Joona 1 - Gooti Toolluro Yogalokwono

Joona'wol Gooti Yawellu kisuvolo wiyo'no lukado avlavoka tovinokwono

¹ To'no'gwowi Gooti Yawel gamoro yogalo tov Amitaiyolluro muugunyo Joona'wollu aro kuudokaikono.

² “Nuu a'mwo abolo punyuro ma'no ma'no mujumovla'mdupudo tovi me'no wonodumdonyugono. A'mwo abolo su ton wagwolago bwotonyo Ninive toru kuulomwalodupudogano. Toro tovino tov guu wagwolago bwotonyo su tovino yere plavo'bi wako neya au'nogapureyokweyo'mo duudapi yogalo duuwiyono.” Kuudokaikono.

³ Toro kuudoka kuvi kuruv Joona'wolno'gwowi ku'nono muumjunokaikono. Toro tool Gooti Yawellu uugollu'mo'mno sumaiyokwe lukado avlavokaikono. Toro tool wonyo wolago Joopa'no wolno sumaiyokwe sip pwol wagwolago Tasis tomuuno plaiyo'mo yoduke toollu so'mgonomarokaikono. Toro yo'mgonoma'no sumaiyokwe nuugwiyo biyoso'no sip su toollu aulomwalokaikono. Toro tool a'mwo Tasis'no pla'mdopure toorogai avlavokaikono.

⁴ Joona'wol lukado toro plaiyo'mo yoduke kuvi kuruv Gooti Yawel dole'manollo bwotonyo puruv soolwara tovi amoropiyabokaikono. Toro amoropiyaboka tovida'ai soolwara tov luwagu luwaguto bwotonyo yo'no sip tool kaiyako yo'mo sokaikono.

⁵ Toro yoduke tovi sip toolluda'ai moduvomwallokwe tooro luko bwotonyo ino sumaveyokwe sip su tool kaiyako nyo'jokweyo'mo kemi go'no go'no gooti toorai deko kuudoporogano. Toro wuujuno sumaveyokwe sip tool paiko imo'nono'moneyokwe kuto ivito pun soolwara tovi abwolomodukwopiyaporogano. Toro yodopure kuvi kuruv Joona'wolno'gwowi sip toollu anakuuto tomuu wolno sumaiyokwe sa kwollajukekono.

⁶ Toro wo'duke toga sip toollu gunyukullokwe a'mwo tool kwollomno wolno sumaiyokwe aro kuudokaikono. “Ai, guu buro'nyo'mo sa dookuno? Guu yere dukavo'bi gumi gooti toollu deko duudono. Toro wuudo'bi nevu nobollo'mo sumwakuuwo akaikwojonolluno kalo kwino'ji to'gwowi yowa'no nekullo'mwojonekono.” Kuudokaikono.

⁷ Toro wuujuno sumaiyokwe a'mwo sip toollu moduvomwallokwe tooro sajunoporogano. “Nemoro jul'nyo ama'mwakuuwo akav ala'mwolluro tovasuda'aiyo'mdukoneyokweyo'mo yamju puruv agallainyubworano.” Toro juno'mno gallainyubwo'no gallainyubwo'no sumaveyokwe Joona'wollu so'mgonomaroporogano.

⁸ Toro so'mgonomaropo toollu kuudoganoporogano. “Guu jodonekubwasono. Jul'nyo akav burowo'nyo kavlo tovida'ai doma'mwakuuwono? Aki toro tooku buro'nyo womdo yodumdekudeyo? Aki toro tooku gadomuuda'ai abadokuudekudeyo? Aki gumoro avalo tooro ala'mworuvodeyo?” Kuudoganoporogano.

⁹ Toro kuudoganopo toorai Joona'wol aro kuudokaikono. “Nuu Hibruu a'mwonyugono. Toro toonyu muunyu kai'muu mwalodowodo Gooti Yawellu ilomoropiyodamdonyugono. Gooti su tool soolwara tokwe kwako tokwe tovallu sokwollosokaikono.”

