Jems 3 - Gooti Toolluro Yogalokwono

Nevu Jisasolluro a'mwo abolo tonolluro mago tonyuda'ai kaiya'no yogalo nodumwala'jokwe tovinokwono

¹ Mi avalobuuravoo, neya duu'nyulo. Kevu a'mwo bwotonyago toorekul Gooti toolluro yogalo tokwe a'mwo abolo punyu ibwasokwe nyumo'numwalpiyo. Su tov aro tovinokwono. Gooti tool a'mwo abolo tonyu ajainyubworo'ji toga a'mwo gamoro yogalo tokwe ibwasodowado toonollu kaveno majainyubworonekono. Toro kwol kuruv a'mwo abolo punyuro jainyubworono tovi uuwolowo'ji nevu ibwasokwe toonolluno'gwowi muunyu toru'aro po'dogalo kinodokwopiyonekumaronekono. Toro tovino tov kevu bwotonyago toorekul ibwasokwe nyumo'numwalpiyo.

² Su toro tovino kuudo neya jaullulo. Nevu yiuwi'nokai toonol ma'no ma'no pasudo tonyu go'no go'nodo tomgu'aro bwolo'dowadonogano. Nevu nevnokwenolluro mago tonyu pi'mwono mollomwalnodowadonolno'juki nevu yiuno sugudo to'no imo'nopiyanonogano. Aki nemoro kulako tovuro yiuwi'nokai pasudo kunyu kuruv pi'mwono nokwo mollomwalnanonogano. Toro kuvi kuruv nemoro mago tonyuno'gwowi ku'nono mamollomwalodowadonogano.

³ Kuudo neya jaullulo. A'mwo abolo pun hoos tooravuro mago tonyu aiyon kula'nyo tokwe wosodupudogano. Toro wosodupudo su tov aro tovino'mokwono. A'mwo abolo su tonyuro puuto me'nomokavla'mdopure tomuu hoos bwotonyo kworo kuruv yiuwi'nokai kulako togai neya uumjunpino'moneyokwe tovino wosodupudokwono.

⁴ Aki sip tooraino kuudo pun jaullulo. Sip tooro bwotonyorogano. Toro kworai kuruv dolo bwotonyo tov nokwo molobemokavla'mdowodokwono. Toro molobemokavla'mdowo'jure toga sip toolluro buulo tomuuda'ai ipaiyo kula'nyo puul sip bwotonyo su toollu gunyuku'dowodokwono. A'mwo nogunyukullokwe tool ipaiyo kula'nyo su tousi mworarowo'ji buro'nyo buro'nyomuudeyo tomuuno amogunyukuromokavlawo'ji tov sip bwotonyo su tool kuvinono uumjunonekono.

⁵ Su toro to'busuko kubalno nemoro mago tov yiuno kula'nyokwono. Mago su tov kula'nyo kuvi kuruv ilomoropunyo'mo yogalo bwotonyo jokweyokwono. Neya duu'nyulo. Du'nolaiyo kula'nyo kuunodo pwekwo alumuugutowo'ji tov i'womdo bwotonyo kuunodo kuvi kuruv kamiduko bwotonyo nobomjonugelawonokwono.

⁶ Toro te nemoro mago tov duko to'busukokwono. Aki ma'no ma'no pasudo go'no go'nodo tooro nemoro mago su tovi aiyowomno kuullo'mowopiyodupudorogano. Mago kula'nyo su tov nemoro kulako tovi wo'dowodokwono. Toro kuvi kuruv kulako tovida'ai yiuwi'nokai suvlatodeyo tonyu kaiyako mollugolamo'mdowodokwono. Aki mago kula'nyo su tov nemoro yiuwi'nokai mujomwekovla'mdowado tovi widuko to'busuko lumuuguto'mdowodokwono. Neya duu'nyulo. Nemoro mago su tonyu widuko to'busuko lumuuguto'mdowodo to'gwowi du'muudo tomuuda'aiyokwono.

⁷ Kuudo pun jaullulo. A'mwo abolo ton noonyumwonyu ibesa'aiyo kuulludaiyo toorogai'aro dokato toorogai'aro gabakuto wagwollogudo toorogai'aro soolwara tomuuda'ai domwoga toorogai'aro toorai wiyo nokwo ki'duvolodupudogano.

⁸ Toro kuvi kuruv a'mwo kwako akavi mwalodowodo pwolnodo kwol kuruv gavnokweyolluro mago tovino'gwowi wiyo ku'nono mai'duvolonekono. Mago su tov yiuwi'nokai toga kaiya'no yogalo to'no mujodumovla'mdowodokwono. Su tov gabakuto pwol gamoro bulaptokwe wonyo tokwe tuko do'mdowodo to'busukokwono.

⁹ Nemoro mago su tokwe nemi Nellunumiyago Aguto toolluno ilomodomoropiyodowadonogano. Aki mago avalo su tokwe a'mwo abolo punyu Gooti toolluro gavnokweyolbusuko sokwollosoka su tonyu kaiyako igollo'moneyokwe jul'nyogalo duubweyodowadonogano.

