Joona 2 - Gooti Toolluro Yogalokwono

Joona'wol Gooti Yawellu subusu'nyogalo kuudoka tovinokwono

¹ Joona'wol domwoga toolluro sumwoluko tovi anakuuto tomuu kuuno kuulomwalodowodo toga gami Gooti Yawellu subusu'nyogalo kuudokaikono.

² Toro toolluro kuudoka tov arokwono. “Oo Gooti Yaweloo, nuu a'mwo me'no bolodupudo tooravuro akamuu jul'nyokwe tekwonyu mwalodum gumi deko gudodore tovi nonuu'numwakuno.

³ Guvnokwe tooku soolwara tovi anakuuto kuunodo akamuu kwolomonuwopiyamadekwonyugono. Toro tekwonyu wonyo buugo tov aiyowomno airogabolonuma'mwallo. Aki gumoro yodore tovida'ai soolwaravuro luwagu luwaguto sapiko tov moro mido'bwoka tovi abu'duvoloma'mwallo.

⁴ Toro anyumo'nadopiko akavi wonodum gumino aro kuudo sau'mono. Oo gumoro mwalodumdo toruda'ai me'no amovomjonuwopiyamokaikwonyudeyo. Toro kwekwonyu kuruv gumi ilomogwopiyo'moneyokwe ago su tovi aki aiko te noonmonyudeyo. Kuudo sau'mono.

⁵ Toro wonmo kwekwonyu kuruv aga wonyo buugo tov yiunokuudo bu'duvolonuma'dowo moro sumuujudo tov ku'nono miyalomo'mono. Aki soolwaravuro gwo'gwopto ton moro mido tovi aiyowomno amoweyomguranubwemokaikwonyugono.

^6-7 Toro moweyomguranubweyodowo soolwaravuro anakuuto tomuu muumuudo tooravuro dago kuunodo toru kwolai'mo'mekwonyugono. Toro towai wolai'mo'mdum kuudo sau'monyugono. Oo akawai yiunokuudo ki'na'mekwonyudeyo. Kuudo sau'monyugono. Toro tekwonyu wonyo buugo akavi anakuuto tomuu yiunokuudo amwalo'mujuko kwonyu kuruv moro subusu'nyogalo gudodore toga guu Gooti Yaweku ilomogwopiyo'moneyokwe ago toru mwalodumdo tooku me'no anuu'numadekwonyugono. Toro tooku nuu wonyo buugo tovi anakuuto kuunodo tomuu mwalodore toonyu amollurolovonumokailamodekugono.

⁸ Toro tookujuno a'mwo pworo kuudo nokwo agubweyopujuko kworo kuruv buulo gugunyumopiyokwerogano. Toro yodupudo tooro kemi kuunano gooti tooraino to'no ilomoropiyodapudorogano.

⁹ Toro ilomoropiyodapudo kuvi kuruv nuvno'gwowi yiuno gumino ilomogwopimwolamekwonyugono. Aki gumi gujabiyo'moneyokwe pworai romiroudapiyo'mi moro subuu'yamju adagujumo tovi kuvinono uumjunmwalmekwonyugono. Toro tekwonyu gumino tov aro dumwalmonyugono. “Nemi bomollurolovonekumokalokwiyo'mo tool yiuno Gooti Yawel kwol kuunogano.” Dumwalmonyugono.” Joona'wol Gooti Yawelluno subusu'nyogalo toro kuudokaikono.

¹⁰ Toro wuujuno sumaiyokwe Gooti Yawel domwoga toollu kuuguudo aduuwiyokaikono. Toro duuwino sumaiyokwe domwoga tool soolwaravuro wolo wobo toru'no uuwo'no Joona'wollu kwodako amuudosokaikono. Toro amuudosoka toga Joona'wol weko yalukullo toru amwalokaikono.