Joon 11 - Gooti Toolluro Yogalokwono

Lasarosol aboloka tovinokwono

¹ To'no'gwowi wagwolago Betanida'ai a'mwo nobollokwe pwolluno yovo tov Lasarosolekono. A'mwo su tool Mariyakwe Martakwe tonodalluro ajumiyo avalo toruda'aiyekono.

² Sumdomgu abolo Mariyav wobeya sudo kuunyokwe munollo puruv Aguto Jisasolluro suvlo tovi kimovoubweyo'no gamoro midoto tokwe amollouropiyoka tov akav kurukwono. Aki nobollokwe Lasarosol abolo Mariyavuro jo'mwekono.

³ Toro te gami jo'mwo Mariyakwe'aro Martakwe'aro tonodal Jisasolluno aro adapiyolovakono. “Agutoloo, gumoro kalo buuropino gujunodowodo tool nobollokwekono.”

⁴ Toro adapiyolo tovi Jisasol wuu'nyuno sumaiyokwe toga aro adokaikono. “Nobollo su tov yiunokuudo bollo'mo'maiyo. Toro kuvi kuruv Gooti toollu ilomoropiyo'moneyokweyokwono. Aki nobollo su tovi'aro nuu Gooti toolluro Kwolaiyo toonyu yovo aguto mallo'moneyokweyokwono.” Adokaikono.

⁵ Jisasol Martakwe'aro ganabwiyago Mariyakwe'aro Lasaroseke'aro tonyo'mwolotaino kalo buuropino kwinyajukekono.

⁶ Toro kwol kuruv Lasarosol nobollokwe toolluno wuu'nyuno sumaiyokwe toga iruko pullal nokwo amwalokaikono.

⁷ Toro te iruko su tollal me'no bawino sumaleyokwe Jisasol gami uumjunyokwe toorai aro kuudokaikono. “Nevu Juudiya tomuuno aiko te avlawano.”

⁸ Toro kuudoka tovi gamoro uumjunyokwe tooro kuudoporogano. “Ibwasokweyoloo, su tomuu Juu tooro gumi sulo togai luvoromiyagubweyo'mo sumwa'jupekugono. Su tov aga toga'gwo agujumwa'jupekugono. Toro tooku su toru'no aiko te plaiyo'mo dukogujunadopiyo?” Kuudoporogano.

⁹ Toro kuudopo toorai Jisasol aro kuudokaikono. “Iruko pullugwoji kuujo sumdo tov 12-pela tobuul kurukweyokwono. Toro te a'mwo pwol iruko toga kado somollo'ji tool kwako akavi bako pwopiyodowo'jure tovino tov yello mavojumouku'nugovlawonekono.

¹⁰ Toro kuvi kuruv a'mwo pwol surakuuto toga kado somollo'ji su toolno'gwowi bako maiyokwe toolluno tov yello novojumouku'nugovlawonekono.” Kuudokaikono.

¹¹ Jisasol toro me'no wuujuno sumaiyokwe aro kuudokaikono. “Nemi ibwoto'nyo Lasarosol sa kwoso. Sa wo'dowo'jure kwollu kuruv nuvu nomodukaiyo'moneyokwe pla'monyugono.” Kuudokaikono.

¹² Toro kuudoka tovi gamoro uumjunyokwe tooro kuudoporogano. “Agutoloo, a'mwo su tool sa doosokwe to'gwowi aki aiko te ilaiyo nomwalonekono.” Kuudoporogano.

¹³ Jisasol Lasarosolluno kuudoka su tov Lasarosol bwiyo me'no aboloka toolluno kuudokaikono. Toro kuudoka kuvi kuruv gamoro uumjunyokwe toorono'gwowi, a'mwo su tool yiuno sa to'no wo'duke toolluno dodadopiyo, kuudo sauropekono.

¹⁴ Toro te Jisasol yiuno kuu'maiyo toru'no aro kuudokaikono. “Lasarosol me'no abolmwa'jukekono.

¹⁵ Su tov kevu mino kuudo nubwepino'moneyokwe nuu a'mwo abolmwa'juko su tooke mamwalmwa'jo tovino ilaiyo sadokwono. Toro kuvi kuruv aga'no'gwowi nevu a'mwo su toollomno neya avlawano.” Kuudokaikono.

¹⁶ Toro kuudoka tovi Toomasol gamino yovo puruv Didimasolekono. A'mwo su tool gavuge uumjunyokwe gabovo toorai aro kuudokaikono. “Nekwonol kuruv Jisaseke bolano'moneyokwe Juudiya tomuuno avlawano.” Kuudokaikono.

