Joon 9 - Gooti Toolluro Yogalokwono

Jisasol a'mwo sumnowojokwe pwollu sukuloka tovinokwono

¹ Toruda'ai Jisasol kado plaino sumaiyokwe a'mwo sumnowojokwe pwollu kwonokaikono. A'mwo su tool gami ganeyago tov muudu'no somaroka togada'ai sumnowojokwe to'no sumo'nyajukekono.

² Jisasol toro toollu wonyuno sumaiyokwe gamoro uumjunyokwe tooro aro kuudoganoporogano. “Ibwasokweyoloo, a'mwo akallu muudu'no somaroka toga sumnowojokwe me'no sumo'nyungiko toollu somaroka tov buro'nyo kavlo tovida'ai kwimo'nokaldeyo? Sumnowojo su tov gavnokweyolluro ma'no ma'no pasudo tovida'aiyo'mdukono oo gami ganum kwolabolo teyaulluro ma'no ma'no pasudo tovida'aiyo'mdukono?” Kuudoganoporogano.

³ Su toro kuudoganopo tovi Jisasol kuudokaikono. “Awiyo, sumnowojo su tov gavnokweyolluro ma'no ma'no pasudo tovida'aiyo'maiyo. Aki gami ganum kwolabolo teyaulluro ma'no ma'no pasudo tovida'ai kwimo'nokalmaiyo. Toro kuvi kuruv Gooti tool gamoro jurogudo tovino a'mwo abolo tonyu kuu'maiyo toru'no wuuduuwallo'moneyokwe kwimo'nokaikono.

⁴ Neya duu'nyulo. Bako tov kuuno pwopiyodowo'jure toga nuu mi amonuwopiyaboka toolluro womdo tonyu yere neya imwalmonyugono. Lukomgu dugumdo tov me'no aimwonyopiyo'ji toga'no'gwowi a'mwo pwolnodo kwol kuruv womdo ku'nono mimwalonekono.

⁵ Nuvu kwako akavi kuuno amwalmi toga a'mwo abolo kwako akavi mwalodupudo tonyu bako wimo'numwalmonyugono.” Kuudokaikono.

⁶ Jisasol toro me'no wuujuno sumaiyokwe toga kwako tovi ibupto apurosokaikono. Toro kupurosuno sumaiyokwe ibupto su tokwe kwonolo amolla'movokaikono. Kwonolo su tov luvoma'no sumaiyokwe a'mwo sumnowojokwe toolluro sumdo tovallu surarokaikono.

⁷ Toro ira'no sumaiyokwe aro kuudokaikono. “Guu wonyo buugo Siloowam toollomno plavo'bi jal'mo'nono.” Yovo, Siloowamolo, su tovino amovodo'mwojajungiko tov Amorapiyokaleyo'mokwono. Toro te a'mwo sumnowojokwe tool plaino sumaiyokwe wonyo buugo su toollu sal'mo'nokaikono. Toro sal'mo'noka toga sumdo ilaiyo to'no ainokaikono. Toro kinyuno sumaiyokwe aikomgu abokaikono.

⁸ Toruda'ai a'mwo su toolluro ajumiyo avalo tomuuda'ai togai'aro aki a'mwo abolo sumnowojokwe domdo jugonoduke toollu kwonyajupo togai'aro ton i'bwo'no'mno aro sajunopogano. “A'mwo pwol sumdomgu mwalodowo domdo ajajuko su tool akal kwoldukono?” Sajunopogano.

⁹ Aki pun adopogano. “Su tool kwekono.” Toro kuvi kuruv puno'gwowi aro adopogano. “Awiyo, su tool kwolmaiyo. Yiuno sumdomago aval'no kula'nokakwe pwekono.” Adopogano. Toro dodopure kuvi kuruv a'mwo domdo ajajuko su tekwono'gwowi aro kuujajukekono. “A'mwo sumnowojokwe domdo adaikullugonyajuko tool nuu kwonyugono.” Kuujajukekono.

