Kooloosi 4 - Gooti Toolluro Yogalokwono

A'mwo mido mollomwalokwe tooro kemi a'mwo abolo ki'nato womdokwe tobuurai ilaiyo neya igolmwalpino tovinokwono

¹ A'mwo mido mollomwalokwe toorekul kemi a'mwo abolo ki'nato womdokwe tobuurai ilaiyo igolopi po'dogalo neya domollomwalogaulo. Kevu aro tovino kuudo nyallulo'gwonmwalpiyo. A'mwo mido mollomwalokwe kworekul kuruv kemi mido mollekumwalokwe pwol kurukwerekikono. Su tool Gooti toolluro ago muunyu kai'muu mwalodowodekono. Toro toolluno kuudo miyallulo'gwonopi kemi ki'nato womdokwe tobuurai ilaiyo neya jugologaulo.

Jisasolluro a'mwo abolo ton pasudo punyu neya yomjomwekovlavogapureyokwe Poolol adumul'mwojoka tovinokwono

² Kevu Gooti toollu subusu'nyogalo wuudumovla'mdupudo tov mimwogapipinono. Toro te kevu nyumwogapipiyokwe tov wako neya kuu'nopi Gooti toollu, “Nenoloo,” to'no duudumovlavogaulo.

³ Aki kevu subusu'nyogalo kuudupi su toga Gooti tool nemiyo'mo kudo'aiko kuusanekubweyono'moneyokwe neya duudoganogaulo. Gooti tool kudo'aiko ausanekubweyo'ji su tovi'aro nevu Krais toolluno yiulo yogalo apuu'nallajuko su tokwe a'mwo abolo punyu kuu'maiyo toru'no nomoruudanonogano. Nuvu kuuguudo su tovi moruudomollodore tovino tov mi wuulo ameranubweyoponyugono. Toro toonyu wuulo killo'mo ago tovi kuule'na'dumdonyugono.

⁴ Toro te Gooti tool mi anyo'mwojoneyokweyo'mo kevu subusu'nyogalo neya duudogaulo. Nuu Gooti toolluro yogalo tovino kuu'maiyo toru'no neya bomollolupto'nosumokwono. Gooti toolluro mi nyo'mwojodowo'jure tokwe kuvinono nokwo moruudumwalmonyugono.

⁵ Kevu a'mwo abolo kwa'mguda'ai Jisasolluno kuudo muubweyodupudo tonyuro akuuto tomuu pi'mwono neya jomjomwekovlavogaulo. Toro togaikul yovrowosunopi a'mwo abolo su tonyu Jisasolluro pasudo tovino wuuduuwallo'moneyokwe iruko pun yasuwa'no nekuuwolo'mwalo'jo.

⁶ Yovekurajo akavi duu'nyulo. Soore tov wosamujuko tonyu wuullo molludo'mdowodokwono. Su toro to'busuko kubalno yiuwi'nokai toga kemoro yogalo wuudodopure tovi'aro Gooti toolluro yasuwa'wino sugumaluko tonyuno kuu'maiyo toru'no neya bomollolupto'nubweyogaulo. Aki kemoro yogalo wuudodopure su tovino a'mwo abolo pun yamuugojo nekudoganpinogano. Toro aikudoganpi tovino'mo kevu sumdomgu neya jovrowosunogaulo. Toro togaikul yiuwi'nokai a'mwo abolo pwolno puru'monodo tonyu kemoro yamuugojo tonyuno pi'mwono nokwo wuudumwalpinogaikikono.

Poololluro aiyowo'mo yogalo ajakwolloka tovinokwono

⁷ Nuu a'mwo pwollu kemiyomno mekwopiyamonyugono. A'mwo amekwopiyami su tool moro somjomwekovla'mwako tonyuno kemi nokwo ikudonekono. A'mwo su toolluno yovo tov Tikikosolekono. Toro tool mi nyugwai'yago tekwobusuko nyumo'nodowo kalo buuropino nyunodowodekono. Toro tool nuuge avaiwomdokwe imo'nodowodekono. Aki toro tool Aguto toolluro womdo su tovi guureji porugwo'mo'na'dowodekono.

⁸ Toro te kevu nemino kuudo youronekumapino'moneyokwe nuu a'mwo su toollu kemiyomno amekwopiyamono. A'mwo su tool nemoro yiuwi'nokai yomjomwekovla'mdowado tonyuno kuuguudo aikudo'ji tovi'aro kemoro poowokalago tonyu jurogudo nokwo daikullumwojonekono.

⁹ Aki nuu kemida'ai a'mwo pwollu mekwopiyamonyugono. A'mwo su toolluno yovo tov Oonesimosolekono. Toro tool mi nyugwai'yago tekwobusuko nyumo'nodowo aki Aguto toolluro womdo tovi guureji porugwo'mo'na'dowodekono. A'mwo su tooke'aro Tikikoseke'aro tooral akawaida'ai yiuwi'nokai nemi anekullumo'nugelabadokwopo tonyuno kuuguudo tov kemi nokwo ikudubullunorakono.

