Jems 1 - Gooti Toolluro Yogalokwono

¹ Mino yovo tov Jemsolenyugono. Toro toonyu Gooti tooke'aro Aguto Jisas Kraiseke'aro tooralluro ki'nato womdokwe wimo'nodumdonyugono. Nuu kevu Isuraiyolda'ai 12-pela yovodolobunyo tobuurekul kwako akavi yiuwi'nokai go'no go'nodo tomuu sounopiyopo tobuurekullu puukwollo aro sokwollaikubwemono. “Ilaiyokwono.” Aikudumono.

Yamju baneki'mo'mdupudo tooro jurogudo yogullumwojonekwapiyodupudo tovinokwono

² Nuuge avalobuuravoo, jul'nyo judo'no judo'nodo pun kemi yamju ikulloganyo'mo abaikullumo'nupi toga kemi poowokalago togai ilaiyo to'no neya jogaulo.

³ Kevu aro tovino kuudo me'no youroma'dupudogaikikono. Jul'nyo puruv nemoro kuudo uubweyodowado tovi yamju wiyoganyo'mo abaneki'mowo'ji toga jurogudo nokwo yogullumwojonekwapiyonokwono. Toro yogullumwojonekwapiyodowo'jure toga nevu jul'nyo su tovi nokwo mokavlovowa'ji nemoro kuudo uubweyodowado tovi muumwogapiyanonogano. Su toro kuudo me'no youroma'dupudogaikikono.

⁴ Toro te kevu jurogudo su tov yogullumwojekwapiyodowo'jure su tovi uumjukuto nyupiyo. Su tov aro tovino'mokwono. Kevu jul'nyo tonyu mokavla'mno mokavla'mno yopi a'mwono togaikulbusuko jurogudo imo'nupinogaikikono. Aki jurogudo su tov kemi yo'movaikwopiyodowo'jure togaikul noonyumwonyu punyuno supto mimwalpinogaikikono. Toro tovino'mokwono.

A'mwo pwol pi'mwo kuudo tovino supto so'ji tov Gooti toollu subusu'nyogalo neya wuudoganono tovinokwono

⁵ Aki kemida'ai pweku pi'mwo kuudo tovino supto subi tov Gooti toollu pi'mwo kuudo pun agujabwoneyokwe tovino neya duudoganogawono. Toro kuudoganbi tookuji Gooti tool yogalo mamodagujurugolonekono. Nemi Gooti su tool yanyagekono. Toro toolluno tov pi'mwo kuudo tovino kuudoganbi su tookuji kuvinono nogujabwonekono.

⁶ Kevu Gooti toollu subusu'nyogalo wuudoganyo'moneyokwe tovino kuudo noullo maullo nyau'mwalpiyo. Toro kuvi kuruv kevu yiuno Gooti toolluno kuudo uubweyopi subusu'nyogalo neya duudoganogaulo. Pweku kuudo noullo maullo sau'bi su tookuno'gwowi soolwara tovuro luwagu luwaguto to'busuko imo'nubinekugono. Toro tookuji dolo to'busuko molobeyogumokwowo'ji aki yaudo yaudo inuuguumwalbinekugono.

⁷ Toro te a'mwo pwol Gooti toolluno kuudo noullo maullo sauro'ji tool aro kuudo nyauro'jo. Oo nuu noonyumwonyu punyuno Aguto toollu subusu'nyogalo kuudoganmi tov gamoro ato tovida'ai kuvinono noma'monyugono. Su toro kuudo nyauro'jo.

⁸ Su tov aro tovinokwono. A'mwo kuudo noullo maullo yau'dowodo su toolluro kuudo ton me'no jopolapinodupudogano. Toro to'busuko kubalno a'mwo su toolluro yiuwi'nokai pasudo kunyu kuruv go'no go'nodo tomuu'aro uumjungovla'mdowodekono.

Jemsol a'mwo apoo'nyaiyo toorogai'aro a'mwo kuto ivito bwotonyagokwe toorogai'aro tooraino adoka tovinokwono

⁹ Jisasolluro a'mwo abolo apoo'nyaiyo tobuuro ilaiyo nokwo mujumovla'mwalpinogano. Su tov aro tovinokwono. Gooti tool a'mwo abolo apoo'nyaiyo su tobuurai muunyu kai'muu me'no sulomorumwallokagano.