¹⁰ Toro te a'mwo abolo ton kuudopogano. “Guu sumdo aiko te ainmwakudo su tov adado sukulnumadekudeyo?”

¹¹ Toro kuudopo tonyu a'mwo su tekwo aro kuudokaikono. “A'mwo, Jisasolo, dodupudo tool kwonolo tov luvomaro'no moro sumdo tovallu nyura'no sumaiyokwe anyudumwa'jukekono. “Guu wonyo buugo Siloowam toollomno plavo'bi jal'mo'nono.” Anyudumwa'jukekono. Toro anyudumwa'juko tovi nuvu plavono wonyo buugo su toollu sal'mo'numwa'jonyugono. Toro toonyu aga'no'gwowi sumdo nokwo ainmwakono.” Kuudokaikono.

¹² Toro kuudoka toollu kuudoporogano. “Su tool gadomuu domwallo?” Toro kuudopo tovi kuudokaikono. “Nuu kuudo miyau'mwakono.” Kuudokaikono.

¹³ Toro ton a'mwo sumnowojokwe sukuloka toollu momwora'no sumaveyokwe Farasi tooraiyomno amokavlavopogano.

¹⁴ Toro amokavlavopo su tov aro tovinokwono. Jisasol kwonolo tov maro'no a'mwo su toollu suraroka tov iruko Sabat toga sokaikono.

¹⁵ Toro te a'mwo sumnowojokwe sukuloka su toollu Farasi tooro momwora'no sumaveyokwe yiuwi'nokai gami kwimo'noka tonyuno kuudoganoporogano. Toro kuudoganopo toorai aro kuudokaikono. “A'mwo su tool ibupto tokwe kwonolo molla'movo'no moro sumdo tovi nyuraro'no nuvu wonyo sal'mo'nonyugono. Toro sal'mo'no toga moro sumdo tov aki aiko te ainonyugono.” Kuudokaikono.

¹⁶ Toro kuudoka tovi Farasi pworo adoporogano. “Oo a'mwo akal iruko Sabat toga womdo yodowodo toolluno tov Gooti toolluro amoropiyabokalmaiyo.” Adoporogano. Toro kuvi kuruv pworono'gwowi aro adoporogano. “A'mwo su tool ma'no ma'no pasudo kurukweyolno'juki duuwallo jurogudo ton adadomgu'aro nekuduuwallodowodoldeyo?” Pworo su toro adoporogano. Toro te a'mwo su toorai akuuto toru imgu amgu go'no go'no somuudeyapinoporogano.

¹⁷ Toro te Farasi tooro a'mwo sumnowojokwe sumo'nyajuko toollu aki aiko te kuudoganoporogano. “Donekudono. A'mwo gumi agujukuloka su toolluno buro'nyo kuudo jukiyau'mwakuno?” Toro kuudoganopo tovi kuudokaikono. “Oo a'mwo su tool proofet pwekono.” Kuudokaikono.

¹⁸ Toro kuudoka kuvi kuruv Juu mido mollomwalokwe tooro yogalo su tovino aro kuudo muubweyoporogano. Oo a'mwo akal sumnowojokwe kuunodo sumo'nyajuko toollu ilaiyo aiko te kinyo'moneyokwe sukulokaldeyo. Su toro tovino kuudo muubweyoporogano. Toro tooro a'mwo su toolluro kuunum kwolabolo teyaullu adomaroporogano.

¹⁹ Toro doma'no sumaveyokwe aro kuudoganoporogano. “Kevu kemi kwolaiyo pwolluno dodubuleyaukuukono. Sumdomgu somaroka togada'ai sumnowojokwe sumo'nyajukekono. Su toro dodubulo tool a'mwo akal kwoldukono? Aki toro tool adadomgu'aro aki aiko te sumdo kinodowodoldukono?” Kuudoganoporogano.

²⁰ Toro kuudoganopo tovi gami kuunum kwolabolo teyaul kuudolovakono. “A'mwo akal namoro muugunyekono. Aki toro toollu sumdomgu somaroka togada'ai sumnowojokwe sumo'nyajukekono. Navu su toro tovino kuudo me'no youroma'dowolo'makono.

