Joon 2 - Gooti Toolluro Yogalokwono

Wagwolago Kana tovida'ai kwolabolo yoma'nyo'mo lubullu doto sanopo tovinokwono

¹ Toruda'ai iruko pullal me'no bawino sumaiyokwe iruko aikomguda'ai tollugwoji kwako Galili tomuuda'ai wagwolago Kana towai kwolabolo yoma'nyo'moneyokwe lubullu doto puruv abai'movokakwono. Lubullu doto su tovi Jisasolluro ganeyago tov kugai amwalokakwono.

² Aki kwolabolo nyoma'nubulluno su teyaul Jisaseke'aro gamoro uumjunyokwe toorogai'aro toorai lubullu doto su tovi abupureyokwe adomaroleyaukono. Toro adomarolo tooro lubullu doto tovi abomwaloporogano.

³ Toro mwalno sumaveyokwe wain wonyo tovino supto sopo toga Jisasolluro ganeyago tov Jisasollu aro kuudokakwono. “Wain wonyo tovino supto sumwakovo.” Kuudokakwono.

⁴ Toro kuudoka tovi Jisasol kuudokaikono. “Abolobuuloo, guu su toro anyudumodo tov buro'nyo'mo'mdeyo? Numoro womdo yo'moneyokwe toga yere mabai'mo'mwallo.” Kuudokaikono.

⁵ Toro kuudoka tovi gami ganeyago tov ago tovida'ai a'mwo womdokwe pworai aro kuudokakwono. “Gamoro buro'nyo aikudo'ji tovi kevu neya duumjunyulo.” Kuudokakwono.

⁶ Lubullu doto sanopo su toru wonyo iroso'moneyokwe 6-pela sulo tovida'ai sakwollungiko bootool puuwoso wobo toru adaiyajupogano. Toro adaiyajupo su tonyu Juu tooro Gooti toolluro sumdo tovi yovraimwonyo'moneyokwe wonyo iroma'dupu sal'mo'nyajuporogano. Yiuwi'nokai bootool go'no go'nodo su tonyu wonyo tov wan handret lita tomgu'aro surosajupogano.

⁷ Toro te Jisasol ago tovida'ai a'mwo womdokwe toorai aro kuudokaikono. “Kevu bootool su tonyu wonyo tokwe jurosulo.” Kuudokaikono. Toro wuujuno sumaiyokwe a'mwo womdokwe tooro bootool tonyu wonyo tokwe yiuno muju tovino sutowosoporogano.

⁸ Me'no itowosuno sumaveyokwe Jisasol aro kuudokaikono. “Aga kevu wonyo pun luviremovomworaropi a'mwo lubullu doto mollomwalokwe tool yamju nugwonono'moneyokwe domokwilo.” Kuudokaikono. Toro kuudoka tovi a'mwo womdokwe su tooro wonyo ton luviremovomwora'no sumaveyokwe a'mwo lubullu doto mollomwalokwe toollomno kuvinono amokwoporogano.

⁹ Toro mokwino sumaveyokwe toga a'mwo lubullu doto mollomwalokwe tool wonyo su tov wain me'no sumo'nyungiko tovuro wuullo tovi yamju anugwonokaikono. A'mwo su tool wain wonyo su tov toro tomuuda'ai amokamapo'mdeyo tovino kuudo maiyekono. Toro kuvi kuruv yiuno a'mwo womdokwe kevnokwe toorono'gwowi wonyo suremovomokabopo su tovino toro tomuuda'aiyo'mdeyo kuudo me'no sauroporogano. Toro te a'mwo lubullu doto mollomwalokwe tool wain wonyo su tovi me'no nyuno sumaiyokwe a'mwo abolo uumaso'moneyokwe toollu adomarokaikono.

¹⁰ Toro doma'no sumaiyokwe aro kuudokaikono. “Yiuwi'nokai a'mwo tooro wain wonyo wuullokwe ton sumdomgu uumwodeyopudorogano. Toro uumwodeyopi wain wonyo wuullokwe su ton me'no nopiyopi amomo pwekwo yodopure toga lukomgu wain wonyo kaiya'nodo tov uumwodeyopudorogano. Toro kuvi kuruv guvno'gwowi wain wonyo wuullokwe akav sumdomgu yere manekullamadekugono. Toro kweku kuruv lukomguda'ai wain wonyo anekullamwakudo akav ilaiyokwono.” Kuudokaikono.

¹¹ Jisasolluro duuwallo jurogudo su tov muudu'nodokwono. Toro tov kwako Galili tomuuda'ai wagwolago Kana towai sumo'nokakwono. Jisasol duuwallo su tovi'aro gamoro jurogudo kuunodo tovino kuu'maiyo toru'no kuuduuwallunokaikono. Toro kuuduuwallunoka tovi gamoro uumjunyokwe tooro wono'mno kwolluno kuudo kuubweyoporogano.

¹² Toruda'ai Jisaseke'aro gami ganeyago tokwe'aro gami gadai'yago toorogai'aro gami uumjunyokwe toorogai'aro ton su towai wuugollu'mo'mno sumaveyokwe wagwolago Kapurniyam'no avlavopogano. Toro plaino sumaveyokwe ki'movo'mno su towai iruko pubuulno amwalopogano.

Jisasol a'mwo abolo Gooti toollu ilomoropiyo'moneyokwe ago tovi maket wosodopure tonyu abilomodovomjopiyoka tovinokwono

¹³ Toruda'ai Juu tooravuro lubullu doto puruvi yanyo'moneyokwe iruko tollugwo wobo toru abai'movokakwono. Lubullu doto su tovino yovo tov Muunyu Toru'aro Surukuruwolovokaveyokwono. Su toro toga Jisasol wagwolago Jeruusalem'no avlavokaikono.