¹⁰ Joona'wol toro wuujuno sumaiyokwe aki aro kuudokaikono. “Nuu mi Gooti Yawel su toollu wuugollu'mo'mdum lukado avla'mwakono.” Kuudokaikono. Toro kuudoka tovi sip toolluda'ai moduvomwallokwe a'mwo tooro wuu'no'mno luko bwotonyo ino sumaveyokwe Joona'wollu yogalo aro kuudoporogano. “Guu su toro sadokuudo tov kaiya'no bwotonyo sadokuuno.” Kuudoporogano.

¹¹ Toro wuujuno sumaveyokwe dole'manollo bwotonyo tov guureji ino ino sumaiyokwe soolwara tovuro luwagu luwaguto kuruv bwotonyo sumo'nokakwono. Toro imo'noduke tovi sip toolluda'ai moduvomwallokwe a'mwo tooro luko bwotonyo ino sumaveyokwe Joona'wollu kuudoganoporogano. “Soolwaravuro luwagu luwaguto sumwalluko akav kavo worono'moneyokwe gumi adado gujanekudeyo?”

¹² Toro kuudoganopo tovi Joona'wol kuudokaikono. “Oo aga nuu kuudo nyouroma'mono. Jul'nyo ama'mwakuuwo akav moro tovasuda'aiyokwono. Toro tovino tov kevu mi galonumaropi soolwara tovi doolomogalonyudukwopiyoulo. Toro kwolomogalonyudukwopiyapi toga soolwara tovuro luwagu luwaguto sapiko tov imwogapiyowo'ji kavo nokwo woronokwono.” Kuudokaikono.

¹³ Joona'wol toro kuudoka kuvi kuruv a'mwo sip toollu moduvomwallokwe tooro luko yo'mno kuvinono uumjunyo'mo mwinoporogano. Toro tooro i'buukuu'nolluko togai soolwaravuro wolo toru'no ki'meyo'mo guureji avraibworoporogano. Toro avraibworopo kworo kuruv dole'manollo tov bwotonyo guureji imo'noduke tovino tov ku'nono mai'movoporogano.

¹⁴ Toro tekwojo Gooti Yawellu deko aro kuudoporogano. “Oo Gooti Yaweloo, nevu a'mwo akallu soolwaravi wolomoropiyowa'ji aromiyosa'ji tov guu nemi mido pun nonekuma'biyo. Aki toro tekwojonollu noromiyanekubwebiyo. Nevu gumino tov aro kuudo souroguma'mawono. Akaro sumo'nadopiko akav yiuno guvnokwekujuro gujunoduke tovida'ai jumo'nadopiyo. Kuudo saguu'mawono.” Kuudoporogano.

¹⁵ Toro wuujuno sumaveyokwe Joona'wollu maro'mno soolwaravi kwolomogalowopiyaporogano. Toro kwolomogalowopiyapo toga soolwara tov kavo nokwo kworokakwono.

¹⁶ Toro sumo'noka toga a'mwo sip toollu moduvomwallokwe tooro wono'mno luko bwotonyo ino sumaveyokwe Gooti Yawellu wiyo'moneyokwe pwollu aromiroudapiyoporogano. Aki Gooti Yawellu womdo wiyo'moneyokwe subuu'yamju pugai'aro aduuwiyoporogano.

¹⁷ To'no'gwowi Joona'wollu yere mwolomogalowopiyodopure toga Gooti Yawel Joona'wollu me'nyudapiyo'moneyokwe domwoga bwotonyo pwol me'no sovrowosokaikono. Toro te Joona'wollu soolwara tovi kwolomogalowopiyapo toga domwoga su tool ame'nyudapiyokaikono. Toro me'nyudapino sumaiyokwe toga Joona'wol domwoga toolluro sumwoluko tovi anakuuto tomuu iruko pullapullu surakuuto pullapullu aulomwalokaikono.