²¹ Toro kuvi kuruv aga'no'gwowi sumdo nokwo ainadopiko tokwe'aro aki ala'mwol sukulokaldukoneyokwe tokwe'aro tovalluno navu kuudo miyau'mwakuuwolo. Kevu gavnokwe toollu neya duudoganyulo. Su tool a'mwonekono. Toro te adado kwimo'nokaldukoneyokwe tovino gavnokwe tool nokwo ikudonekono.” Kuudolovakono.

²² A'mwo kwolabolo su teyaulluro yogalo kuudolo su tov aro tovinokwono. Juu mido mollomwalokwe tooro a'mwo abolo tonyu luko irugollo'mo yogalo puruv aro me'no adoporogano. A'mwo pwol Jisasolluno, Oo Kraisekono, ado'ji tov Juu tooravuro i'bwo'nyago tovida'ai kwa'mgu tomuu nobilomovomjopipinekono. Su toro me'no adopo tovino tov a'mwo kwolabolo teyaul Juu mido mollomwalokwe su tooraino luko sajuleyaukono.

²³ Toro tovino tov aro kuudoleyaukono. “Su tool a'mwonekono. Kevu gavnokwe toollu duudoganyulo.” Kuudolovakono.

²⁴ Toro te a'mwo sumnowojokwe sumo'nyajuko toollu aki aiko te domaro'mno aro kuudoporogano. “Gooti toolluro muugonagwo'dowo'jure toru guu nebal'no neya donekudono. Aro tovinokwono. Nevno'gwowi a'mwo Jisasol su to kwolluno, ma'no ma'nodokwekono, kuudo sau'mwakuuwekono.” Kuudoporogano.

²⁵ Toro kuudopo tovi a'mwo su tool kuudokaikono. “A'mwo su tool ma'no ma'no pasudo yodowodoldukono oo miyodowodoldukoneyokwe tovino nuu kuudo miyau'mwakono. Toro kuvi kuruv aro tovino kuudo nyau'mwakono. Nuu sumnowojokwe sumo'nyajo kwonyu kuruv aga'no'gwowi sumdo nokwo ainmwakono. Su toro tovino'gwowi kuudo nyau'mwakono.” Kuudokaikono.

²⁶ Toro kuudoka tovi aro kuudoporogano. “Burowo'nyo agujokaldeyo? Gumoro sumdo tovi kinyo'moneyokwe tov adado sokaldeyo?” Kuudoporogano.

²⁷ Toro kuudopo toorai a'mwo su tool aro kuudokaikono. “Nuu me'no aikudumo tovi kevu muu'nyubusuko sumaporekikono. Kevu aki aiko te wuu'nyo'mo aikullunumwalluko tov buro'nyo'mo'mdukono? Kev kworekul kuruv Jisasolluro uumjunyokwe wimo'nupino'mo dukekullunadapiyo?” Kuudokaikono.

²⁸ Toro kuudoka tovi Farasi tooro yogalo aro amojurugoloporogano. “Guu gamoro uumjunyokwe wimo'nodumdekugono. Toro kuvi kuruv nevno'gwowi Moosesolluro uumjunyokwe wimo'nodowadonogano.

²⁹ Gooti tool Moosesollu kuudoka tovino nevu kuudo me'no youroma'dowadonogano. Toro kuvi kuruv a'mwo su toolluno'gwowi gadomuuda'ai abokaldukoneyokwe tovino kuudo miyau'dowadonogano.” Kuudoporogano.

³⁰ Toro kuudopo tovino a'mwo sumnowojokwe sukuloka tool aro kuudokaikono. “Kemoro yogalo anyudumapo su tovino mollolokurosi sumwakono. Kevu moro sumdo tovi kinyo'moneyokwe anyukuloka a'mwo su toolluno aro anyudumwakovo. “Gadomuuda'ai abokaldukoneyokwe tovino kuudo miyau'dowadonogano.” Anyudumwakovo.