Aiyo dukaiyo'mo tokwe'aro aiyo mujomwekovlaiyo'mo tokwe'aro toval Jisasol, “Nuu kwonyugono,” adoka tovinokwono

¹⁷ Toruda'ai Jisasol wagwolago Betani wobo toru bai'mo'mduke toga aro ajuduva'nopekono. “A'mwo abolmwa'juko Lasarosol buuso tovi anakuuto tomuu wo'duke tov iruko allal allal kuuwolo'nadopiyo.” Toro ajuduva'nopo tovi Jisasol me'no kuu'nokaikono.

¹⁸ Wagwolago Betani su tov wagwolago Jeruusalem wobo toru wo'dowodokwono. Aki yiuno 3 kiloomita toru'gwo wo'dowodokwono.

¹⁹ Toro te Juu bwotonyago tooro Mariyakwe'aro Martakwe'aro tonodallu kemi kwiyo'mwo toolluno kalo dugoga wileyo'moneyokwe aboporogano.

²⁰ Martav Jisasol puuto tomuu boduke toolluno wuu'nyuno sumaiyokwe ago tovida'ai bolokwo'no Jisasollu puuto tomuu kuuru'marokakwono. Mariya'gwowi ago tovi aulomwallajukokwono.

²¹ Toro te Martav Jisasollu wuuru'ma'no sumaiyokwe aro kuudokakwono. “Agutoloo, guvu akawai mwalodo'bureyo'mno'juki mi nyo'mwo tekwo mabolowo'jujukekono.

²² Aki aro kuudo sau'mwakono. Aga kuga kuruv bwiyo su tekwojuno guu Gooti toollu buro'nyo buro'nyodeyo puvino kuudoganbi tov nokwo gujabwonekono.” Kuudokakwono.

²³ Toro kuudoka tovi Jisasol aro kuudokaikono. “Gumi jo'mwo tool aiyo aiko te nodukawonekono.”

²⁴ Toro kuudoka tovi Martav kuudokakwono. “Nuu kuudo nyau'mwakono, aiyowo'mo toga yiuwi'nokai a'mwo abolo ton amjoduko'moulapi su toga nodukawonekono.”

²⁵ Toro kuudoka tovi Jisasol kuudokaikono. “A'mwo abolo me'no bolodupudo tonyu aiyo aiko te modukaiyo'moneyokwe tool nuu kwonyugono. Aki aiyo mujomwekovlaiyo'moneyokwe wiyodowodo tool nuu kwonyugono. A'mwo pwol mino kuudo anubweyo'ji su tool abolo'ji kuvi kuruv aiyo mujomwekovla'mwalonekono.

²⁶ Aki yiuwi'nokai a'mwo abolo ton aiyo kuuno mwalopi mino kuudo anubwepi su ton yiunokuudo mabolpinogano. Guu su toro tovino kuudo dukuubwemwakuno?” Kuudoganokaikono.

²⁷ Toro kuudoganoka toga Martav aro kuudokakwono. “Agutoloo, nebalokwono. Nuvu gumino kuudo agubwemono. Guu Gooti toolluro Kwolaiyekugono. Aki Gooti toolluro nekullo'mwojo'moneyokwe ajesoka Krais toolluno, “kwako akavi nobwonekono,” dodupudo tool guu kwekugono.” Kuudokakwono.

Jisasol kalo wino'no kumdo adoka tovinokwono

²⁸ Martav toro wuujuno sumaiyokwe gami ganabwiyago Mariyaviyomno kuuwokakwono. Toro wino sumaiyokwe gami ganabwiyago su tovi judo tomuu aro kuudokakwono. “Ibwasokwe abadopiko tool gumino abwoneyokwe agudadopiyo.” Kuudokakwono.

²⁹ Toro kuudoka tovi Mariyav wuu'nyuno sumaiyokwe yere ilodavo'no Jisasollomno avlavokakwono.

³⁰ Su toro toga Jisasol ago toru yere mabai'movokaikono. Toro kwol kuruv Martavi muudu'no kuuru'maroka su towai kuuno amwallajukekono.

³¹ Toro te Mariyav ago tovida'ai yere iloda'mno sumaiyokwe Jisasollomno bolokwoduke tovi kalo dugoga'moneyokwe Juu tooro wono'mno abuumjunugolokwoporogano. Toro tooro kuudo sauroporogano. Oo gami jo'mwo bwiyo toolluro a'mwo buuso tomuu kumdato yono'mo tov dovla'mwallo. Toro do'mno abuumjunugolokwoporogano.

³² Toro kuvi kuruv Mariya'gwowi Jisasol mwaloduke toru'no avlavokakwono. Toro plaino sumaiyokwe Jisasollu wono'no gamoro suvlo dolago toru kwolomuulo'narokakwono. Toro wolomuulo'na'no sumaiyokwe aro kuudokakwono. “Agutoloo, guvu akawai mwalodo'bureyo'mno'juki mi nyo'mwo tool mabolowo'jujukekono.” Kuudokakwono.

