Joona 3 - Gooti Toolluro Yogalokwono

Joona'wol Gooti Yawellu kaduko wiyo'no wagwolago Ninive'no avlavoka tovinokwono

¹ Toruda'ai Gooti Yawel gamoro yogalo tov Joona'wollu aki aiko te aro kuudokaikono.

² “Guu ilodavo'bi wagwolago bwotonyo Ninive'no dovlavono. Toro plavo'bi wagwolago su tovida'ai a'mwo abolo tonyu moro yogalo agudo tokwe domoruudono.” Kuudokaikono.

³ Toro kuudoka tovi Joona'wol Gooti Yawelluro yogalo tovi kaduko wino sumaiyokwe wagwolago Ninive'no avlavokaikono. Wagwolago su tov bwotonyo kuunodokwono. Toro tovi a'mwo pwol kuulawo'ji imgu aiyowo'mo do'gwapiyo toru ki'meyo'mo tool iruko pullapullu uuwolo'nonekono.

⁴ Toro te Joona'wol wagwolago su tovi kuulno sumaiyokwe iruko pullugwo me'no uuwolo'no'no toga a'mwo abolo tonyu aro amoruujajukekono. “40-pela iruko tobuul me'no bawo'ji toga Ninive akaru kaiyako i'nowo'ji yiunokuudo mworonokwono.” Amoruujajukekono.

⁵ Toro moruudoduke tovi Niniveda'ai a'mwo abolo ton wuu'nyuno sumaveyokwe, “Oo nebalo'mdeyo,” do'mno Gooti toolluno kuudo kuubweyopogano. Toro ton wosamujuko kumako mwallo'moneyokwe iruko pubuul jesuno sumaveyokwe aki kanyu sa wollo'mo youro togai'aro amollosopogano. Wagwolago su tovida'ai a'mwo aguto yovokwerodeyo oo a'mwo yovomaiyokwerodeyo yiuwi'nokai ton toro sopogano.

⁶ Aki Niniveda'ai a'mwo aguto kig kwol kuruv Joona'wolluro yogalo kuudoka tovi wuu'no'no kalo kalo'mo sokaikono. Toro tool gami sia kig tovida'ai ilodavo'no gami youro sugumaluko kumi'yago touso irolosuno sumaiyokwe kanyu sa wollo'mo youro tov amollosokaikono. Toro mollosuno sumaiyokwe kalo'mo tool dukwagupto puvi kwolojuulo'narokaikono.

⁷ Toro wolojuulo'na'no sumaiyokwe Niniveda'ai a'mwo abolo tonyuno aro amodapiyokaikono. “Nuu a'mwo aguto kig toonyuge'aro moro a'mwo womdo agutokwe toorogai'aro toonol aro aikudumawono. “Kevu yiuwi'nokai a'mwo abolo togaikul wosamujuko manyo'moneyokwe iruko tobuullu kumako neya domwallulo. Yiuwi'nokai wosamujuko togai'aro wonyo togai'aro manupinogaikikono. Aki kemi wuulo ki'duvolodupudo buulmokauworodeyo oo sipsiporodeyo kworo kuruv kumako neya mwalopi wosamujuko togai wonyo togai ton mwipinono.

⁸ Aki kevu yiuwi'nokai togaikul kalo kalo'mo neya jogaulo. Toro togaikul kanyu sa wollo'moneyokwe youro togai mobwosu'naropi Gooti toollu subusu'nyogalo guureji neya duudogaulo. Aki kemi ma'no ma'no mujeroungovla'mdupudo ton akaru'aro neya jumwogapiyulo. Aki kemi ibesa'aiyo wuulo ki'duvolodupudo kworai kuruv kanyu sa wollo'moneyokwe youro pun neya jubweyulo.

⁹ Nevu yiuwi'nokai tonol su toro sa'ji tov Gooti tool nemi kaiyako nyanekullugolo'jokweyo'mo kuudo muuduko puruv yauronoldukono oo miyauronoldukono? Gooti tool kuudo muuduko sauro'ji tov nemino surodo kwinadopiko tov dugoga wirowo'ji nemi maromiyebuuranekwopiyonekono.” Aikudumawono.” Kuudokaikono.

¹⁰ Toro te Niniveda'ai a'mwo abolo ton kemi ma'no ma'no amjumovlaiyajupo tonyu buulo kuugunyumopiyopogano. Toro uugunyumopiyodopure tonyu Gooti tool wono'no aro adokaikono. “Oo akabuuro moro duudapi yogalo kwiyo tovino nebalo'mdeyo kuudo duubwemwakovo.” Adokaikono. Toro juno sumaiyokwe a'mwo abolo su tonyu kaiyako igollo'mo soka kwol kuruv kuudo muuduko puruv saurokaikono. Toro yau'no sumaiyokwe gamoro kaiyako igollo'mo duudapi yogalo kwiyoka tovi kuvinono muumjuno'no Niniveda'ai a'mwo abolo su tobuurai maromiyebuuropiyokaikono.