¹⁰ Toro te mago puru'monodo su tovida'ai Gooti toolluno ilomodomoropiyo'mo yogalo tokwe'aro aki a'mwo abolo punyu kaiyako jugollo'moneyokwe jul'nyogalo tokwe'aro yiuwi'nokai su toval mago puru'monodo tovida'ai lokabodubulovakono. Toro te miyobuuravoo, nemoro pasudo su tov ilaiyo'maiyo. Nevu su toro tomgu'aro nyumwala'jo.

¹¹ Yovekurajo purukwe'aro duu'nyulo. Wonyo sumdo puruv sulowilovabwo'ji toga wonyo sugudo tokwe'aro wonyo kaiya'nodo tokwe'aro yiuwi'nokai su toval avalo toga nokwo lokabullunovaldukono? Awiyo.

¹² Mi avalobuuravoo, iko fik pwol ikulsulo oolip ton ki'nonoldukono? Awiyo, mai'nonekono. Aki iko wain pwol ikulsulo fik ton nokwo ki'nonoldukono? Awiyo, ku'nono mai'nonekono. Su toro to'busuko kubalno soolwara buugo tovida'ai wonyo nonyo'mo sugudo pun nokwo iranodupudo'mdukono? Awiyo, ku'nono miranodupudokwono.

A'mwo pwol pi'mwo kuudo kurukweyoldeyokwe sugupasudo neya yomjomwekovla'mwalono tovinokwono

¹³ Kemida'ai pweku pi'mwo kuudo tokwe'aro kuudo sugudo tokwe'aro toval me'no youroma'dumdekugono. Toro tooku gumoro sugupasudo amjumovla'bi tovi'aro pi'mwo kuudo su tov a'mwo abolo punyu neya duuduuwallogawono. Aki pi'mwo kuudo su tovi uumjunodo'bure tovida'ai guu a'mwo abolo tonyu kavo to'no neya uubemwojumwalbinekugono. Yo'bi gumoro sugupasudo su tonyuno kuu'maiyo toru nokwo wuuduuwallumwalbinekugono.

¹⁴ Toro kuvi kuruv kevu kwekuullu kuudo bwotonyo tokwe'aro aki kevnokwe togaikul yovo aguto mallo'mo kuudo tokwe'aro su toval kemoro poowokalago tonyu aulaikworo'ji to'gwowi kevnokwe togaikulluno aro nodumwalpiyo. “Oo nevu kuudo pi'mwono me'no youroma'dowadonogano.” Nodumwalpiyo. Kevnokweyogaikulluro pi'mwo kuudo tovino su toro sulomoropinapi tov kuunano yogalo dupinogaikikono. Aki nebal'no yogalo tovi kisuvolo wipinogaikikono.

¹⁵ Neya duu'nyulo. Pasudo su toval Gooti toolluro ago muunyu kai'muuda'ai mwolabolovakono. Toro kuvi kuruv kwako akavida'aiyovakono. Aki kuudo uumdo tovida'aiyovakono. Aki kuudo su toval Satanyolluda'ai bodubulovakono.

¹⁶ Toro te kuudo neya jaullulo. Kwekuullu kuudo su tokwe'aro yovo aguto mallo'mo kuudo tokwe'aro su toval a'mwo pwollu aularo'ji tov kuuruguu'nyu pasudo toorogai'aro kirovanyuvanyu pasudo judo'no judo'nodo toorogai'aro kworai kuruv nomjeroungovla'mwalonekono.

¹⁷ Toro kuvi kuruv a'mwo pwol muunyu kai'muuda'ai Gooti toolluro pi'mwo kuudo tollovai amaro'ji su toolno'gwowi pasudo aro tollovai molludo'movla'mwalonekono. Muudu'nodo tov a'mwo su tool ma'no ma'nodo tovi manyu tomuu'aro mwalmwalonekono. Aki sumwoluko kavo to'no wosunmwalonekono. Aki a'mwo gabovo tobuurai kavo uubemwojumwalonekono. Aki a'mwo pworavuro yogalo dodopure tonyu kaduko yere wimwalonekono. Aki a'mwo abolo punyuno kalo mamwonyomwalonekono. Aki toro tool iko pwol ikulsulo ki'nodowodo toolbusuko kubalno sugupasudo tollovai molludo'movla'mwalonekono. Aki yiuwi'nokai a'mwo abolo avalo punyuno kuu'dello muubweyowo'ji yiuwi'nokai tonyu yiuno aval'no igolmwalonekono. Aki toro tool yiuwi'nokai toga nebal'no pasudo to'no mujumovla'mwalonekono.

¹⁸ Aki nevu yiuwi'nokai a'mwo abolo togai sumwoluko aval'no wosunyo'moneyokwe tovino womdo amjumovlawa'ji tov ikulwiyo to'busuko kuudosanonogano. Toro audosa'ji su tov lukomgu sulo to'busuko ne'nonokwono. Toro ai'no'ji tovida'ai lukomgu a'mwo abolo sumwoluko aval'no kwosunpi su to kubuuro kuruv pasudo idopto'nodo tollovai nomolludo'movla'mwalpinogano.