol mi buulo manyugunyumopiyo'mo tool numjunyuno numjunyuno yowo'ji yiuno abolo'ji toga'no so'ji su toollu lukomgu gavuge aiyo yiunokuudo mujomwekovlaiyo'moneyokwe tov Gooti tool nuuwiyo'mwojonekono.

²³ Aki ajumiyo puruv kemi kaiyako nyaikullugolonokwono. Toro saikullugolo'ji toga kevu ajumiyo su tovi wuugollu'movopi ajumiyo muuduko puvino lukado neya dovlaiyulo. Nebal'no ikudumo'mokwono. Kevu Isuraiyolda'ai tonyuro yiuwi'nokai ajumiyo tonyu modomollo'mo womdo tov yere miyopiyodopure kuvi kuruv A'mwo Kwolaiyo Kuunodo toonyu aikomgu noolamonyugono.

²⁴ A'mwo ki'nato womdokwe pwol gami a'mwo mido mollomwalokwe toollu muunyu toru'aro muuwolo'mdowodekono. Aki a'mwo uumjunyokwe pwol gami ibwasokwe toollu muunyu toru'aro muuwolo'mdowodekono.

²⁵ Toro kuvi kuruv a'mwo uumjunyokwe tool gami ibwasokwe toolbusuko aval'no sumo'no'ji tov mekono, uumjunyokwe su tool ilaiyo nokwo ibwosunonekono. Aki a'mwo ki'nato womdokwe tool gami a'mwo mido mollomwalokwe toolbusuko aval'no sumo'no'ji tov mekono, a'mwo ki'nato womdokwe su tool ilaiyo nokwo ibwosunonekono. Neya duu'nyulo. Nuu ago tovida'ai mido mollomwalokwe toonyubusuko imo'nodumdonyugono. Toro toonyuno a'mwo pworo kaiya'no yovo aro bwolomonumwogapiyodapudorogano. Oo Belsebuulolekono. Bwolomonumwogapiyodapudorogano. Toro to'busuko kubalno kevu moro ago tovi anakuuto tomuu me'no kuulomwalodupudo kugaikullu kuruv kemino kaiya'no yogalo pworogai aval'no bwolomekumwogapimwolapinorogano.”

Gooti toolluno luko neya imwalano tovinokwono

²⁶ “Toro te a'mwo kaiyako yaikullugollo'mo winodupudo su tooraino kevu luko mipinono. Aro tovinokwono. Yiuwi'nokai ton yiulo tomuu abu'duvolnakopo kuvi kuruv lukomgu kuu'maiyo toru'no nobomollolupto'nosupinogano. Aki yiuwi'nokai jupweyo kuuguudo apuu'nakopo kunyuno kuruv lukomgu kuudo nyouromapinogano.

²⁷ Kevu dugumdo tomuu mwalodopure toorekullu nuu yogalo aikudumi tokwe momworaropi kevno'gwowi bako tovi kuu'maiyo toru'no neya domoruudogaulo. Aki nuvu kemoro kaduko tovi bweyogalo aikudumi kuvi kuruv kevno'gwowi wuu'nopi kemi ago tovi muunyu toru ilodavopi kuu'maiyo toru'no neya domoruurodogaulo.

²⁸ A'mwo pworo a'mwo abolo tonyuro kulako tovi romiyosodupudorogano. Toro kworo kuruv a'mwo abolo su tonyuro kuullo tooraino'gwowi ku'nono maromiyosupinorogano. Toro tovino tov a'mwo su toro tooraino luko mipinono. Toro kuvi kuruv kemoro kuullo tokwe'aro kulako tokwe'aro yiuwi'nokai su tovallu du'muudo tovi nokwo mollounapiyono Gooti toolluno'gwowi kevu luko neya domjumovlavogaulo.”

²⁹ “Kuudo pun jaullulo. Dokato kula'nyo pwekwojallu biyomallo'moneyokwe nuugwiyo tov yiuno yamwiyeke sulo pullugwonodo tokwe biyoma'dupudokwono. Toro kuvi kuruv kemi Tellunumiyago tool dokato kula'nyo su tekwojallu pi'mwono mollomwalodowodekono. Toro tovino tov pwolnodo kwol kuruv kwako tovi yasuwa'no mabwolorawonekono.

³⁰ Toro kuvi kuruv kev togaikulluno'gwowi Gooti tool kuudo pi'mwono yaikuu'dowodekono. Aki kemoro midoto pubalno pubalnodo kunyuno kuruv me'no jagilodowodekono.

³¹ Toro te kevu dokato bwotonyago toorai uuwolo'mdupu Gooti toolluro sumdo tovino'gwowi aguto wimo'nodupudogaikikono. Toro tovino tov kevu luko nyumwalpiyo.”

Krais toolluno kuu'maiyo toru'no dodowiyoku'bworoso'moneyokwe tovinokwono

³² Aki Jisasol aro kuudokaikono. “A'mwo pwol a'mwo abolo tonyuro sumdo tovi mino kuu'maiyo toru adodowiyoku'bworubweyo'ji tov nuu kwonyu kuruv mi Nyunumiyago muunyu kai'muu mwalodowodo toolluro sumdo tovi a'mwo su toolluno kuu'maiyo toru nododowiyoku'bworubwemonyugono.