¹⁰ Aki a'mwo abolo kuto ivito bwotonyagokwe kun kuruv Gooti toolluro wolomorumwollabodowo'jure tovino ilaiyo nokwo ipinogano. Su toro kwolomorumwollabwo'ji tov kemi wiyo'mwojo'mokwono. Toro te ilaiyo nokwo ipinogano. Toro kuvi kuruv a'mwo kuto ivito bwotonyagokwe su tooro mabwolomorumwollawo'ji to'gwowi aro to'busuko wimo'nonorogano. Gwo'gwo'womdo tomuuda'ai mekwako puruv kwa'mgu kulako tomuu ilaiyo yovaisu'nodowodo su tov yere buukuropiyodowodokwono. Toro to'busuko kubalno a'mwo kuto ivito bwotonyagokwe kworo kuruv kwa'mgu kulako tomuuno to'no yovaisu'nodupudo su tooro yiunokuudo nyounopipinorogano.

¹¹ Kuujo toolluro dukuullo bwotonyo bodowo'jure toga gwo'gwo'womdo tov buukuropiyodowodokwono. Aki mekwako kula'nyo tonyuro pwopto kun kuruv buukuropiyopi bwolo'dapudogano. Toro abwolorapi toga mekwako tovuro sugumaluko yovaisu'nodowodo tov yiunokuudo nyounopiyonokwono. Su toro to'busuko kubalno a'mwo abolo kuto ivito bwotonyagokwe kun kuruv kemoro bisnis womdo mujumovla'mdupudo togai'aro yiunokuudo nyounopipinogano.

Nevnokwenolluro ilaiyo igollunyo'mo kuudo tooro ma'no ma'no yo'moneyokwe me'nonekumokavla'mdupudo tovinokwono

¹² A'mwo pwol yamju wiyoganyo'mo jul'nyo pun bwi'mo'mdowo'jure kuga kuruv gamoro kuudo kuubwengiko tovi neya agudupolarogawono. A'mwo agudupolaro'ji su tool ilaiyo nokwo yonekono. Su tov aro tovinokwono. A'mwo su tool wiyoganyo'mo jul'nyo bwi'mo'mdowo'jure tovi pi'mwono kuuwolowo'ji tov resis tovuro mubiyo ma'dupudo to'busuko kubalno Gooti tool aiyo yiunokuudo mujomwekovlaiyo'moneyokwe tov a'mwo su toollu nuubiyonekono. Gooti tool yiuwi'nokai a'mwo abolo gamino kalo buuropino winodupudo tonyu mubiyo su toro tov nuuwiyonekono. Toro wiyono su tovino subuu'yamju me'no aduuwiyajukekono.

¹³ Ma'no ma'no pasudo yo'moneyokwe kuudo tov a'mwo pwollu ame'nomokavlawo'ji toga a'mwo su tool aro nodo'jo. “Oo nuu ma'no ma'no yo'moneyokwe Gooti tool mi dome'nonumokavla'mwallo.” Su toro nodo'jo. Aro tovinokwono. Ma'no ma'no yo'moneyokwe kuudo tooro Gooti toollu ku'nono mame'nomokavla'mdowodorogano. Aki Gooti tool a'mwo pwollu ma'no ma'no yoneyokwe tomuuno ku'nono mame'nomokavlaiyokwekono.

¹⁴ Toro kuvi kuruv nevnokwe yiuwi'nokai pwolno puru'monodo tonolluro ilaiyo igollunyo'mo kuudo tooro wuulo tovibusuko ibwotovanekubweyodopure tovida'ai ma'no ma'no yo'moneyokwe tomuuno me'nonekumokavla'mdupudorogano.

¹⁵ Kevu yovekurajo akavi duu'nyulo. Sumdomgu kwolaiyo tool sumwoluko tovi anakuuto tomuu kuullumo'nowo'ji lukomgu kwolaiyo muudoga toollu yomaronokwono. Kwolaiyo muudoga su tool aguto gulluno gulluno yowo'ji aiyowo'mo toga nobolonekono. Su toro to'busuko kubalno a'mwo pwol gavnokweyolluro ilaiyo igollunyo'mo kuudo toorai kuumjuno'ji tov ma'no ma'no pasudo tov nobai'mowonokwono. Ma'no ma'no pasudo su tov aguto gulluno gulluno yowo'ji bolnodo tov bai'mowonokwono.

¹⁶ Toro te kevu moro kalo buuropino nyunodupudobuuravoo, a'mwo pworo kemi kuunano nyoukuu'naikudumwalpiyo.

¹⁷ Yiuwi'nokai sugudo ma'dowado togai'aro yasuwa'wino sugumaluko ma'dowado togai'aro ton nemi Nellunumiyago Gooti tool muunyu kai'muuda'ai wolomonekwopiyabodowodogano. Nemi Nellunumiyago su tool kuujo tooke'aro lobako tooke'aro sullugabwo togai'aro yiuwi'nokai bakokwe su tonyu sokwollosokaikono. Gooti sokwollosoka su tool wakuunonabolo to'busuko pumgu'aro mamoropiyodowodekono. Toro kwol kuruv yiuno aval'no imo'nyokwekono.