³³ Mariyav toro wuujuno sumaiyokwe kumdato sokakwono. Toro joduke tovi Jisasol wono'no aki gavuge abopo Juu kworogai'aro kumdato dodopure toorai kwonokaikono. Toro wonyuno sumaiyokwe kalo bwotonyo wino'no jul'nyo subwosunokaikono.

³⁴ Toro tool aro kuudokaikono. “A'mwo bwiyo toollu gadomuu amorosumwa'jupoldeyo?” Toro kuudoka tovi aro kuudopogano. “Agutoloo, bo'bi bwonono.” Kuudopogano.

³⁵ Jisasol kumdo adokaikono.

³⁶ Toro doduke toollu Juu tooro wono'mno sajunoporogano. “Oo kumdo adadopiko toollu doonyulo. Su tool Lasarosolluno kalo buuropino kuunodo kwinyajukoldeyo.” Sajunoporogano.

³⁷ Toro kuvi kuruv pworono'gwowi aro sajunoporogano. “A'mwo su tool sumnowojokwe tooravuro sumdo tonyu aki aiko te kinpino'moneyokwe kuusubweyodowodekono. Toro kwol kuruv a'mwo bwiyo akallu noboloduke toga buro'nyo'mo muumjuku'mwa'jukoldeyo?” Sajunoporogano.

Jisasol Lasarosollu aiyo aiko te amodukavoka tovinokwono

³⁸ Toro te Jisasol aki aiko te jul'nyo bwotonyo ibwosunyuno sumaiyokwe a'mwo buuso toru ai'movokaikono. A'mwo buuso su tov sulo toolluda'ai adovoloumjosungikokwono. Aki a'mwo buuso noullo tovi sulo bwotonyo pweke amomjogurosopokwono.

³⁹ Toro towai ki'mo'mno sumaiyokwe Jisasol aro kuudokaikono. “Sulo su toollu domodukwopilo.” Toro kuudoka tovi a'mwo aboloka toolluro jo'mwo Martav kuudokakwono. “Agutoloo, a'mwo bwiyo su tool iruko allal allal tobuul me'no kuuwolo'numwa'juko toolluno tov aga buullujudo kuunonekono.” Kuudokakwono.

⁴⁰ Toro kuudoka tovi Jisasol aro kuudokaikono. “Nuvu aro me'no agudumo'guugono. Guvu mino kuudo anubwebi tov Gooti toolluro jurogudo kuunodo tovi noonbino'guugono. Su toro me'no agudumo'guugono.” Kuudokaikono.

⁴¹ Toro wuujuno sumaiyokwe a'mwo buuso noullo tovida'ai sulo bwotonyo toollu amousogunyugolowosopokwono. Toro mousogunyugolowosuno sumaveyokwe Jisasol muunyu kai'muuno iloonyopino sumaiyokwe aro adokaikono. “Mi Nyunumiyagoloo, mi nuu'nodumdo tovino, “Nenyoo,” agudumono.

⁴² Aki guvu yiuwi'nokai toga moro subusu'nyogalo gudodumdo tovi me'no nuu'nodumdekugono, kuudo yaguu'dumdonyugono. Toro kuvi kuruv a'mwo abolo adakwopo akan gumoro amonuwopiyabodo toonyuno kuudo neya anubwepureyokwe tovino agudumono.” Kuudokaikono.

⁴³ Jisasol toro me'no wuujuno sumaiyokwe toga deko guureji aro adokaikono. “Lasarosoloo, dolokabono!” Adokaikono.

⁴⁴ Toro adoka toga a'mwo bwiyo tool dukaino sumaiyokwe alokabokaikono. Gamoro suvlato tovake'aro sumdomago tokwe'aro tonyu youro tokwe pweyo amoweyopingiko tool alokabokaikono. Toro lokaboduke toga Jisasol a'mwo abolo tonyu aro kuudokaikono. “Kevu gamoro youro amoweyopingiko ton ikwolapiyopi kado yomollono'moneyokwe doonyapilo.” Kuudokaikono.

Juu a'mwo aguto tooro Jisasollu romiyoso'moneyokwe sajunopo tovinokwono

⁴⁵ Toro te Mariyavi dugoga wileyo'moneyokwe Juu abopo tooro Jisasolluro soka su tovi wono'mno bwotonyago tooro Jisasolluno kuudo kuubweyoporogano.

⁴⁶ Toro kuvi kuruv pworono'gwowi Farasi tooraiyomno plavo'mno Jisasolluro soka tovino kuudoporogano.