³³ Toro kuvi kuruv a'mwo pwol a'mwo abolo punyuro sumdo tovi mino aro ado'ji tov, Nuu Krais su toolluronyumaiyo, ado'ji tov nuu kwonyu kuruv mi Nyunumiyago muunyu kai'muu mwalodowodo toollu a'mwo su toolluno aro nuudumonyugono, A'mwo su tool numorolmaiyo, nuudumonyugono.”

A'mwo abolo tonyuro kuudo tovi Jisasol aguto neya wimo'numwalono tovinokwono

³⁴ Aki Jisasol aro kuudokaikono. “Kevu mino aro kuudo nyanuu'mwalpiyo. Oo kwako akavuro yiuwi'nokai tomuu sumwoluko kavo wosunyo'mo tov mokabiyo'mo kwolabokaldeyo, kuudo nyanuu'mwalpiyo. Nuu sumwoluko kavo wosunyo'moneyokwe tovi mokabiyo'mo kwolabonyumaiyo. Toro kwonyu kuruv nuu molo'mo kwallu'mopto puuke amokwolabonyugono.

³⁵ Su tov aro tovino'mo kwolabonyugono. Nuvu a'mwo pweke'aro gami ganumiyago tooke'aro tonumdallu imgu amgu momuudeyapiyo'mo kwolabonyugono. Aki abolo purukwe'aro gami ganeyago tokwe'aro tonallu imgu amgu momuudeyapiyo'mo kwolabonyugono. Aki abolo purukwe'aro gami jaiyo tokwe'aro tovallu momuudeyapiyo'mo kwolabonyugono.

³⁶ Aki a'mwo pwolluro ago tovida'ai julkwolaiyo kuulomwalodupudo ton a'mwo su toollu ikomago wimo'numwalpinogano.

³⁷ A'mwo pwol gami ganumiyagoldeyo oo ganeyago'mdeyo tonyuno kalo buuropino guureji winowo'ji kwol kuruv mino kalo buuropino guureji mwino'ji to'gwowi a'mwo su tekwo mi numjunyo'moneyokwe tov ku'nonodo'mekwomaiyo. Aki a'mwo pwol gami kwolaiyoldeyo oo taiyo'mdeyo tonyuno kalo buuropino guureji winowo'ji kwol kuruv mino kalo buuropino guureji mwino'ji to'gwowi a'mwo su tekwo mi numjunyo'moneyokwe tov ku'nonodo'mekwomaiyo.

³⁸ Aki a'mwo pwol gami i'noguropte tov momworarowo'ji mi manumjuno'ji tov a'mwo su tekwo mi numjunyo'moneyokwe tov ku'nonodo'mekwomaiyo.

³⁹ Aki a'mwo pwol gavnokweyolluro kulako tovida'ai aiyo mwallo'mo tovino to'no wiyo'mwoju'nonekono. Toro kwiyo'mwoju'no'ji su tool aiyo yiunokuudo mujomwekovlaiyo'moneyokwe to'gwowi ku'nono mwiyo'mwoju'nonekono. Toro kuvi kuruv a'mwo pwolno'gwowi mino kuudo nubweyodowo'jure tovida'ai gavnokweyolluro kulako tovida'ai aiyo tov nokwo yovlawonokwono. Toro sovlawo'ji kuvi kuruv aiyo yiunokuudo mujomwekovlaiyo'moneyokwe to'gwowi nomaronekono.”

Lukomgu Gooti tool mubiyo sugudo pun nuuwiyono tovinokwono

⁴⁰ Aki Jisasol aro kuudokaikono. “A'mwo pwol kemi ilaiyo amollekumaro'ji tov nuu kwonyuda'ai ilaiyo mollonumaronekono. Aki a'mwo pwol mi ilaiyo amollonumaro'ji su tool mi amonuwopiyaboka kwolluda'ai ilaiyo mollomaronekono.

⁴¹ Aki a'mwo pwol a'mwo proofet mollajokwe pwolluno, Oo a'mwo akal proofet mollajokwe tooldeyo, kuudo yaurowo'ji ilaiyo amollomaro'ji tov a'mwo su tool Gooti toolluro mubiyo sugudo pun nomaronekono. Gamoro mubiyo marono su tov proofet mollajokwe tooravuro mubiyo amapi to'busuko kubalno aval'no nomaronekono. Aki a'mwo pwol a'mwo sugudo pwolluno, Oo akal a'mwo sugudoldeyo, kuudo yaurowo'ji ilaiyo amollomaro'ji tov a'mwo su to kwol kuruv Gooti toolluro mubiyo sugudo pun nomaronekono. Gamoro mubiyo marono tov a'mwo sugudo tooravuro mubiyo amapi to'busuko kubalno aval'no nomaronekono.

⁴² Lukomgu a'mwo pwol kevu a'mwo yovomaiyokwe tekwojekullu ikwonowo'ji aro aikudo'ji tov, “Oo akaro Krais toollu uumjunyokwe tekwojodeyo,” toro ikudowo'ji kuuleyaluko'mo yodopure tekwojekullu kapwo wonyo puruv aikulluro'ji tov a'mwo su to kwollu kuruv lukomgu Gooti tool mubiyo nuuwiyonekono. Nebal'no ikudumo'mokwono. A'mwo su tool gamoro mubiyo sugudo tov lukomgu kuvinono nomaronekono.” Jisasol toro kuudokaikono.