¹⁸ Toro te Gooti tool gavnokweyolluro ilaiyo winoduke tovi uumjunyuno sumaiyokwe gamoro nebal'no yogalo tokwe nemi a'mwo abolo aiyokwe sumo'nonekudapiyokaikono. Su tov aro tovino'mokwono. Nevu Gooti toolluro yiuwi'nokai sokwollosoka tonyuda'ai ikulsulo muudu'no ki'nodupudo tonbusuko gamoro yiuwi'nokai gabovo sokwollosoka tonyu neya uuwolo'mwalano'moneyokwe tovinokwono.

Nevu Gooti toolluro yogalo me'no kuu'na'ji tovi kuvinono neya uumjunmwalano tovinokwono

¹⁹ Kevu moro kalo buuropino nyunodowodo tobuurekul kuudo neya jaurogaulo. Kevu yiuwi'nokai pwolno puru'monodo togaikul yogalo tovi wuu'nyo'moneyokwe kemoro kaduko ton yere neya duuwiyogaulo. Toro kuvi kuruv kemoro mago tovida'ai yogalo to'gwowi yere nodumwalpiyo. Aki kevu surodo'mo yere nyumo'numwalpiyo.

²⁰ Neya duu'nyulo. A'mwo pwol kwako akavida'ai surodo su tovi kuuno'ji tool Gooti toolluro pasudo idopto'nodo tonyu ku'nono mamolludo'movlawonekono.

²¹ Toro te kevu yiuwi'nokai kaiyako igolamo'nyo'moneyokwe pasudo toorogai'aro ma'no ma'no kiroungovlaiyo'moneyokwe pasudo toorogai'aro toorai neya domodukwopiyogaulo. Toro kugaikul kuruv kemoro poowokalago tonyu Gooti toolluro yogalo puluko to'busuko amomguropingiko su tovino'gwowi ilaiyo neya domollomarogaulo. Aki yogalo su tovi kevu kwako tomuu'aro neya duuwiyogaulo. Yogalo su tov kemi kuullo tobuurai ma'no ma'nodo tovuro kirumwallo tovida'ai nokwo bomollurolovekumokalokwonokwono.

²² Aki kevu yogalo kuu'nupi su tovi muu'nyubusuko nyumwalpiyo. Toro kuvi kuruv yogalo kuu'nupi su tovi kuvinono neya duumjunogaulo. Yogalo su tovi muu'nyubusuko to'no supi to'gwowi kevnokwe togaikul nyoukuu'najunmwalpinogaikikono.

²³ A'mwo pwol Gooti toolluro yogalo tovi kuu'no'ji toga muu'nyubusuko to'no so'ji tool yovekurajo aka'busuko imo'nonekono. A'mwo pwol yainyunyo tokwe gavnokweyolluro sumdomago tovi yainyunonekono.

²⁴ Toro yainyunowo'ji kwol kuruv pumuuno avlawo'ji toga gavnokweyolluro sumdomago tovino kuudo yere yallulo'gwononekono. Toro to'busuko kubalno a'mwo Gooti toolluro yogalo tovi muumjuno'ji tool aval'no imo'nonekono.

²⁵ Toro kuvi kuruv Krais toolluro loowo sugumaluko to'gwowi nemi irolovonekwapiyodowodokwono. A'mwo pwol loowo irolovonekwapiyodowodo su tovi ainodokwopiyomaro'ji tov kuudo nyallulo'gwonmwalo'jo. Aki su tovuro yogalo tovi me'no kuu'no'ji toga neya uumjungovlavogawono. Toro uumjungovla'mdowo'jure su toollu Gooti tool sugudo pun nuubwemwalonekono.

²⁶ A'mwo pwol gavnokweyolluno, Oo nuu lootuu pi'mwono yodumdonyugono, kuudo yauronekono. Su toro kuudo yaurowo'ji kwol kuruv gavnokweyolluro mago tovi po'dogalo tomgu'aro mamolludo'movlawo'ji to'gwowi gami poowokalago tovi kuunano youkuu'najunonekono. A'mwo su toolluro lootuu pasudo tov yiuno yasuwa'no to'no yonekono.

²⁷ Lootuu pasudo kuunodo puru'gwowi nemi Nellunumiyago Gooti toolluro sumdo tovi kaiya'no mimo'nodowodokwono. Su tov arokwono. Nevu kwoloraiyo solkaiyo tobuurogai'aro abekanyo tobuurogai'aro tobuuro jul'nyo mo'movla'mdopure su tobuurai neya mollomwalmwalanonogano. Aki nevu kwako akavida'ai kaiya'no pasudo toorai manyu tomuu'aro neya irukuruwolo'mwalanonogano. Lootuu pasudo kuunodo tov su torokwono.