⁴⁷ Toro kuudopo tovino pris mido mollomwalokwe toorogai'aro Farasi toorogai'aro tooro kaunsel toorai aju'bworomaroporogano. Toro ju'bworomaro'mno yiuwi'nokai tooro i'bwo'nyuno sumaveyokwe aro kuudoganoporogano. “A'mwo akal duuwallo jurogudo bwotonyago ton tono tono wuuduuwallodowodekono. Toro toollu adado wiyanoldukono?

⁴⁸ Nevu a'mwo su toollu wonyapino sa'ji tov yiuwi'nokai a'mwo abolo ton kuudo nuubwepinekono. Aki kuvinono kuubwepi to'gwowi Roomda'ai tooro bopi nemoro Gooti toollu ilomoropiyo'moneyokwe ago akavi nomouropipinorogano. Aki nemoro yiuwi'nokai kantri kurukwe'aro kaiyako nobomollounonekwapipinorogano.” Kuudoporogano.

⁴⁹ A'mwo su tooraida'ai pwolluno yovo tov Kaiyafasolekono. Kaiyafasol su toro toga pris aguto sumo'nyajukekono. Toro tool aro kuudokaikono. “Kevu kuudo nonaguto imo'nodupudorekikono.

⁵⁰ Kevu kuudo neya jouromarogaulo. Nemoro yiuwi'nokai kantri tov kaiyako nomollounapiyo'jokwe a'mwo abolo tonyuro aiko toru mallo'moneyokwe yiuno a'mwo pwolnodo toolno abolo'ji tov ilaiyo imo'nonokwono.” Kuudokaikono.

⁵¹ Kaiyafasolluro yogalo kuudoka su tov gavnokweyolluro kuudo tovida'aiyo'maiyo. Kworomo su toga Kaiyafasol pris aguto sumo'nyajuko tovino tov yogalo su tov Jisasolluno proofet yogalo adokaikono. Proofet yogalo adoka su tov aro tovinokwono. Jisasol yiuwi'nokai kantri tomuuda'ai Juu a'mwo abolo tonyuro aiko toru marowo'ji nobolonekono.

⁵² Aki Jisasol yiuno Juu toorai wiyo'mwojo'mo to'no bolonolmaiyo. Toro kwol kuruv yiuwi'nokai kwako akavida'ai Gooti toolluro kwoloraiyo ton gomno gomno younopiyodupudo su tonyu mollu'bworowo'ji yiuno puru'mono momgurowoso'moneyokwe bolonekono. Proofet yogalo adoka su tov toro tovinokwono.

⁵³ Su toro togada'ai Juu mido mollomwalokwe tooro Jisasollu adadomgu'aro yoromiyosanoldukoneyokwe tovino adovi'mwojosajuporogano.

⁵⁴ Toro tovino tov Jisasol Juu a'mwo abolo tonyuro akuuto kuu'maiyo toru miyomollajukekono. Toro kwol kuruv su toro tomuuda'ai wuugollu'movo'no wagwolago Efreyum tomuuno avlavokaikono. Wagwolago su tov kwako a'mwomaiyo yalukullo wobo toru wo'dowodokwono. Toro te Jisasol wagwolago su tovi ki'mo'mno sumaiyokwe gami uumjunyokwe toorogai'aro tooro kumuu amwallajuporogano.

⁵⁵ Toruda'ai su toga Juu tooravuro iruko aguto pullugwo bai'meyo'moneyokwe wobo togakono. Iruko aguto su tollugwoji Muunyu Toru'aro Surukuruwolovoka lubullu doto tovi yanodupudogakono. Toro te iruko aguto su tollugwo nobai'meyo'mo yoduke tovino tov yiuwi'nokai tomuuda'ai Isuraiyol a'mwo abolo pun wagwolago Jeruusalem tovi yere abai'movopogano. Toro bai'mo'mno sumaveyokwe Gooti toolluro sumdo tovi sugudo wimo'nyo'moneyokwe sovraimwonyajupogano.

⁵⁶ A'mwo abolo su ton Jisasollu yo'mgonomallo'moneyokwe a'mgono somollopogano. Toro yomolluno sumaveyokwe Jeruusalemda'ai Gooti toollu ilomoropiyo'moneyokwe ago tovuro agwapto toru kuulodavo'mno aro sajunopogano. “Kevu buro'nyo kuudo jukiyau'mwakovo? A'mwo su tool iruko aguto tollugwoji noulabwonoldukono oo maulabwonoldukono?” Sajunopogano.

⁵⁷ Aki su toro toga pris mido mollomwalokwe toorogai'aro Farasi toorogai'aro toorono'gwowi a'mwo abolo tonyu guureji aro aduuwiyoporogano. “A'mwo pweku Jisasollu so'mgonoma'bi tov nevu a'mwo su toollu galomworarano'moneyokwe yere neya donekudono.” Aduuwiyoporogano.