¹⁰ A'mwo nuuge wuulo killo'mo ago tovi kuule'na'dowolo pwolluno yovo tov Aristakosolekono. A'mwo su tooke'aro aki Banabasolluro gagumiyago Makolo dodupudo tooke'aro tooral kemi, “Ilaiyokwono,” adekwopiyamalorakono. Sumdomgu nuu Makolluno me'no adaikumul'mwojonyugono. Toro adaikumul'mwojo tovi'aro uumjunopi Makol kemi abekuru'maro'ji toollu ilaiyo neya mollomapinogaikikono.

¹¹ Aki a'mwo pwolluno yovo tov Jisasolekono. Toro toolluno yovo puruv Jastosolo dodupudekono. Toro tool kemi, “Ilaiyokwono,” adekwopiyamokaikono. A'mwo pworapwol su tooro Juuworogano. Toro toorogai'aro nuuge'aro toonol aguto kig Gooti toolluro mido mollomwalo tovino'mo womdo tovi avaiwomdo yodowadonogano. Yiuwi'nokai a'mwo avaiwomdokwe tooraida'ai yiuno Juu pworapwol su toorono nuuge womdo yodupudorogano. Aki mi avaiwomdokwe su tooravuro jurogudo danyumwojodopure tovida'ai nuu paiko to'no ibwosunodumdonyugono.

¹² Aki kemida'ai a'mwo pwolluno yovo tov Epafrosolekono. A'mwo su tool nuuge akawai mwalodowo Krais Jisasolluro ki'nato womdo wiyodowodekono. Toro tool kemi, “Ilaiyokwono,” adekwopiyamaiyo. Aki a'mwo su tool kemiyo'mo Gooti toollu subusu'nyogalo guurejuno aro wuudodowodekono. “Kooloosida'ai Jisasolluro a'mwo abolo ton a'mwono tonbusuko jurogudo neya imo'nopi kevnokwe ton kuudo neya yaurogapuro. Oo nevu yiuwi'nokai Gooti toolluro ilaiyo winodowo'jure tonyu yiuno ilaiyo to'no duumjunmwakuuwono. Kuudo yaurogapuro.” Gooti tool kemi jurogudo adaikullumwojoneyokwe tovino'mo a'mwo su tool subusu'nyogalo wuudodowodekono.

¹³ Kevu duu'nyulo. Nuvnokwe toonyu a'mwo su toolluro kemi ikullo'mwojo'mo womdo guureji yodowodo tovi me'no muugona'dumdonyugono. Aki Jisasolluro a'mwo abolo ton wagwolago Leyadisiyakwe'aro wagwolago Hirapoolesokwe'aro tovallu mwalodupudo kunyu kuruv wiyo'mwojo'mo womdo tov guureji yodowodekono. Epafrosolluno tov torokwono.

¹⁴ Aki dookta pwolluno kalo buuropino nekullunodowodekono. Dookta su toolluno yovo tov Luukolekono. A'mwo su tooke'aro aki a'mwo Demasolo dodupudo tooke'aro tooral yiuwi'nokai su tooral kemi, “Ilaiyokwono,” adekwopiyamalorakono.

¹⁵ Nuu Leyadisiyada'ai Jisasolluro a'mwo abolo mi nyugwai'yago nyo'mwo tonbusuko nyumo'nodupudo tobuurai, “Ilaiyokwono,” adopiyamono. Aki abolo puvino yovo tov Nimfavokwono. Abolo su tokwe'aro aki Jisasolluro mollu'bwoto tobuuro abolo su tovuro ago tovi i'bwo'nodupudo togai'aro tonyu, “Ilaiyokwono,” adopiyamono. Moro, “Ilaiyokwono,” adopiyamo akav a'mwo abolo su tonyu duujulo.

¹⁶ Kevu Kooloosida'ai a'mwo abolo togaikul pas akavi neya mojagilpinogaikikono. Kevu pas akavi me'no mojagilopi lukomgu Leyadisiyada'ai Jisasolluro mollu'bwoto tonyomno neya morapipinokwono. Aki moro pas puruv Leyadisiyada'ai tobuurai sumdomgu me'no sokwollapiyonyugono. Pas su tovi kev kugaikul kuruv neya domojagillulo.

¹⁷ Aki a'mwo pwolluno yovo tov Arkiposolekono. Kevu a'mwo su toollu aro neya duujulo. “Guu Aguto toolluro womdo agujaboka tovi kuvinono neya jopiyono.” Duujulo.

¹⁸ Nuu Poolonyugono. Nuvnokwe toonyuro ato tokwe, “Ilaiyokwono,” yakwollodum aikwopiyamono. Nuu wuulo killo'mo ago tovi anakuuto tomuu kuule'na'dumdo toonyuno kevu kuudo nyallulo'gwonmwalpiyo. Oo Gooti toolluro yasuwa'wino sugumaluko tov kemi nekwo'movla'mwalonokwono.