³¹ Nevu aro tovino kuudo me'no youroma'dowadonogano. Oo a'mwo ma'no ma'no yodopure toorai Gooti tool kaduko mwiyokwekono. Toro kuvi kuruv a'mwo pwol Gooti toollu ilomoropiyawo'ji gamoro ilaiyo winodowo'jure tovi kuumjuno'ji su toolluno'gwowi Gooti tool kaduko wiyokwekono.

³² Toro te aiyoga kwako akav muudu'no sumo'noka togada'ai a'mwo pwolnodo kwol kuruv sumnowojokwe toorai ikullo'mo tov nonagutomuugono.

³³ Toro te a'mwo akal Gooti toolluda'ai mabowo'jujuko'mno'juki duuwallo jurogudo su tov ku'nono miyowo'jujukekono.” Kuudokaikono.

³⁴ Toro kuudoka tovi Farasi tooro kuudoporogano. “Guu ma'no ma'no kuumwiyokwe tookuji sogumarokaikugono. Toro tooku nemi yodonekubwasubino'mo jadokuuno?” Toro wuujuno sumaveyokwe a'mwo su tekwoji Juu tooravuro i'bwo'nyago tovida'ai abilomodukwopiyoporogano.

A'mwo pwol Jisasolluno kuudo muubweyo'ji su tool sumnowojokwe toolbusuko imo'nodowodo tovinokwono

³⁵ Farasi tooro a'mwo su tekwoji abilomodukwopiyopo tovino Jisasol me'no kuu'nokaikono. Toro wuu'nyuno sumaiyokwe a'mwo su tekwoji yo'mgonoma'no sumaiyokwe aro kuudoganokaikono. “Guu A'mwo Kwolaiyo Kuunodo toolluno kuudo dukuubwemwakuno?”

³⁶ Toro kuudoganoka tovi a'mwo su tekwo kuudokaikono. “A'mwo agutoloo, ala'mwoldeyo? Nuu su toolluno kuudo uubweyo'mo anyunadopiyo.” Kuudokaikono.

³⁷ Toro kuudoka toollu Jisasol aro kuudokaikono. “Guu su toollu me'no kwonodekugono. Aga toga gumi kuuguudo agudadokwo toonyu kwonyugono.” Kuudokaikono.

³⁸ Jisasol toro kuudoka tovi a'mwo tekwo kuudokaikono. “Agutoloo, nuu kuudo agubwemono.” Kuudokaikono. Toro wuujuno sumaiyokwe Jisasolluno sulomoropiyokaikono.

³⁹ Toro ilomoropiyoduke toga Jisasol aro kuudokaikono. “Nuu a'mwo abolo kwako akavi mwalodupudo tonyuro pasudo tovi jainyubwollo'moneyokwe kwolabonyugono. Toro ajainyubwo'mi tovida'ai aro to'busuko imo'nonokwono. A'mwo sumnowojokwe tooro aki aiko te sumdo kinpinorogano. Aki a'mwo sumdo kinodupudo toorono'gwowi sumnowojokwe imo'nupinorogano.” Kuudokaikono.

⁴⁰ Jisasol toro wuudoduke toga Farasi pworo wobo toru adaiyajupo tooro wuu'nyuno sumaveyokwe aro kuudoganoporogano. “Oo ne kwonol kuruv sumnowojokwe toorobusuko imo'nodowadonoldukono?” Kuudoganoporogano.

⁴¹ Toro kuudoganopo tovi Jisasol kuudokaikono. “Kevu sumnowojokwe kuunodorekulmaiyo. Kevu sumnowojokwe kuvinono sumo'nopujuko'mno'juki Gooti toolluro sumdo tovi kevu ma'no ma'nodo maiyokwe kwimo'nopujukorekikono. Toro kuvi kuruv kevu dodupudorekikono. Oo nevu sumdo wonodowadonogano. Toro dodupudo tovino tov Gooti toolluro sumdo tovino'gwowi kevu ma'no ma'nodokwe wimo'nodupudorekikono.” Kuudokaikono.