¹⁴ Toro plaino sumaiyokwe wagwolago Jeruusalem tovi ki'movo'no Gooti toollu ilomoropiyo'moneyokwe ago tovuro agwapto toru'no aulokaikono. Toro kuulno sumaiyokwe a'mwo abolo pun buulmokau toorogai'aro sipsip toorogai'aro dokato sobuuro toorogai'aro su toorai maket wosodopure tonyu kwonokaikono. Aki a'mwo abolo pun noluuleyo tonyu mwalodupu nuugwiyo yodalopto yodopure tonyu kwonokaikono.

¹⁵ Jisasol toro tonyu wonyuno sumaiyokwe wuulo gunyukuurumollo'mo puruv maro'no yiuwi'nokai toorai agwapto tovi kwa'mgu tomuuno abilomodovomjopiyokaikono. Aki sipsip toorogai'aro buulmokau toorogai'aro kworai kuruv kwa'mgu tomuuno abilomodovomjopiyokaikono. Yo'no a'mwo nuugwiyo yodalopto yodopure tooravuro noluuleyo tonyu amourotowapiyokaikono.

¹⁶ Aki a'mwo abolo dokato sobuuro toorai maket wosodopure tonyu yogalo aro amojurugolokaikono. “Moro Nyunumiyago toolluro ago akav kemoro maket ago to'busuko aikullumo'nadopiyo. Toro te akaru neya wuugollu'movopi kemi noonyumwonyu kuto ivito togai domollounomokavlaiyulo.” Kuudokaikono.

¹⁷ Jisasol toro yoduke toga gamoro uumjunyokwe tooro Gooti toolluro yogalo sakwollungiko puvino aki aiko te kuudo sauroporogano. Yogalo su tov arokwono. “Nuu gumoro ago tovi pi'mwono mollomwallo'moneyokwe tovino guureji nyunodowodonyugono.” Yogalo tov su toro sakwollungikokwono.

¹⁸ Toro te Jisasolluro yoduke su tovino Juu tooro wonyuno sumaveyokwe aro kuudoporogano. “Guu nemi amodovomjonekwapiyadokuudo tooku duuwallo jurogudo puruv anekuduuwallubi tovi wonowa'ji gumino aro kuudo yaguuranekugono. Oo akal Gooti toolluro womdo tovi yo'moneyokwe jurogudo tov kuubweyokaldeyo. Kuudo nokwo yaguuranekugono. Toro te guu buro'nyo duuwallo jurogudo tov nekuduuwallubinekudukono?” Kuudoporogano.

¹⁹ Toro kuudopo toorai Jisasol aro kuudokaikono. “Kevu Gooti toollu ilomoropiyo'moneyokwe ago akavi amouropipi kuvi kuruv nuvno'gwowi iruko pullapullu tobuul me'no bawo'ji aki aiko te nomojudapimonyugono.” Kuudokaikono.

²⁰ Jisasol toro kuudoka toga Juu tooro kuudoporogano. “Oo Gooti toollu ilomoropiyo'moneyokwe ago akavi mojo'mo tov a'mwo tooro modumelabino modumelabino sumaveyokwe kworomo tov 46 tobuul kuuwolo'noka toga amojudapiyopokwono. Toro kuvi kuruv guvu tekwoguno'gwowi yiuno iruko pullapullu tobuullu ago akavi aki aiko te mojudapibinekudukono? Tarevono, guvu ku'nono mamojudapibinekwogugono.” Kuudoporogano.

²¹ Jisasol Gooti toollu ilomoropiyo'moneyokwe ago tovino adoka su tov ago kuunodo puvino adokalmaiyo. Toro kwol kuruv gavnokweyolluro kulako tovi wimo'nono tovino adokaikono.

²² Kuvinono kwimo'noka su tov arokwono. Jisasol me'no aboloka toollu Gooti tool aki aiko te amodukavokaikono. Me'no amodukavoka toga gamoro uumjunyokwe tooro Jisasolluro yogalo adoka su tovino aki aiko te kuudo sauroporogano. Su toro kuudo yau'no sumaveyokwe Gooti toolluro yogalo sakwollungiko tokwe'aro Jisasolluro yogalo adoka tokwe'aro yiuwi'nokai tovalluno kuudo kuubweyoporogano.

Jisasol yiuwi'nokai a'mwo abolo tonyuro pasudo kuuluuwo'dupudo toorai kuudo youroma'dowodo tovinokwono

²³ Toro te Juu tooro Muunyu Toru'aro Surukuruwolovoka lubullu doto tovi yanodopure toga Jisasol wagwolago Jeruusalem towai mwalo'no duuwallo jurogudo pun kuuduuwallajukekono. Toro wuuduuwalloduke tonyu a'mwo abolo bwotonyago ton wonodupu gamino kuudo kuubweyajupogano.

²⁴ Toro kuvi kuruv Jisasolno'gwowi yiuwi'nokai a'mwo abolo su tonyuro kuudo yau'dopure tovino aro me'no kwonomallajukekono. A'mwo abolo su ton mino kuudo nebal'no manubweyodupudodeyo, kwonomallajukekono. Toro tovino tov gavnokwe tool a'mwo abolo su tonyuro ato tovi mamorubwenokaikono.

²⁵ Aki kuudo neya jaullulo. Jisasol gavnokwe tool yiuwi'nokai a'mwo abolo tonyuro pasudo kuuluuwo'dopure tooraino kuudo me'no souromallajukekono. Toro tovino tov pasudo su tooraino kuu'maiyo toru'no dodoluwoso'moneyokwe a'mwo pwolluno supto miyajukekono.